ESRA 9 - Biblía Axweesantá Hhohho' ar Mungú 2004

Intsaahhasár Esra daanduú xoordaá hatlá' kiwa duxuuti

¹ Muruuwí sleémeero iwa tlehharuút, múk urén aníng iri i tseewúy, ta kaahi, «Múk Israeli nee kaahamuuse nee múk tlahhoó Laáwi taa paraatli'iiká dír múk yaamuukae, kudá' muruudá' ta waki ngu tlehhaahhitá'. Múk Kana'ani nee oo Hiti, nee oo Perisi, nee oo Yebusi nee oo Amoni, nee oo Moabu nee oo Misri, nee oo Amori.

² Asma inooín nee daaqay'ine dasuú mukdá' nguna duxuutiyé'. Gawaá adoorihe xooroodá' hhoohhoo' ar Mungú taa haragasiyé' nee xoordaá hatlá', slám dabér múk urén ina giiriín baraá dakuúsarihe.»

³ Aníng adoorí ngiwa axaás tlabaaeé' ngiri karslimiís nee hiyay'eene se'éngw sagw'eé' nguri tu/uúm nee daamor'eene as gurhaami, niri iwiít as dae.

⁴ Aluuwo mukdá' axweesantá Munguú Israeli ngi da'ayumiitá' iri i burumburitiyé' as inkihhimu waslér mukdá' naa baraá looháy wa waatl, aníng niri iwiít ar dae ay qoomár ilahhooár muruú ta tsu/i ar tsiindo kawa hanmiisi.

⁵ Qoomár ilahhooár muruú ta tsu/i ar tsiindo iwa xeér, niri tláw alaá niwa gwaawiím, nee tlabaeé' nee hiyay'eé' kudá' taa fehhamaamiisi, niri tumbarara'aát dabaeé ngiri tleés amór AAKOÓ MUNGÚ, Munguúeé' nguri firiím.

⁶ Niri oó', «Aá Munguúeé', án aga amooqwaár, a muruumiít gitse/aaeé' ngiwa amoorók i tlees, Munguúeé', asma tlakweemaarén ki yaariir nay hardihiyé' gawaá sageerén, tlakweemaarén nina dooginé' nay hardihiyé' gawaá doori.

⁷ Iimír baabi'iirene tam ay laarí ateékaá mukók kuúng una sadakumamisaán, as tlakweemaarene atén nee waawitarene, nee kaahamuuseerene, taa qaás gawaá dabaá waawituú xoordaá hatlá', tari tsuú/, tiri loohatís, daqaari'iimaarén kari haasaáng wa ar tláy, tiri ló'wa mureekeés adoorí laarí tay diriiaan.

⁸ Ala hamí ar qoomár niinawe taa guriíbaá/ nee AAKOÓ MUNGÚ, Munguúrén, tam kudá' naa meetiye' nay ba/ané', giri amohhooárí haniís dirós tidá' hhoohhoó' wa alé. As Munguúrén ilaarén ngiwa gwa/aateesi tam daanduú tseegamoorén tihe masók a qwalaa/aán.

⁹ Asma atén a lawaale, ala Munguúrén taa baraá lawaali'iimárí mayká, ala tina slaá' ar sla'aarír warqawaaká dír geeraá waawituú Persiaro, atén tiri pa/ángwií haniisiyé' tawa hootaan, nee Doó Munguúrén nguwa sihhitisaan nee didá' aa fee/it ngiwa /abeesaan, nee Yuda nee Yerusalemuro kiwa xuún.

¹⁰ «Ala daxta Munguúrén, ma ooaán alaá tihe? Asma hara'ayaarók aga mawaán,

¹¹ tidá' naa ó' ar afér sagadiyuuseerók aaruuse, tawa kat, ‹Yaamuudá' ta keera' as kiwa ala', a yaamaá slasla/aar as múk yaamuudá', asma muruudá' ta waki nguwa dalaa/iyé' baraá yaamuudá'.

¹² Gawaá adoorihe, daaqay'ín dasuuhúng munguwa duxuút, tam dasuuín mukuwa duxuút nee daaqayhúng, mi waydú i sla'aara', laqaá diihhooa daqisleém, as kuungá' /uuru kuwa sleera' nee hhooeemaá yaamu kiwa /aga', nee kay na/iihúng i geexeerá' tawa aalír alhhe'eesay wasl.›

¹³ Nee alaá tí sleémeero taa sleeri as tlehhmi'iirén kudá' tlakw nee as tlakweemaarén kudá' ur, ala kuúng Munguúrén taa muxká ar adoodá' atén wa hariim as tlakweemaarén, nee mukrén oo niiná nguri meetís.

¹⁴ Xáy hara'ayaarók an mawaána tiri duxuutaán nee múk muruudá' ta waki gu tlehhahhiít, xáy, kuúng a buhhkáhe as atén tiri qwaarés tam heé meét iri kaahh?

¹⁵ Aá AAKOÓ MUNGÚ, Munguú Israeli, kuúng an gan'amuú koón, atén tina meetís, tari kotsqotaán adoorí tay diriaan. Ga/aaweek, atén a dír geeraawók i diriiaán, atén awa tlakuuse, asma heé hariím sihhtanór dír geeraawoge i kaahh as tlakweemaaká'.»