ESRA 3 - Biblía Axweesantá Hhohho' ar Mungú 2004

Sluufmis kuwa malé iimu/ún

¹ Tam qoomár slahhángw faanqw iwa xáy, nee múk Israeli ta baraá gixsaduuín, muu ina burumburiít baraá Yerusalemu adór heé wák.

² Aluuwo Yeshua garmoó Yosadaki, ina sihhiít, nee kaahamuuseedár hatlá' nee Serubabeli garmoó Shealtieli, nee hhaeewós, inooín kitángw ilahhooár Munguú Israeli kuna tleéhh, as ilahhooár da/a kawa haniisi, adór kara gooín baraá hara'ayár Mose, heé Mungú.

³ Inooín kitangwduú ilahhooa kuna tleéhh dirós tidá' aáng i dirii'i, asma inooín múk yaamuudá' kuna da'ayuút, AAKOÓ MUNGÚ kuna ilahhooár dá/tí hanmiís matlaatle nee tsiindowo.

⁴ Inooín deelór ur ar isleeri kana amohhe'eemiís ar adoodá' kara gooín, nee umuú baalaaro ilahhooár da/a kana da/aa/án ar adoodá' kara oó' nee ar adoodá' kas hariím.

⁵ Nee alaá adoorihe tana kumiít ilahhooár da/a hanmisuuwo, nee ilahhooár da/a as slahhángw /abén birna ti'iít, nee as ilahhooár umuúqo deelór ur ar AAKOÓ MUNGÚ tidá' tinda oó'. Nee slám ilahhooár da/a kana haniís as umuúqo heewo oo AAKOÓ MUNGÚ ngwa ilahhooár sla'aarír i haniis.

⁶ Iimír bál slahhángw faanqw tawa wak muu ilahhooár da/a gana iimu/ún kawa AAKOÓ MUNGÚ i hanmiisi. Ala qoomaarihe Doó AAKOÓ MUNGÚ kwaa iimu/uniiká iihhafiiriro.

Doó Mungú tlehhmuuwo kuwa iimu/ún

⁷ Inooín peésa kari haniís dír qwatsiiruuse nee múk hhasliít, muruú /ayma nee oo wahaangw nee di/ito kina haniís dír múk Sidoni nee oo Tiro as xaa'aá sahhta kingiwa tsati gawaá tloomár Lebanonír wa ale, nee kingiwa huwi ar baraá tlawi ay gixsár Yopa, ar adoodá' Koreshi waawutmoó Persia ngira pa/ángwií haniís.

⁸ Qoomár slahhángw tsár oo kurkú tsár iimír inooín niwa hardihiyé' dír doó Mungú baraá Yerusalemu, Serubabeli garmoó Shealtieli, nee Yeshua garmoó Yosadaki nee hhaeeín awa hatlá', nee kaahamuuseero nee múk tlahhoó Laáwiwo, nee muu sleémeero, kudá' naa baraá looháy wa waatl ay Yerusalemu gadiyeé kari iimu/ún. Inooín múk tlahhoó Laáwi kuri qaás, kudá' kureeri mibeeri tsár gaa ay nee oo gi ba/abaá/, as gadiyér Doó Mungú kawa sagesihhiiti.

⁹ Yeshua nee daaqaywós nee hhaeewose, nee Kadmieli nee daaqaywose kuduú tlahhoó Yuda, inooín sleémeero gadiyér tlehhmuú doó Mungú ngina sagesihhitiyé', kiwa alee/iimisi nee daaqoó Henadadi nee hhaeeín awa tlahhoó Laáwi.

¹⁰ Qoomár qwatsiiruuse iihhafiirír Doó AAKOÓ MUNGÚ ngiwa hhe'és, kaahamuusér Mungú tlabaaín kudaá gadiyeé ngiri dahaasiyé', nina hardihiyé' nee tarumbeetaduuine, nee múk tlahhoó Laáwi nee oo Asafu, tindina hardáh ar mitingiraay as AAKOÓ MUNGÚ kuwa xirfayeemisi, ar adoodá' kara oó' nee waawutmo Daudi, waawutmoó Israeli.

¹¹ Tari daá' daa'ángw ilaohiingw, ta AAKOÓ MUNGÚ xirfayeemiis, nee kuwa sluufmiisi, ta kaahi, «Asma inós ku hhoó', nee sla'aarirós ar warqawaaká in kumaamít ay alhhe'eesay wasle dír Israeliwo.» Naagáy muu sleémeero tsimaahhiro yaamu giri gaamiís qoomár inooín kuwa xirfayeés asma iihhafiirír Doó AAKOÓ MUNGÚ kawa hhe'eés qaasaro.

¹² Ala kaahamuusér yaariir nee múk tlahhoó Laáwi nee kudá' uren awa tlahh'aá taati'i, nee múk aa diimaadin kudá' doó geera ngwaa ariye', qoomár iihhafiirír do'owí ngiwa ariyé', tana /aa/aamín ar afór ur, tam bahh'ale i tsimaahhuusiia ar qwala/.

¹³ Tam muu afór qwala/ nee ar /aa/eewo paraatlaro gari harslaaqaát. Asma muu ina tsimahhuús ar afór ur, tsimaahhir'ín tsee/a gari tsatát.