ESTA 4 - Biblía Axweesantá Hhohho' ar Mungú 2004

Mordekai Esta ngiwa firín alee/isaywo

¹ Qoomár Mordekai muruudá' aa tleehharuut nguwa xuú', tlabaawós giri feehhamiís, guniyadu giri tsiít, tari sliík ar da/ara, iri waaraáhh ar baraá tla/ángw gixsa, /aa/eewo iri gáwtí tseé'.

² Slám ina tláy ay dír afkú doó waawutmo, ala dahmu ngwaa aleeslayká, asma heé dahma gi aleesláw i kaahh afkú doó waawutmoowo bar guniyadu ngaa tsiít.

³ Slám umuúqo diiro baraá ayko hara'ayár waawutmo iwa hardát, slahh'amuú úr xoorór Yahudi guri sleér, tari gwaawín tari /aa/amín nee tari tsuunqumiís, tam múk yaariír guniyadu giri tsitiít nee tari qaqatín baraá da/ara.

⁴ Naagáy sagadiyuusér Esta nee mukdá' ta karmuumuyi, Esta kari kángw Mordekai báy. Waawuto'o Esta iri ló'wa gurhaamút, Mordekai guri tlabií ya/áp as guniyaduudá' ngiwa hingeesi, ala inós iri sií'.

⁵ Ala Esta Hataki guri atét, heé wák baraá mukdá' taa karmuumuyi oo doó waawutmo, oo taa ádbáy Esta ngiwa sagadiyuusi. Guri ya/áp amór Mordekai, áx gaa a milá?

⁶ Hataki iri tláy amór Mordekai dír afeenidár geeraá doó waawutmo.

⁷ Mordekai kangwdá' aa axaás guri alki/iít, nee peésaadá' Hamani aa al'axweés tidá' ta leehhi baraá tlakoó waawutmo as muk Yahudi kuwa qwaareesi.

⁸ Mordekai Hataki guri gooidár qwaareesar'ín i haniís, tidá' taa ilahaniís baraá gixsár Susa, as ngiwa Esta i laqan nee ngiwa ádbay iwa amór waawutmoó keer, nguwa harhheehhe'es as mukós kuduú Yahudi nguwa gurtlay.

⁹ Naagáy Hataki iri kií/ amór Esta, kangwdá' Mordekai aa alki/iít sleémeero guri oó'.

¹⁰ Aluuwo Esta nee Hataki tari axweés, guri malé ya/áp amór Mordekai nguwa bay,

¹¹ «Lawaale sleémeero ar waawutmo gan xú', tam múk ayeemaá waawutmo, adór umuúqo heewo, bar hhawaata laqaá /ameeni, oo aa amór waawutmoó kay barkwa ateetiiká dakko i deer, oo káh heé adoorí a gaasa, aqo har kudá' waawutmo aa hhartós ar sahaábúr looloqoós, tidár waawuti'iima, in hoot. Tam án taa ateetiiká niwa dah iimidá' ay laarí slahhaangw aa faák.»

¹² Mordekai kway axweesanoó Está báy.

¹³ Mordekai inooín giri i axweés Esta kawa mu/aywatsi, giri báy, «Kiíng ma haraxuaar tawa /uur as tawa baraá doó waawutmówí diri' ta múk Yahudi kuquú hatlá' sleémeerowo.

¹⁴ Asma kiíng hamí bara xaslít, múk Yahudi ale/isaay nee ba/ama gin loohír hatlár sláy, kiíng tari qwát dinkwa nee múk doó baabuúwók, ala heé ga xuú' a heemá kiíng waawuti'iima gár kasa sleér tam an qoomár adór tí.»

¹⁵ Esta iri ya/abiín amór Mordekai as kuwa bay,

¹⁶ «Tláw, múk Yahudi sleémeero oo diirír Susarí dirií' burumbureek, ta gwaawiindá' as aníng. Ma /ayimaara' laqaá ma gaa wahaara' har afiqoomár deelo tame, xweera nee tlaatla/aango. Aníng nee sagadiyuuser'eé' a gwaawimaán sleeme, daqaní niri dáh amór waawutmo adoodá' dabe i sla'aká, ar naa hamat bar gwa'ara ni gwaá'.»

¹⁷ Naagáy Mordekai iri tláy, tidá' sleémeero Esta ngwa beér, gari tleehhamór áy.