ESRA 4 - Biblía Axweesantá Hhohho' ar Mungú 2004

Múk tlehhmuú doó Mungú gu siaasií'

¹ Naagáy wakuusér múk Yuda nee Benyamini kawa axaás adór mukdá' naa baraá looháy wa waatl tar doó AAKOÓ MUNGÚ, Munguú Israeli tlehhiít,

² Serubabeli nguri i tseewuyé', nee kudá' uren awa tlahh'aá baabi'i kiri báy, «Atén a tleehhitaán dinkwa nee kuungá', asma Munguúhúng un sluufmisaán adór kuungá' wa ale, atén un ilahhooár muruú ta tsu/i hanmamisaán iimír Esar-hadoni, wawutmoó Ashuru kudá' taa diirí huuw.»

³ Ala Serubabeli nee Yeshua nee kudaá hatlá' uren awa tlahh'aá Israeli ngiri bayé', «Kuungá' gár nu huuw i káhh baraá tlehhmuú doó Munguúrene, ala atén kiloorén AAKOÓ MUNGÚ, Munguú Israeli, un dó' i tleehhaán adoodá' waawutmo Koreshi oo Persia tira ádbáy.»

⁴ Aluuwo múk yaamuudá', múk Yuda guna daba' tlaáq, nee kina dae tlaáq tlehhmuú doó Munguhe.

⁵ Geeraharuuse ngari slukuné' as gadiyeédá' kawa si'i iimír deelo sleémeero ar Koreshi waawutmoó yaamaá Persia, tay de'emaá waawuti'iimár waawutmo Dario, waawutmoó yaamaá Persia.

Múk tlehhmuú gixsár Yerusalemu gu siasií'

⁶ Slám qoomár waawuti'iimár Ahasuero iwa iimu/uún, muu sakwasleema gana gooaaín daanduú múk Yuda nee oo Yerusalemuro.

⁷ Nee slám de'emaá waawuti'iimár Artashasta, waawutmoó Persia nee Bishlamu nee Mitredati nee Tabe'eli, waawutmo Artashasta kuna barwiito'órií gooín ar taa warqeés baraá tsifrír Aramu.

⁸ Rehumu geeraharusmoó slaqwaruuse, nee Shimshai kuduú goousmo, barwárí kana adoorír gooín daanduú Yerusalemuwo amór waawutmo Artashasta,

⁹ «Barwaárí amór i dahh a amór Rehumu geeraharusmoó slaqwaruuse nee Shimshai goousmo, nee hhaeeín awa hatlá', nee har'ohuuse nee ga/aawuuse, nee geeraharuusér múk Persia, kudá' aáng a múk Ereki, nee múk Babuloni, nee múk Susa tidár baraá yaamaá múk Elami,

¹⁰ nee múk xoordaá hatlá' kudá' Asur-banipali, kudá' oo /uuruú koóm, ira tláy, guri qaás baraá gixsár Samaria nee dír yaamuudaá gayuú /uwa yaaér Eufratero.

¹¹ Gooír taa huúw amór waawutmo Artashasta, a tí, «Amór waawutmo Artashasta, ateékaá sagadiyuuseerók awa yaamaá bihhaá /uwa yaaér Efratero, laawaay.

¹² Hám daxta i xu'utit dír waawutmoowo adór múk Yahudi kudá' amoorók daáhh nira hardáh amoorén, aa hardáh Yerusalemu. Inooín gixsadá' tlaakw aa dee/aanuut ngaa inki/iyé' tlehhtuuwo, iihhafiiri kaa tleéhh, nee hám ta koo/ír alhhe'eemiis.

¹³ Hám daxta i xu'utit dír waawutmoowo adór gixsarí barka tleéhh nee koo/irós bira hhooeér, mukwí ohme sleémeero gari sii' bu'utuuwo, nee aleema niri dahiyá' baraá tlakoó doó waawutmoowo.

¹⁴ As adoodá' atén tawa sagadiyuuseerós ar inkihhím i hariindaaká waaqa'amaá waawutmo kiwa araan, ala an gár waawutmo ngusa afoórí ya/aawaán.

¹⁵ Ala kangwsíng kungu leeleehhi baraá kitaaba'aá baabi'iiwoge, baraasinge kuúng aqo sleér adór gixsarí tar dee/aanuuso'o, gixsár waawituú slahh'eemamiis nee ga/awuuse, iimír aange yaamuloouseerós afa dukiirír gilaawo ka hatlá', an gár kasa hhaamiís.

¹⁶ Atén waawutmo un kaangwí xu'utimisaán, barnaxes gixsarí kaa tleéhh nee koo/irós barka hhe'eés, kuúng yaamaá gayuú /uwa awa Eufrate dír ta sawaawuti'iin i káhh.»

¹⁷ Naagáy waawutmo mu/aywatsa gari ki/ís iri oó', «Amór Rehumu, geeraharusmoó slaqwaruuse nee Shimshai, goousmo, nee hhaeeín awa hatlá' awa baraá yaamaá Samariár hootá', nee yaamaá hatlá' awa gayuú /uwa awa yaaér Eufrate, laawaay.

¹⁸ Barwaádá' naa amor'eéní gooiindé' kinga dír geeraaeé' wa soomuús, nee aníng kángw i kat ugwa tsaáhh.

¹⁹ Aníng muu una ádbáw kangwdá' kuwa leeleehhi, nee aga tsaahhaán gixsarí iimír aange adór waawitá ngura siaaiín, nee adór mukós tar dee/aanuuse, nee adór tar afa dukaaruusér kilá' ar gila.

²⁰ Slám waawituú aleesleemuú koóm baraá Yerusalemu ngina hootiyé', inooín yaamaá gayuú /uwa yaaér Eufratero ngina sawaawuti'iné', nee ohme sleémeero ngina ohiné'.

²¹ Gawaá adoorihe, muksíng ádbawaak gixsasíng ka may tlehhtuuwo ay dír aníng kaangw ngway oo'.

²² Ala kangwsinge ma hhaawara'. Gár hhituru'uuma is tlahh nee waawutmo baslaay guri sláy?»

²³ Tam alaá barwaarír waawutmo Artashasta kawa soomuús dír Rehumu, geeraharusmoó slaqwaruuse nee Shimshai, goousmo, nee hhaeeín, tari gaanslár tláy ay Yerusalemu amór múk Yahudi ar /uuru nee aleesleemu, mukdá' kway ilaá/.

Gadiyér tlehhmuú doó Mungú kawa malé iimu/ún

²⁴ Doó AAKOÓ Mungú kuduú baraá gixsár Yerusalemu tlehhtuuwo kuri máy ay kurkú tsár oo waawuti'iimár waawutmo Dario, waawutmoó yaamaá Persia.