ESRA 8 - Biblía Axweesantá Hhohho' ar Mungú 2004

Múk naa baraá looháy wa waatl

¹ Mukwí an kudá' urén baraá tlahh'aá baabi'ii'ine, kudá' nee aníng naa Babulonír wa altlawaan qoomár waawuti'iimár waawutmo Artashasta.

² Oo tlahhoó Finehasi a Gershomu, oo tlahhoó Itamari a Danieli. Oo tlahhoó Daudi a Hatushi,

³ garmoó Shekania. Oo tlahhoó Paroshi a Sekaria, inós kuna harafaár nee hhawaataá tsiiru nee mibeeri kooán.

⁴ Oo tlahhoó Pahat-moabu a Eliehoenai garmoó Serahia, inós kuna harafaár nee hhawaataá tsiire tsár.

⁵ Oo tlahhoó Satu a Shekania, garmoó Yahasieli, inós kuna harafaár nee hhawaataá tsiire tám.

⁶ Nee oo tlahhoó Adini a Ebedi garmoó Yonatan, inós kuna harafaár nee hhawaataá mibeeri kooán.

⁷ Nee oo tlahhoó Elamu a Yeshaya garmoó Atalia, inós kuna harafaár nee hhawaataá mibeeri faanqw.

⁸ Nee oo tlahhoó Shefatia a Sebadia garmoó Mikaeli, inós kuna harafaár nee hhawaataá mibeeri dakaát.

⁹ Nee oo tlahhoó Yoabu a Obadia, garmoó Yehieli, inós kuna harafaár nee hhawaataá tsiire tsár nee mibaá nee dakaát.

¹⁰ Nee oo tlahhoó Bani a Shelemoti garmoó Yosifia, inós kuna harafaár nee hhawaataá tsiiru nee mibeeri lahhoó'.

¹¹ Nee oo tlahhoó Bebai a Sekaria garmoó Bebai, inós kuna harafaár nee hhawaataá mibeeri tsár nee dakaát.

¹² Nee oo tlahhoó Asgadi a Yohanani garmoó Hakatani, inós kuna harafaár nee hhawaataá tsiiru nee mibaangw.

¹³ Nee oo tlahhoó Adonikamu, kudá' naa aluú wa hardihiye' umer'ín a Elifeleti, nee Yeueli, nee Shemaya dinkwa nee hhawaataá mibeeri lahhoó'.

¹⁴ Nee oo tlahhoó Bigwai a Utai garmoó Sakuri, inós kuna harafaár nee hhawaataá mibeeri faanqw.

Esra i tlahhoó Laáwí leelehhiit as doó Mungú

¹⁵ Aníng inooín ina burumbuúr dír afaá yaaeedá' amór Ahafár i wa/amiim, xafayrén kuri didií tleehhaán deelo tame. Aníng muu sleémeero nee kaahamuuseero, ina tsee/araariím naxés heé tlahhoó Laáwi oo naa sláw tumu wák i kaahh.

¹⁶ Aníng ana ya/abiím as geeraharuuseerí kingiwa ateeti, Elieseri nee Arieli, nee Shemaya, nee Elnatani, nee Yaribu, nee Elnatani, nee Natani, nee Sekaria, nee Meshulamu, dinkwa nee Yoyaribu, nee Elnatani kudaá intsaahhatuuse.

¹⁷ Ngiri ya/aáw amór Ido, kuduú geeraharusmoó muu baraá Kasifia, inooín ngiri kángw báw oo ta ooi dír Ido nee hhaeewós, nguwa firina' as múk baraá doó Munguúrén wa gadiyuús kunguwa slay baraá Kasifiár wa ale.

¹⁸ As Munguúrén kuwa hhoó' direne, atén tina heé daharuú koóm i huúw oo ta bay Sherebia, garmoó Mahli, garmoó Laáwi, garmoó Israeli, dinkwa nee hhaeewós awa mibaá nee dakaát.

¹⁹ Nee Hashabia dinkwa nee Yeshaya daaqoó Merari, dinkwa nee hhaeeín awa hatlá' nee daaqay'ine a mibeeri tsár.

²⁰ Dinkwa nee kukae múk tsiire tsár nee mibeeri tsár i deer oo taa qaás nee Daudi nee geeraharuuse as múk tlahhoó Laáwi kuwa ale/iimisi. Umér mukwí kaa gooín.

Esra muu ngwa geerahaár baraá gwaawito nee firo

²¹ Aluuwo aníng gwaawito ngiri iigu'uús afaá yaaér Ahafa wa ale, as tiwa ninaweesaan dír geeraá Munguúrén, nee loohiidá' aa gana' kawa dirós wa slawaan, as atén kiloorén, nee as na/iirén, nee as daqaari'iimarén sleémeero.

²² Asma aníng ana muruút waawutmo nguwa firiim slaqwaruuseero nee kudá' faras ngu i tsa/aamá', as tiwa xuna' dír wakuuseero, asma atén waawutmo una bawaán, «Hhooeemaá Munguúrén i gawaá kudá' ngu leelehhiitá', nee /uuruú xarasleemaawós i gawaá mukdá' sleémeero inós gwa geexay.»

²³ Naagáy tari gwaawimaán, Munguúrén kuri harhhehhe'eesaán as kaangwí, firoorén gari iiárií qaás.

Qeemuú taa hanmiís as doó Mungú

²⁴ Naagáy múk mibaá nee tsár nguri paraátl baraá tlaa/ángw kudá' uren awa kaahamuusér Munguhe, inooín an Sherebia, nee Hashabia, nee hhaeeín awa hatlá' mibaangw.

²⁵ Aníng peésaadá' nee sahaábuwo ngiri dir'ín i qoomeés, nee xooslaaro nee ilahhooadá' tinda haniisi as doó Munguúrén, tidá' tinda haniís nee waawutmo nee hara'ayuuseerós, nee múk urén, nee múk Israeli sleémeero.

²⁶ Muruú naa dir'ín i qoomeés a kwí: Guniyadu tsiire tsár nee mibeeri tsár nee xooslaá taa tleéhh ar peésa a tsiiru, ilooeemaaín kílo mibeeri faanqw, nee sahaábu kílo kume tám nee tsiire tsiyáhh.

²⁷ Nee slooqa'aá mibeeri tsár awa sahaábu ilooeemaaín a kílo dakaát, nee xooslaá tsár awa muqslír sirdaa/aat ar tlaxo gawit adór sahaábu.

²⁸ Aníng inooín ngiri báw, «Kuungá' tunda paraátl as AAKOÓ MUNGÚ nee xooslaarihe. Peésaarí nee sahaábuwo a muruú tinda haniís ar sla'aari as AAKOÓ MUNGÚ, Munguú baabi'iihúng.

²⁹ Xuumaak nee amohhe'eemisaak ay dír kay qoomeesi dír geeraá kaahamuusér uren, nee dír geeraá múk tlahhoó Laáwi, nee geeraá geeraharuusér uren ar múk Israeli baraá Yerusalemu, ay dír kay batsi baraá kutuwayduú baraá doó Mungú.»

³⁰ Naagáy kaahamuusér Mungú nee múk tlahhoó Laáwi peésaadá' nee sahaábuwo, nee xosluudá' taa dir'ín i qoomeés, as ngiwa huwiyá' Yerusalemu baraá Doó Munguúrén.

Ki/imaá Yerusalemu

³¹ Aai kiri iimu/uumaán dír yaaér Ahafá wa ale, bál slahhángw geera tawa mibaá nee tsár, as tawa Yerusalemúr kawaan, dákw Munguúrén i dinkwa nee atén, inós tina tuú/ dír wakuuseero nee dír heé atén ti haramamahhamiita baraá loohiiro.

³² Nari hardahaán Yerusalemu, tay amoodá' wa iwiwiitaán deelo tame.

³³ Bál tsiyahhe peésaadá' nee sahaábuwo nee xosluudae kari qoomeés gawaá dabaá kaahamusmo Meremoti garmoó Uria dinkwa nee Eleasari garmoó Finehasi, dinkwa nee múk tlahhoó Laáwi oo ta bay, Yosabadi garmoó Yeshua nee Noadia garmoó Binui.

³⁴ Xosluuká' sleémeero kina faár nee kiri qoomeés, nee ilooeemaá umuúqo gaaro kina gooín.

³⁵ Qoomaadae mukdá' sleémeero naa baraá looháy wa waatl, ilahhooár da/a kari haniís dír Munguú Israeli, awe mibaá nee tsár as xoorór Israeli sleémeero, nee gwaandaawe mibeeri gwaleél nee lahhoó', nee deeloó bee/aangw mibeeri faanqw nee faanqw, nee gurtaawe mibaá nee tsár as tawa ilahhooár tlakweema. Muruuwí sleémeero kuna ilahhooár da/tá wa haniís dír AAKOÓ MUNGÚ.

³⁶ Inooín sleeme hara'ayár waawutmo kari haniís dír geeraharuusér slaqwaruuse nee ga/aawuusér ayeemaá gayuú /uwa yaaér Eufratero, inooín muu kuri ale/iís nee doó Munguhe.