ESRA 7 - Biblía Axweesantá Hhohho' ar Mungú 2004

Esra iwa Yerusalemúrí hardáh

¹ Alaá kaangwihe qoomár waawuti'iimár Artashastawo, waawutmoó Persia, heeko i deer umuuwós a Esra. Esra garmoó Seraya, garmoó Asariya, garmoó Hilkia,

² garmoó Shalumu, garmoó Sadoki garmoó Ahitubu,

³ garmoó Amaria, garmoó Asariya garmoó Merayoti,

⁴ garmoó Serahia, garmoó Usi, garmoó Buki,

⁵ garmoó Abishua, garmoó Finehasi garmoó Eleasari, garmoó Aroni kaahamusmoó úr oo Mungú.

⁶ Esrawí nina Babulonír wa tláy. Inós a goousmoó xu'utír koóm daanduú hara'ayár Munguhe tidá' AAKOÓ MUNGÚ, Munguú Israeli aa haniís dír Mose. Inós kuri alee/iís nee waawutmo umuúqo gár i slai, asma AAKOÓ MUNGÚ, Munguúwós i dinkwa nee inós.

⁷ Qoomár kurkú faanqw oo waawuti'iimár waawutmo Artashastawo Esra nee múk Israeli bahh'ale, nee kaahamuusér Mungú bahh'alé, nee múk Laáwi nee daauuse nee xuumuusér doó Mungú, nee sagadiyuusér Doó Mungú tana tláy ay Yerusalemu.

⁸ Inooín tay hardáh gixsár Yerusalemu qoomár slahhángw kooán oo kurkú faanqw oo waawuti'iimár Artashasta.

⁹ Inós ti'inaangw nguwa iimu/ún yaamaá Babuloniro a bál slahhángw geera tawa wak, inós iri hardáh Yerusalemu bál slahhángw kooán tawa wak, asma inós kuna aleeslawtís nee Mungú.

¹⁰ Asma Esrawí muunaáwós guna amór Mungú xu'ús, dabér AAKOÓ MUNGÚ ngiwa intsaatsahhi nee ngiwa tlehhiiti, nee kaahír Mungú ngiwa intsaahhatimisi baraá yaamaá Israeliwo nee tidá' ngwaa bayi.

Barwiito'ór Artashasta aa Haniís dír Esra

¹¹ Gaarí an gooír barwito'oodá' waawutmo Artashasta aa haniís dír kaahamusmo Esra, kuduú kaahamusmo, kuduú goousmo kudá' hara'ayár AAKOÓ MUNGÚ gaa intsaatsaahh nee kaahirós tidá' aa haniís dír múk Israeli,

¹² «Anuú Artashasta waawutmoó waawitá, amór kunguú Esra oo kaahamusmo nee goousmoó dabér AAKOÓ MUNGUÚ doori, laawaaywók.

¹³ «Aníng hamí hara'aya ngaa oó' ar umuúqo heewo oo múk Israeli, laqaá kaahamuusér Mungú, laqaá múk tlahhoó Laáwi, kudaá baraá waawuti'iimar'eé', kudá' watlíngw Yerusalemu ngu sla'á' nee kuúng ti koonde'.

¹⁴ Asma kuúng taa ya/aáw nee waawutmo nee hara'ayuuseerós tidá' faanqw, as kahhó' kángw Yuda nee Yerusalemu nguwa aan, áx dabér Munguúwók tidá' ta koon kaa eehári ar adór qoom.

¹⁵ Peésa nee sahaábu sleeme huweek, tidá' waawutmo nee hara'ayuseerós naa haniisiyé' ar sla'aari dír Munguú Israeli, kudá' Yerusalemúr hoót.

¹⁶ Peésa sleémeero nee sahaábu tidá' kuúng taa qo sleeri baraá yaamaá Babuloniro dinkwa nee muruudá' sleémeero tinda sla'aarír ar hanmiisi nee muu sleémeero, nee kaahamuuseero, as doó Munguúín kuduú baraá Yerusalemu.

¹⁷ «Kuúng ilakaahareés, ar peésaarihe awe ka tláxw, nee gwaandaawe, nee deeloó bee/aango nee ilahhooár balaangw, nee ilahhooár muruú wahaangw, kuúng ki hanís ilahhooár wa ale, gawaá kitángw ilahhooa oo baraá Doó Munguúwók kuduú Yerusalemu.

¹⁸ Umuúqo gár tlehhmuuwo qoom ar taa aandé' kuúng nee hhaeewók daanduú peésadá' aa met nee sahaábuwo, tleehhaak ar adór Munguúhúng i slai.

¹⁹ Nee xosluudá' tinda kuúngí haniís as gadiyér Doó Munguúwók, kuúng ki hanís dír Munguú baraá Yerusalemu.

²⁰ Nee umuúqo gár sla'amuuta as doó Munguúwók tidá' usa hariim duxaaro, baraá daqaari'iimár doó waawutmo tiwa hanis.

²¹ «Nee anuú waawutmo Artashasta, kuungaásingá' daqaari'iimár amohhe'eemisá' awa ayeemaá gayuú /uwa yaaér Eufratero nun babawaan, umuúqo gár Esra kuduú kaahamusmo nee goousmoó dabér Munguú doori i slai hanisaak ar ilakaahara, ma babaqaamisaara'.

²² Tam peésár kílo kume tám nee tsiire tsiyáhh nee angaánoó kílo kume mibaangw nee difaái liíta kume tsár, nee di/i liíta kume tsár nee diwi ar qoomoó i slai.

²³ Umuúqo gár Munguú doori ni ooi as doó Munguú doori i tleehharut, as miwa buúhh daanduú waawuti'iimár waawutmo nee daaqaywose.

²⁴ Slám nun male babawaan, kaahamuuse nee múk tlahhoó Laáwi nee daauuse, nee xuumuusér afér doó Mungú nee sagadiyuusér doó Mungú a harimaarooká inooín ohme ngiwa hanmiisiya'.

²⁵ «Nee kuúng, Esra, ar adór sagalooár Munguúwók i diria gawaá dabaawoge kwasleemuuse nee har'ohuuse qaaseek, as muu sleémeero kuduú ayeemaá gayuú /uwa yaaér Eufratero nguwa har'ohina'. Inooín masók a múk dabér Munguúwók ga xuú', kuúng na intsaahhatiseek.

²⁶ Ala umuúqo heewo oo dabér Munguúwók ga iialoeemisaaká nee ar waawutmoowo, ku sakwasleemuuti ar gaanslaay, laqaá ar kuwa gaasi, laqaá kuwa lohaatisi, laqaá daqaari'iimarós kawa hayoohi, laqaá kuwa tseegi.»

Esra i Mungú xirfayemiis

²⁷ Esra iri oó', «AAKOÓ MUNGÚ, Munguú baabi'iirén i xirfuuti, kudá' inslawaywí gwaa qaas baraá muunuú waawutmo ar doó AAKOÓ MUNGÚ nguwa parootuusi kuduú baraá Yerusalemu.

²⁸ Inós an kudá' aníng iga sla'aarirós ar warqawaaká i haniis dír geeraá waawutmoowo, nee dír geeraá hara'ayuseerosér nee dír geeraá kudá' aleesleemuú kooma'a. Aníng niri mune hhe'eés geeraharuusér múk Israeli ngiwa burumbuur as tawa altlawaan, asma AAKOÓ MUNGÚ, Mungú a dinkwa nee aníng.»