ESRA 5 - Biblía Axweesantá Hhohho' ar Mungú 2004

¹ Naagáy aaruuse, Hagai nee Sekaria garmoó Ido, tana aariirín dír múk Yahudi kuduú baraá yaamaá Yerusalemu nee Yuda, ar umuú Munguú Israeli.

² Aluuwo Serubabeli garmoó Shealtieli nee Yeshua garmoó Yosadaki tari tláy, doó Mungú kuduú Yerusalemu kuri iimuu/ún tlehhtuuwo, inooín tina ale/iimiisiyé' nee aaruusér Mungú.

³ Qoomaadár kilae Tatenai, ga/aawusmoó yaamaá gayuú /uwa yaaér Eufratero, nee Shetar-bosenai nee hhaeeín múk Yerusalemu kuri i hardáh, kiri báy, «Do'owí kuwa alhhe'esa' tlehhmuuwo, heé ngwa oo' a heemá?»

⁴ Inooín tari malé yaahaás, «Múk do'owí gu tlehhiít a ín heemá?»

⁵ Ala iltá Mungú i amór bariisér múk Yahudír ga/eér as ngiwa xun, inooín gadiyeé ngaa may'iiká ay qoomár kaangwí iwa hardáh dír Dario, nee kaangwí kunguri ki/ís ar barwiito'o.

⁶ Gaarí an gooír taa huúw amór ga/aawusmo Tatenai kuduú yaamaá gayuú /uwa awa yaaér Eufrate, nee Shetar-bosenai, nee ga/aawuusér hatlá' kudá' gayuú yaaeérí diriiá', waawutmo Dario nguna barwiito'oórí gooiné'.

⁷ Inooín barwarí ngina huwiyé' nee /aymi'iiká' kina baradií gooín, «Waawutmo Dario, waawutámo laawaay!

⁸ «Kaangwí i xu'utiiti dír kuúnguú waawutmoowo adór atén nira hardahaán baraá yaamaá Yuda, dír doó Munguúdá' úr, do'odá' kwaa tleéhh ar tlaa/aá uren nee koo/irós kaa tleéhh ar xaa'aá diren. Gadiyeérí kan ilakaaharúr tlehhiit nee in gaanslár hi'ít.

⁹ «Aluuwo atén geeraharuuseedá' sleémeero ana yaahasaán, ‹Do'owí kuwa alhhe'eesa', heé ngwa oo' a heemá?›

¹⁰ Atén sleeme umer'ín ana yaahasaán nee umér geeraharuuser'ine as ngiwa amoorók i gooimaan.

¹¹ «Inooín gár atén taa bayé' a tí, ‹Atén a sagadiyuusér Munguú doori nee yaamu, aten do'duú aáng oo kureeraá yaariir, kudá' taa tleéhh nee waawutmoó ur oo Israeli, atén hamí un /abeemisaán.

¹² Ala qoomár baabi'iirén Munguú doori nee yaamu nguwa buhhtisiyé', ina buúhh giri haniís gawaá dabaá Nebukadnesa waawutmoó yaamaá Babuloni, heé Kaldayo, inós an heé do'owí gwaa hhitin, muu gurir tláy ay yaamaá Babuloni.

¹³ Ala kurkú geera oo waawuti'iimár Koreshiwo, waawutmoó yaamaá Babuloni, Koreshi hara'aya gari oó' ar do'owí oo Mungú kuwa /abeesi tlehhmuuwo.

¹⁴ Xosluudaá Doó Mungú, kudaá sahaábu nee awa peésa, kudá' waawutmo Nebukadnesa ira tláy baraá doó Mungú wa ale kuduú Yerusalemu, giri dahaás baraá do' kuduú baraá yaamaá Babuloni. Xosluuká' waawutmo Koreshi ngina duúx baraá do'duú Babulonír wa ale, ngiri haniís dír heeko ta babay Sheshbasa, kudá' aa ga/aawusmoó wa qaás.›

¹⁵ Inós guri báy, ‹Xosluuká' ooheek, qaasár aweek baraá do'oduú yaamaá Yerusalemu, nee doó Mungú ku /abeesi tleehhamooro dír kitaangós kuduú kilá'.›

¹⁶ Naagáy Sheshbasadá' niri hardáh, iihhafiirír Doó Mungú kuduú baraá yaamaá Yerusalemu gari qaás. Iimír baldá' wa tleemu ay laarí do'odá' ku tlehhahhiit, aa hhooayká.

¹⁷ «Gawaá adoorihe, adoorí dír kuúnguú waawutmoowo bir qoón, didá' muruú inslaslángw wa hariím oo waawutmo kway babatsi baraá gixsár Babuloniro kingi leeleehhi nee ka ari, áx waawutmo Koreshi tlehhmuuwú doó Mungú gwaa oói. Nee waawutmo adór i slai ngi ooi daanduú kaangwihe.»