ESRA 1 - Biblía Axweesantá Hhohho' ar Mungú 2004

Koreshi múk Yahudi nguwa watliíngwí haniís

¹ Kurkú geera oo waawuti'iimár Koreshi, waawutmoó yaamaá Persia, as axweesantadá' AAKOÓ MUNGÚ aa oó' ar afkú aarusmo Yeremia iwa bo/, AAKOÓ MUNGÚ muunuú waawutmo Koreshi oo Persia guri gwarangwaár, inós afo gari ilahaniís baraá waawuti'iimarós sleémeero, sleeme gay gooín, iwa kaahi:

² «Waawutmo Koreshi oo Persia i kaahi, AAKOÓ MUNGÚ, Munguú doori, waawuti'iima sleémeero ar yaamu ngaa aníng i haniís. Aníng iga waawuti'iimár yaamu sleémeerowí haniís. Aníng iga ádbáy nguwa dó' i tleehh baraá Yerusalemu, tidár baraá yaamaá Yuda.

³ Umuúqo heewo kuduú kós baraá tla/angwhunge, masók Munguú i dinkwa nee inós, nee i tsa/an ay Yerusalemu, baraá yaamaá Yuda, Doó AAKOÓ MUNGÚ nguwa tleehhi, Munguú Israeli, inós an Mungú baraá Yerusalemuro.

⁴ Nee umuúqo heewo kudá' aa dirkár i meet oo dahi'iimár hoót, ku ale/iisi nee múk didá' ar peésa, nee ar sahaábu, nee daqaari'iima, nee hikwa, dinkwa nee muruú ta sla'aarír ar hanmiisi as tlehhmuú doó Mungú baraá Yerusalemu.»

⁵ Aluuwo mukdá' urén oo tlahh'aá taati'i, oo Yuda, nee Benyamini, nee kaahamuuseero nee múk tlahhoó Laáwi, umuúqo heewo kudá' muunaáwós Mungú aa gwarangwaár tari tláy, as Doó AAKOÓ MUNGÚ kuwa tleehhi, kuduú baraá gixsár Yerusalemu.

⁶ Inslaawaay sleémeero mukdá' guna alee/iís ar xooslaá peésa nee sahaábu, ar daqaari'iima nee ar makaay, nee ar muruudá' ak hhó', dinkwa nee muruudá' sleémeero taa sla'aarír ar hanmiís.

⁷ Slám waawutmo Koreshi xooslaá doó AAKOÓ MUNGÚ, kudá' Nebukadnesa naa huúw Yerusalemu wa alé, giri qaás baraá doó munguiiwós, inós giri ki/ís.

⁸ Xosluudá' Koreshi, waawutmoó Persia giri ki/ís ar dákw Mitredati, kudá' peésár amohhe'eemiís, xosluuká' kina dír geeraá Sheshbasa wa fadiít, kuduú geeraharusmoó Yuda.

⁹ Gaarí a faaroorós: Iimpaá sahaábu a mibeeri tám, awa peésa a kumuú wák, tsati'i mibeeri tsár nee gwaleél,

¹⁰ búkloó sahaábu mibeeri tám, búkloó peésa a kume tsár tsiire tsiyáhh nee mibaangw, nee xooslaá hatlá' a kumuú wák.

¹¹ Xoslu sleémeero awa sahaábu, nee awa peésa dinkwaaro a kume kooán nee tsiire tsiyáhh. Kuká' sleémeero Sheshbasa gina ar tláy qoomár mukdá' ta lohaatís iwa ti'imiiti Babulonír wa ale ay yaamaá Yerusalemu.