ESTA 1 - Biblía Axweesantá Hhohho' ar Mungú 2004

Waawuto'o Fashti hara'ayár waawutmo Ahasuero ngiwa sí'

¹ Waawutmo Ahasuero ayeemo ngaa sawaawuti'ín a tsiiru nee mibeeri tsár nee faanqw iimír Indiár wa tleemu ay yaamaá Kushi.

² De'eemudae waawutmo Ahasuero ina iwiít gawaá kitaangós kuduú aleesleemu oo waawuti'iimarós, baraá gixsár ur ar Susa.

³ Waawutmo Ahasuero kurkú tám baraá waawuti'iimarose, muruú /aymár úr guna qaás as geeraharuuse sleémeero nee sagadiyuuse, nee geeraharuusér uren ar slaqwaruusér múk Persia, nee oo Media, múk uroó koóm nee ga/aawuusér ayeemo.

⁴ Naagáy har afiqoomár slahheeraá lahhooe Ahasuero daqaari'iimár waawuti'iimarós ar xiríf, nee hhohhoartá waawuti'iimarose gana dir'ín i laqaaqán.

⁵ Alaá slahheeriiká' lahhoó' niwa faakiyé', waawutmo muu sleémeero oo urén nee oo ninakwe oo baraá gixsár ur ar Susa, guri muruú /aymár úr i amohhe'eés baraá afeenír asalmoó doó waawutmo. /Aymaarí ina kumaamít ay deelo faanqw.

⁶ Didaádá' kaa parootuús ar warqamaá /awak, nee awa sirbo/, awa taa tleéhh ar kataánír hhohho'. Warqeemooká' kaa munga'aá /awák i tsegiít ar tlin'aá hhohho' awa kitaánír sirda/aten, kiri tarereín gawaá uheemaá taa tleéhh ar marumaru. Didae kiteeraá bununuqá', awa taa tleéhh ar sahaábu nee muqslár /awak, kaa qaás gawaá sakaáfuú taa tleéhh ar marumaru nee luúlu nee tlaa/aá tlaxo uren.

⁷ Muu ina xufiít ar xooslaá daa'awemaá dimbadimbé awa taa tleéhh ar sahaábu, difaáír waawuti'iima kana qasmiís ar adoodá' gurhhooár waawutmo i diri'.

⁸ Tana xufiít ar adoodá' kara oó', asma an adór waawutmo sagadiyuusér do' ngira ádbáy, heé ta harakeemisi i kaahh, umuú heewo adór i slai gana tleéhh.

⁹ Slám waawuto'o Fashti sleeme muruú /aymár úr guna amohhe'és as /ameena baraá do'oduú waawuti'iima oo waawutmo Ahasuero.

¹⁰ Bál faanqwe waawutmo muunaáwós iwa qwalaá/ as difaái ngiwa xuúf, mukdá' faanqw taa karmuumúy, kudá' gu sagadiyumamiís, guri ateét. Mukwí an ín Mehumani nee Bista nee Harbona nee Bigta nee Abagta nee Setari nee Karkasi.

¹¹ Mukwí guri ádbáy waawuto'o Fashti kingiwa slamaangós oo waawuti'iimár i dahaasi nee kawa huwi dír geeraá waawutmo as geeraharuuse nee muko ngiwa hhohhoaarirós i laqaan, asma inós ka ló'wa hhoohhoo'.

¹² Ala mukdá' taa karmuumúy kangwduú waawutmo nguwa ooiyé' dír waawuto'o Fashti, inós iri sí' daqeemuuwo. Waawutmo iri qa/iít buhhtaawo, buhhta niri baraawós wa kumamitiyé'.

¹³ Aluuwo waawutmo mukdá' sageeloén kudá' qom'i gi xuú' guna ateét. Asma alhootaariro waawutmo gurbua gan leelehhaahhiit dír múk sageeloén kudá' qom'i gi xuú', aluuwo waawutmo mukdá' dabér xuú' nee kuduú hara'ayuuseero giri yaahaás adór ta laqi.

¹⁴ Bihhawose Karshena aa iwiít nee Shetari, nee Admata, nee Tarshishi, nee Meresi, nee Marsena, nee Memukani, geeraharuuse faanqw ar múk Persia nee oo Media, kudá' gitsa/aá waawutmo nga ariye', a múk urén baraá waawuti'iimarose. Giri yaahaás,

¹⁵ «Waawuto'o Fashti adór ka laqaan a adoomá ar adoodá' dabe i dir'a, asma adoodá' waawutmo Ahasuero mukdá' taa karmuumúy nguwa amoorós i ya/aáw gaa tlehhká?»

¹⁶ Naagáy Memukani iri oó' dír geeraá waawutmoó wa ale nee geeraharuuse, «Waawuto'o Fashti waawutmo kilós guna sadakuská, ala a geeraharuuse sleémeero gana sadakús, nee muu sleémeero oo baraá yaamaá waawutmo Ahasuero.

¹⁷ Asma tlehhmuusuú waawuto'o in xu'utiit dír /ameena sleémeero, tam hhawaateeín ngiri waaqaaiyá', tawa kaahi, ‹Waawutmo Ahasuero waawuto'o Fashti gana ateét iwa dír geeraawós keer, ala inós ina sí' daqeemuuwo.›

¹⁸ Tam laarír kilá' /ameenár múk Persia nee oo Media, ar kangwsuú waawuto'o gwaa axas, inooín kangwsíng nguri ooár aya' dír geeraharuuse sleémeero, aluuwo waaqa'amaá yaariir nee buhhtaawo niri dahiyá'.

¹⁹ Barnaxes waawutmo ngaa slaá', waawutmo hara'aya ngi ooi nee ka gooin baraá dabér múk Persia nee oo Media, tidá' ta baloó warqeemamisiiká, tam Fashtidá' geeraá waawutmo Ahasuero mingiwa baloó adát, nee waawutmo waawuti'iimadá' ngi /ameenír hhoó' i haniisi ar Fasti ga baa/.

²⁰ Ala bar waawutmo hara'aya gaa oó' kari ilahariís baraá waawuti'iima sleémeero, daqaní /ameena sleémeero hhawaateeín gi ilaiwá/, tam daqaare laqaá tam narkuute.»

²¹ Naagáy axweesantí waawutmo nee geeraharuuseero kari slaá'. Waawutmo adoodá' Memukani aa oó' gari tleéhh.

²² Inós barwadu gina ya/aáw baraá yaamuuwós sleémeero umuú yaamuwo nee gooir'ín, umuú xoororo ar tsifrir'ín, as umuúqo hhawaatuuwo tawa aako dír do'ose, nee kaangwí nguwa alki/iiti dír mukós i ale ar tsifrir'ín.