ESTA 2 - Biblía Axweesantá Hhohho' ar Mungú 2004

Esta kawa waawuto'ór wa tsawaár

¹ Alaá kaangwihe buhhtaá waawutmo Ahasuero nina faakiyé'. Ala tlehhmuuduú Fashti aa tléhh aa qwaariiká baraawose, dinkwa nee tidá' taa oó' daanduuwose.

² Naagáy sagadiyuusér waawutmo tidá' gu sagadiyuus guna beér, «Waawutmo ku /amatliitér hhohhó' i leleehhi.

³ Waawutmo geeraharuuse ngi qaasi gawaá yaamuuwós sleémeero as /amatliitér hhohho' kingiwa burumburi baraá gixsár ur ar Susa, baraá doó /ameena, dír Hegai kuduú /ameenár sagesihhmiít, slám ki di/áy haniisi, nee xooslaá parooti.

⁴ Dasiidá' waawutmo gu sla'atis ka waawuto'ór wa qaasi kitángw Fashtí wa ale.» Adoorí waawutmo gari slaá', adoodá' gari tleéhh.

⁵ Heeko Yahudi i deer baraá gixsár ur ar Susawo, umuuwós a Mordekai, garmoó Yairi, garmoó Shimei, garmoó Kishi oo tlahhoó Benyamini.

⁶ Inós an heé wák baraá tla/ángw mukdá' tinda Yerusalemúr wa ar tlayi dinkwa nee Yekonia waawutmoó Yuda, kudá' Nebukadnesa waawutmoó Babuloni ira tláy.

⁷ Inós Hadasa tidá' umuuwós oo hatlá' ta bay Esta gana umín, dasír maamáywós, asma inós i xwayliitér koondaaká. Inós a dasír ló'wa hhoohhoo' nee ka tsataari hho'. Qoomár xwayliteérós iwa qátl, Mordekai gana ar waátl tay adór dasiirós ar kilá'.

⁸ Ala qoomár hara'ayár waawutmo kawa ilaharmiís dasuú yaariír kuri burumbuúr baraá gixsár ur ar Susa gawaá dabaá Hegai. Esta sleeme kaa huúw baraá doó waawutmo dír dabaá Hegai kuduú sagesihhtusmoó /ameena.

⁹ Esta Hegai guri sla'atís, gari gurií baá/, inós gari xooslár parootír i haniís ar gaanslaay, gari muruú /aymár bu'uútí haniís, nee dasuú hhohhó' oo faanqw guna baraá doó waawutmoó wa tsawaár as Esta ngiwa sagadiyusiya'. Esta nee dasuudae giri dír ak hhoohhoó' i sláy baraá doó /ameenaaro.

¹⁰ Ala Esta tlahhaywós gwaa oiká laqaá tam xoororós, asma Mordekai inós gana iia /uútl.

¹¹ Umuúqo baalaaro Mordekai in daqaaqáy dír afeenír doó /ameena as saayuú Esta nguwa slay, nee áx gár ga slaw.

¹² Dasuuwí tin parootumaamiis har afiqoomár slahheeraá mibaá nee tsare, slahheeraá lahhoó' kudaá geeraawo manemane kan slikaakín, nee slahheeraá lahhoó' awa hatlae kudaá alhhe'eesaay mooyaangw nee di/oó hatlae ngun slikiná', alaá adoorí bira hhooeér umuúqo dasiiro kan huuw dír geeraá waawutmo Ahasuero.

¹³ Qoomár dasi bir daqeér dír geeraá waawutmo umuúqo gár i sla'a kan haniis dír do'oduú /ameenaaro as ngiwa ar dat baraá doó waawutmo.

¹⁴ Tsiindoowo in daqeér nee matlaatleero niri kí/ amór do'oduú tsár oo /ameena, dír dabaá Sha'ashgasi kudá' taa karmúy, sagesihhtusmoó /ameenár quturmo wasl ar waawutmo. Dasi i baloó ki/ká amór waawutmo, aqo bar waawutmo ngwaa sla'atís, nee inós gay ateet ar uma.

¹⁵ Tam qoomaadá' Esta iwa daqeer amór waawutmo iwa xeér dasír Abihaili, maamoó Mordekai, Estadá' aáng ira waátl tawa adór dasiirós, iwa dat amór waawutmo gár aa slá' i káhh, aqo har tidá' taa oó' nee Hegai kudá' taa karmúy, sagesihhtusmoó /ameena. Esta umuúqo heé gaa ari gari waatlakweés.

¹⁶ Qoomár slahhángw mibaangw kudá' ta bay Tebeti, kurkú faanqw oo waawuti'iimár Ahasuero, Esta kana huúw amór waawutmo Ahasuero baraá doó waawuti'iima.

¹⁷ Waawutmo Esta gari slaá' ta /ameenár hatlá' sleémeero, inós gari gurií baá/ ta /amatliitér hatlá' sleémeerowo, naagáy gari saga slamángw waawuti'iimárí dahaás, gari waawuto'ór wa qaás kitángw Fashtír wa ale.

¹⁸ Aluuwo waawutmo geeraharuse nee sagadiyuuseerós sleémeero gari muruú /aymár úr i amohhe'eés as Esta ngiwa waawuto'ór wa qaás. Naagáy waawutmo muu guri gurtláy koódiro baraá yaamuuwós sleémeero, qeemuú yaariír guri haniís ar har qoomoó waawuti'iimarós.

Mordekai slafíngw waawutmo nguwa tuú/

¹⁹ Qoomár /amatliite iwa burumbuurít sagaá wa tsare, Mordekai aa iwiít dír afkú doó waawutmo.

²⁰ Esta tlahhaywós nee xoororose gaa o'ká, asma Mordekai gana iia /uútl, Esta hara'ayár Mordekai gana ót ar adoodá' kara umín nee inós.

²¹ Qoomaadae Mordekai in iwaawiit dír afkú doó waawutmoó, Bigtana nee Tereshi mukdá' tsár taa karmuumúy oo xuumuusér afér doó waawutmo, nina qa/imitiyé' buhhtaawo, tam waawutmo Ahasuero nguri gaasár wa slaiyé'.

²² Naagáy Mordekai kaangwí guri xuú', guri oó' dír waawuto'o Esta, Esta kaangwí gway ó' dír waawutmo ar umuú Mordekai.

²³ Kaangwí kuri alqaytsiít, looeema kay sláy, mukdá' tsár kway terereín gawaá xa'ano, kaangwí kway gooín baraá kitaábuú qom'i dír geeraá waawutmo.