ESRA 6 - Biblía Axweesantá Hhohho' ar Mungú 2004

Hara'ayár Koreshi kawa malé sláy

¹ Naagáy waawutmo Dario hara'aya gari oó', leelehhit kuri iimu/ún baraá gixsár Babuloniro baraá do'odá' muruú inslaslángw wa hariím oo waawutmo kway baabatsi.

² Kitaábuú wák kuri sláy baraá Ekbatana wa alé, gixsadá' ur ar ayaá Media, nee baraadae /ayma'aá taa gooín an kuká',

³ «Kurkú geera oo waawuti'iimár waawutmo Koreshi, waawutmo Koreshi hara'aya gana oó' ar doó Mungú kuduú baraá yaamaá Yerusalemu kuwa /abeesi tlehhmuuwo dír ilahhooár muruú ta tsu/i kawa hanmiisi nee ilahhooa da/a/aangw kawa hanmiisi. Tlenaango a miíta mibeeri tsár nee faanqw, nee uroó bihheero a miíta mibeeri tsár nee faanqw sleeme.

⁴ Masók koo/irós kan tleehh hhai tám awa tlaa/eedá' uren, nee hháw wák oo xaai gawaá daanduú kuduú tlaa/eewo. Bu'utuú muruuwí kungu baraá daqaari'iimár waawutmoó wa duuxi.

⁵ Nee xooslár sahaábu nee ar peésa ar doó Mungú, tidá' waawutmo Nebukadnesa aa duúx baraá Doó Mungú wa alé kuduú Yerusalemu, gari huúw ay baraá yaamaá Babuloni, ki/isak, ki dahasá' malé alé baraá Doó Mungú kuduú Yerusalemu, umuú xoslmoowo dirós ti ki/ise', nee kuúng ki dahás baraá Doó Mungú.»

Dario hara'ayár gadiyeede tawa kumiiti ngiwa oó'

⁶ «Gawaá adoorihe kuúng Tatenai, ga/aawusmoó yaamaá gayuú /uwa awa yaaér Eufrate, nee kuúng Shetar-bosenai, nee ga/aawuusér hatlá' ar yaamaá gayuú /uwa yaaér Eufratero, ma amoodá' i daqawara'.

⁷ «Gadiyeésír Doó Mungú mawaak, ma il/aamara', ga/aawusmoó múk Yahudi nee bariisér Yahudiro do'osíng oo Mungú ngu tleehhiye' dirós tidár aáng.

⁸ Slám an malé kah, kuungá' muksíng ale/iisaak baraá gadiyeérihe. Bu'utuuín sleémeero hanisaak, mu tligisara' baraá daqaari'iimár waawutmo tiwa duxe' nee baraá ohmeedá' tinda burumburín dír ayeemoosá gayuú /uwa yaaér Eufratero.

⁹ Nee umuúqo gár i slaiia haniisaak, bar awér nakw nee gwaandaawe, laqaá bee/aangw as tawa ilahhooár ta da/i dír Munguú doorí alé, nee angaáno nee diwi nee difaái, laqaá di/i, ar adór kaahamuusér baraá Yerusalemu ta ooi, muruuwí ku hanmiisi umuúqo deeloro, mu mawaara' hanmisuuwo.

¹⁰ As inooín Munguú gawaá doori nguwa ilahhooár muruú ta tsu/i ar sla'atamis i hanmisiya', nee slafíngw waawutmo nee na/iiwós nguwa aleefirina'.

¹¹ Slamí an malé kah, barnaxes hee /aymuuwí gwaa warqeés, waaqaasi ka duuxi baraá do'ós wa alé, ka inós ar muti nee waaqaasi ka sihhtisi, inós i gawaadá' wa tarereamiti, nee do'ós ku ufuú xwaansláy tleehhi.

¹² Nee Munguúwí adoorí gaa tleehh umuuwós iwa dirqá' hooti, inós waawutmo laqaá muu gaalá kudá' dabaaín ngi tleesá' as /aymuuwí nguwa warqeesiya' nee do'owí oo Mungú oo baraá yaamaá Yerusalemu ngu hhaamiisá' ngi suquy. Aníng Dario tí ngaa oó', masók ta ilakaaharees hara'ayarí kawa iialooeesi.»

Doó Mungú kuwa aldafín

¹³ Aluuwo Tatenai ga/aawusmoó ayaá gayuú /uwa yaaér Eufratero nee Shetar-bosenasi nee ga/aawuusér hatlá', tana ilakaahareés hara'ayár waawutmo Dario kawa iialooeesi.

¹⁴ Nee bariisér múk Yahudi tay kumiít tlehhmuuwo, gadiyeé iri ya/aán ar adoodá' aaru'uumár aarusmo Hagai nee Sekaria garmoó Ido i diri'. Inooín tlehhmuú doó Mungú kuri hhe'eés ar adoodá' kira hara'ayín nee Munguú Israeli, nee ar adoodá' kara oó' nee Koreshi, nee Dario, nee Artashasta waawutmoó yaamaá Persia.

¹⁵ Do'owí iwa hhooáy tlehhmuuwo a bál slahhángw Adari tawa tám, baraá kurkú lahhoó' oo waawuti'iimár waawutmo Dario.

¹⁶ Múk Israeli, nee kahaamuuse nee múk tlahhoó Laáwi, nee múk hatlá' oo naa baraá looháy wa waatl, do'owuú Mungú kuri aldafín ar qwal/uú yaariír.

¹⁷ Inooín do'owí oo Mungú kuwa aldafin inooín ilahhooa awe tsiiruú wák kana haniís, gwaandaawe tsiire tsár, nee deeloó bee/aangw tsiire tsiyáhh as hingemisuú tlakweemaá múk Israeli sleémeero, nee gurtaawe mibaá nee tsár ar adoodá' faarór tlahh'aá xoorór Israeli i diri'iya'.

¹⁸ Nee inooín kaahamuuse kari qaás baraá gadiyér Mungú, nee múk tlahhoó Laáwi kuna qaás baraá baalaqaasir'ín, as gadiyér Mungú baraá Yerusalemuro, adoodá' kara gooín baraá kitaábuú Mose.

Pasaáka

¹⁹ Bál slahhángw geera tawa mibaá nee tsiyáhh, mukdá' naa baraá looháy wa waatl deelór ur ar Pasaáka ngiri tleehhiyé'.

²⁰ Kaahamuuse sleémeero nee múk tlahhoó Laáwi tiri hhehhe'eesiyé', inooín sleémeero niri hhoohhouyé'. Deelmoó bee/i nguna gaasiyé' as mukdá' naa baraá looháy wa waatl nee as hhaeeín awa kaahamuuse nee as daandeemoín.

²¹ Deelmooduú Pasaáka kuri /aáy nee muu sleémeero oo Israeli kudá' naa baraá looháy wa waatl, dinkwa nee umuúqo heewo oo taa paraatl dír múk slasla/aruú xoordaá yaamuudae tay haragwaá' dír múk Israeli as AAKOÓ MUNGÚ, Munguú Israeli kuwa sluufmiisi.

²² Deelór ur ar mikaátér taa sluuftisiiká kari tleéhh ar qwala/ ar afiqoomár deelo faanqw, asma AAKOÓ MUNGÚ inooín gina qwal/atís nee muunuú waawutmoó Ashuru guri warqeés as múk Israeli nguwa slai, inooín giri ale/iís as ngiwa /uurií qaasi baraá gadiyér tlehhmuú doó Munguhe, Munguú Israeli.