ESRA 10 - Biblía Axweesantá Hhohho' ar Mungú 2004

Alhhe'eesoó duuxór nee xoordaá hatlá'

¹ Naagáy qoomár Esra iwa firiirin nee iwa hhu'uu'un, iwa /a/aamin nee giti ngiwa yaamúr óh dír geeraá doó Mungú, kuri i burumburiít nee boo/oó yaariír oo múk Israeli, hhawaate, nee /ameena, nee na/ii, inooín tari ló' wa /aa/amín.

² Tam Shekania garmoó Yehieli oo wák baraá na/aá Elamuwo, Esra guri báy, «Atén Munguúrén una sadakuusaán, /ameenár xoordaá hatlá' awa yaamuuká' kari duxuutaán. Ala tam adoorihe harahhifo i deer.

³ Gawaá adoorihe, alqado a tleehhaán nee Munguúrén, atén tlaawayrén u geexawaán tam nee na/ii'ín kudá' naa laqwaalii'i, ar adoodá' kuúng nee mukdá' hara'ayár Munguúrén ngi da'ayumiitá' kar kata'. Kaangwí i tleehharuuti ar dabe kawa eehaari.

⁴ Tlawáng, gadiyeérí i kuúng sa hariín, atén a dinkwa nee kuúng, muuna hhe'eés, gadiyeé tleehheek.»

⁵ Naagáy Esra iri tláy kaahamuusér uren nee múk tlahhoó Laáwiwo nee múk Israeli sleémeero giri lo'ór /aymiís adoorí ngiwa tleehhiya'. Inooín lo'o ngiri /ayiyé'.

⁶ Aluuwo Esra iri tláy dír geeraá Doó Mungú wa alé, iri dáh baraá kutuwír doó Yehohanani garmoó Eliashibu, iri amoodí qaát mikaáte gaa /ayiiká tam ma'aay gaa wahiiká as gurhaami, asma ina /aa/amín as dakuúsár mukdá' naa baraá looháy wa waatl.

⁷ Afo kari ilahariís baraá Yuda sleémeero nee Yerusalemuro, amór mukdá' sleémeero naa baraá looháy wa waatl tawa burumburiiti baraá yaamaá Yerusalemu.

⁸ Nee barnaxes hee naa daqayká baraá deeloorí tame, ar adoodá' hara'aya geeraharuuse nee bariise ngira oi, daqaari'iimarós sleémeero kan hayoh, inós kilós kuri baynitis dír dinkwár mukdá' naa baraá looháy wa watli.

⁹ Aluuwo hhawaate sleémeero awa Yuda nee awa Benyamini tari burumburiít har afiqoomár deelo tame, bál slahhángw gwaleél tawa mibeeri tsár. Muu sleémeero iri iwiít dír afeenír doó Mungú, ta daraax as kaangwí nee as tluwoó ur oo tluúw.

¹⁰ Naagáy, kaahamusmo Esra iri sihhiít, giri báy, «Aga dakusé', /ameenár xoordaá hatlá' kawa duxuté', gawaá adoorihe dakuúsár Israeli aga dogé'.

¹¹ Hám daxta, tlakweemaahúng hhu'uu'umaak dír AAKOÓ MUNGÚ, Munguú baabi'iihúng, nee sla'aarirós na tleehhaak, ti partle' dír múk yaamuukae, slám /ameenaadár xoordaá hatlá' guusaak.»

¹² Dinku'uumadá' iri ilaawáts, tari oó' ar afór ur, «I qoón! Adór kangwrén kura ó' an adór atén wa hariim tlehhmuuwo.

¹³ Ala mukwí ku yaariír, slám a qoomár tluwoó yaariír, atén sihhtanór tsee/a a aleeslawaanaaká, slamí gadiyeérí ar looár wakeeká, laqaá ar deelo tsareeká, asma aga ló'wa dakuusaán baraá kangwsinge.

¹⁴ Ala geeraharuuseerén i met baraakaá Yerusalemu as daanduú muu sleémeero as kaangwí kuwa axweesi daqaní muu sleémeero baraá gixsaduurene, kudá' /ameenár xoordaá hatlá' gaa duxuut, ni hardihiye' afi qoomaadá' taa qaasi, slamí dinkwa nee bariisér umuúqo gixsa nee har'ohuuseero, ay dír buhhtaá xaraaslá' awa Munguúrén ni tsauya', kaangwí i faaki.»

¹⁵ Heé axweesantí gaa sii' i kaahh ala aqo har Yonatan garmoó Asaheli, nee Yaseya, garmoó Tikwa kilooín nina sihhiitiyé' /aymuuwí ngway si'iyé', Meshulamu nee Shabetai heé Laáwi tari bartá mukwí áy.

¹⁶ Naagáy mukdá' sleémeero naa baraá looháy wa waatl adoorí kari ya/án. Kaahamusmo Esra hhawaate giri paraátl baraá tla/ángw geeraharuusér uren ar tlahhi'i wa alé, nee umer'ín gari gooín. Tana iwiít bál slahhángw mibaangw tawa wak as kaangwí kuwa alqayti.

¹⁷ Kángw hhawaate sleémeero kudá' /ameenár xoordaá hatlá' ngaa duxuutiye' kuri tsaát bál slahhángw geera tawa wak.

Hhawaataá /ameenár xoordaá hatlá' ngaa duxuutiye'

¹⁸ Baraá tla/ángw kaahamuusér Munguhe awa /ameenár xoordaá hatlá' nga duxuutiye' a kuká': Hhay Yeshua garmoó Yehosadaki nee hhaeewós, Ma'aseya, nee Elieseri, nee Yaribu, nee Gedalia.

¹⁹ Inooín nina ya/ané' /ameenadá' kawa guusi nee as adoodá' tawa dakuús, gwaanda nguri duuxiyé' as dakuúsar'ín.

²⁰ Hhay Imeri a tí: Hanani, nee Sebadia.

²¹ Nee hhay Harimu a tí: Ma'aseya, nee Eliya, nee Shemaya, nee Yehieli, nee Usia.

²² Nee hhay Pashuri a tí: Eliehoenai nee Ma'aseya, nee Ishmaeli nee Netaneli, nee Yosabadi nee Elasa.

²³ Nee hhay Laáwi a tí: Yosabadi nee Shimei, nee Kelaya (inós an kudá' ta bay, Kelita) nee Petahia, nee Yuda, nee Elieseri.

²⁴ Nee awa daauuse a kuká': Eliashibu. Nee awa xuumuusér Doó Mungú a kuká': Shalumu, nee Telemu, nee Uri.

²⁵ Nee múk hatlá' oo Israeli, hhay Paroshi a ti: Ramia, nee Isia, nee Malkiya, nee Miyamini, nee Eleasari, nee Malkiya, nee Benaya.

²⁶ Nee hhay Elamu a tí: Matania, nee Sekaria, nee Yehieli, nee Abdi nee Yeremoti nee Eliya.

²⁷ Nee hhay Satu a tí: Eliehoenai, nee Eliashibu, nee Matania, nee Yeremoti, nee Sabadia, nee Asisa.

²⁸ Nee hhay Bebai a tí: Yehohanani, nee Hanania, nee Sabai, nee At-lai.

²⁹ Nee hhay Bani a tí: Meshulamu, nee Maluki, nee Adaya, nee Yashubu, nee Sheali nee Yeremoti.

³⁰ Nee hhay Pahat-moabu a tí: Adna, nee Kelali, nee Benaya nee Ma'aseya, nee Matania nee Besaleli nee Binui nee Manase.

³¹ Nee hhay Harimu a tí: Elieseri, nee Ishiya, nee Malkiya, nee Shemaya, nee Shimeoni.

³² Nee Benyamini, nee Maluki, nee Shemaria.

³³ Nee hhay Hashumu a tí: Matenai, nee Matata, nee Sabadi, nee Elifeleti, nee Yeremai, nee Manase, nee Shimei.

³⁴ Nee hhay Bani a tí: Ma'adai, nee Amramu, nee Ueli.

³⁵ Nee Benaya, nee Bedeya, nee Keluhi.

³⁶ Nee Wania, nee Meremoti, nee Eliashibu.

³⁷ Nee Matania, nee Matenai, nee Ya'asu.

³⁸ Nee hhay Binui a tí: Shimei.

³⁹ Nee Shelemia, nee Natani, nee Adaya.

⁴⁰ Nee Maknadebai, nee Shashai, nee Sharai,

⁴¹ Nee Asareli, nee Shelemia, nee Shemaria.

⁴² Nee Shalumu, nee Amaria, nee Yosefu.

⁴³ Nee hhay Nebo a tí: Yeieli, nee Matitia, nee Sabadi, nee Sebina, nee Yadai, nee Yoeli, nee Benaya.

⁴⁴ Hhawaateeká' sleémeero /ameenár xoordaá hatlá' ngina duxuutiyé'. Inooín /ameenadá' kari guús nee na/ii'ín kudá' na laqwaalii'i.