ESEKIELI 9 - Biblía Axweesantá Hhohho' ar Mungú 2004

Yerusalemu ka muux

¹ Aluuwo afór ur ngiri axaás, AAKOÓ MUNGÚ i kaahi, «Qwalaasare'! Tseewuwaré', kuungaádá' gixsarí ngi sakwasleemutá'! Qwalaas nee xooslár slaqwararhunge ar gixsarí hhaamisa.»

² Múk lahhoó' nina amór afkú gáwtá daáhh, kuduú bihhaá /iikuú ga/áw, umuú heewo i xooslár slaqwarár kón, tidár gixsa hhaamisa. Inooín nee heé wák oo tlabaá taa tleéhh ar kitaáni ti alkoná', nee inós chupiito'ór wiínoó koom ga kón. Tari sihhiít dír bihhaá kitángw muqslír sirdaa/aat oo ilahhooa hanmis.

³ Aluuwo xirfuú Munguú múk Israeli iri quútl dír slaqsayduú keruúbiro, nee iri tsa/án ay gawaá maandár Doó Mungú. AAKOÓ MUNGÚ heedaádá' chupiito'ór wiíno koón nee tlabaá aa dahaás awa neewór kitaáni, guri ateét,

⁴ guri báy, «Waaraáhh ar baraá tla/ángw gixsár Yerusalemu, laya qaaseek gawaá gitsee/ér mukdá' gurhamuút nee oo /aa/amiím as muruudá' slasla/arén sleémeero ta tlehhiiti baraá gixsarihe.»

⁵ Qoomár iwa mukdá' kangwdá' babay aníng a axamiís, iwa kaahi, «Waarahhé' ar baraá gixsa aluuwose wa ale, muu tsu/aak, tamu wák mu geexawaar, mi baloó gurtlawaara'.

⁶ Bariise didár kilá' tiwa tsu/e', daaqaay nee dasuuwo, na/ii nee /ameenaaro. Ala heé taa gitsee/a layár i qaás mu kwatitara'. Dír hota'aá kilá' na giirisaak.» Naagáy bariisedár dír geeraá Doó Mungú kari giiriís.

⁷ Giri báy, «Doó Mungú meetagaasaak, afeenirós tuií dalaa/aak. Gimsé', tlawé'!» Naagáy tari tláy, muu kuri tsuú/ baraá gixsadae.

⁸ Qoomár tawa múk tsu/i, aníng tina kilooeé' geexáy, niri gurúr qaát yaamu, niri /aá/, niri oó' «Aá Aakoó MUNGÚ! Múk Israeli sleémeero kudaá meet u hhaamísa, as xaraasleemawók daanduú Yerusalemuro kiwa boo/es?»

⁹ Inós iri báy, «Tlakweemaá múk Israeli, nee awa múk Yuda, ki ur ló'wa aleeró. Daanduú yaamu aa haáts tseerdaá muko, nee baraá gixsaro heé gan'amuú tlehhiít i kaahh. Asma ta kaahi, ‹AAKOÓ MUNGÚ yaamu gaa máy, AAKOÓ MUNGÚ i xumisiiká.›

¹⁰ Bartaeene i baloó mawaaká, laqaá i gurtlawaaká. Aníng an tleéhh adoodá' hariim as tlehhmi'ii'ín.»

¹¹ Naagáy hheedaádá' tlabaá neewór kataánír hhohho' nee chupiito'ór wiíno nina kií/, iri oó', «Aga tleéhh adoodá' iga beér.»