ESTA 3 - Biblía Axweesantá Hhohho' ar Mungú 2004

Hamani iwa tsabín xoorór Yahudi ngiwa hhaamisi

¹ Alaá kaangwihe waawutmo Ahasuero, Hamani garmoó Hamedata oo tlahhoó Agagi gway heé úr wa qaás daanduú geeraharuuse sleémeero.

² Sagadiyuuse sleémeero tidá' dír afkú doó waawutmoó i dirii', Hamani burkwa ár tan xupapuu' nee kun i tumbarara'amaamiit, asma an adór waawutmo aa oó' daanduuwose. Ala Mordekai i xupuaitiiká, sleeme gu i tumbarara'amitiiká.

³ Naagáy sagadiyuusér waawutmo tidá' afkú doó waawutmo i dirii', Mordekai kuri báy, «Baré kuúng hara'ayár waawutmo an waaqaaqá'?»

⁴ Tawa kumiít ádbabaango ala Mordekai inooín ngiwa kaángwí sií', Hamani kuri ádbáy, as kawa ari áx Mordekai i qiítli. Mordekai inooín gaa qaroó kángw báy adór tar heé Yahudi.

⁵ Hamani ngiwa ár adór Mordekai ngur i xupapuiiká, nee ngur i tumbarara'amitiiká, iri ló'wa qa/iít buhhtaawo.

⁶ Hamani gaa ak gárwá ariiká Mordekai kilós nguwa qwaareesi, asma inooín kwaa xoorór Mordekai i xu'utís. Gawaá adoorihe, Hamani xoorór Yahudi gana qwaareesár wa slaá', múk Mordekai kuduú baraá yaamaá waawutmo Ahasueró i dirií'.

⁷ Slahhángw geera, kudá' ta bay Nisani oo kurkú mibaá nee tsár oo waawuti'iimár Ahasuero, tsawdór ta bay puri kari tleéhh geeraá Hamani wa ale, umuúqo baalaaro nee umuúqo slahhaango kina tsawdoórí tleéhh, slahhángw mibaá nee tsár, kudá' ta bay Adari tsawdo guri sleér.

⁸ Aluuwo Hamani waawutmo Ahasuero guri báy, «Xoororka wák i deer ar aa tsiyayaaxat baraá tla/ángw muu oo umuú dii baraá ayeemo sleémeero awa waawuti'iimarók. Inooín daber'ín nee dabér umuú xoorór ti slawá' i káhh, tam hara'ayár waawutmo ngi axamisiaaká, gawaá adoorihe, nee waawutmo ti aleslay'aaká.

⁹ Barnaxes kuúng waawutámo a slá', barwiito'o gooimeek ar kiwa hhaamisi. Aníng talántár kume mibaangw ar muqslár /awak a haniís dír kudá' gadiyeésíng ngi sagesihhiitá', as ngiwa qaasiya' baraá tlakoó peésár waawutmo.»

¹⁰ Naagáy waawutmo mungaywós kudá' i dugnór qamaamin guri duúx, guri haniís dír Hamani, garmoó Hamedata kuduú tlahhoó Agagi, wakusmoó xoorór Yahudi.

¹¹ Naagáy waawutmo Hamani guri báy, «Peésa kinga kuúng i haniís nee muko sleeme, adór taa aán na tleehheek.»

¹² Bál slahhángw geera tawa mibaá nee tám goouusér waawutmo kari ateét, barwadu kiri gooín ar adoodá' Hamani ngira oó' amór geeraharuuse, nee amór múk urén oo ayeemo, nee amór múk urén oo umuúqo xoorooro, umuúqo ayko ar gooirós, umuúqo xoorooro ar tsifriirós, kina gooín ar umuú waawutmo Ahasuero, nee kiri dugnó i qaás ar mungaywós.

¹³ Barwaduuká' kiri múkwár ya/aáw ay baraá ayeemo sleémeero awa waawuti'iima, tawa kaahi, «Bál slahhángw mibaá nee tsár bar mibaá nee tám, kudá' ta bay Adari, múk Yahudi sleémeero, masoomba nee bariise, /ameena nee na/aá qaweero sleeme, sleémeero ki qwaareesi, nee kiwa tsu/i, nee kiwa hhaamisi nee muruuín ku hayoohi.»

¹⁴ Gooír kaangwí ilahariisa baraá ayeemo kana oó' dír xoordu sleémeero, as kiwa amohhoó' baldae.

¹⁵ Mukdá' iri gaanslár tláy as hara'ayár waawutmo, hara'aydá' kari ilahaniís baraá gixsár ur ar Susa. Waawutmo nee Hamani tana iwiít, ta difaáír wahán, ala gixsár ur ar Susa aa amooqwát.