ESEKIELI 8 - Biblía Axweesantá Hhohho' ar Mungú 2004

IIGU'UTUÚ TSÁR OO ESEKIELI DAANDUÚ MUNGUHE ( ) Slufmisuú munguaá hatlá' baraá gixsár Yerusalemuro

¹ Bál slahhángw lahhoó' tawa kooán kurkú lahhoó', aníng a dír dooeé' i dirií' dinkwa nee bariisér múk Yuda. Aníng /uuruú Aakoó MUNGÚ iri hatsiís ar gaanslaay.

² Iigu'utu nguri ár, naxés gár adór hee ana ár. Baráy wa tleemu ay afeetlo a adór asla. Iimír afeetloó wá tleemu ay gawa i qwiirí/ adór muqslír sirdaa/aat.

³ Naagáy gár adór dako aníng iri se'e óh. Qeeruú Mungú iri tleés dír tla/ángw doori nee yaamuwo, iri huúw ay Yerusalemu, aníng aqo baraá iigu'utuwú Mungú i dirií'. Niri hardáh dír dahmaá baraá matla/aangw bihhaá /iiko, didaádá' taa slaqsoó munguaá hatlá' i qaás, kudá' Mungú buhhtamís.

⁴ Xirfuú Munguú Israeli i didá', inós a adór xirfudá' naa ár qoomár niwa baraá iigu'utu, kuduú baraá xatsa.

⁵ Naagáy Mungú iri báy, «Heewí, qaytsiít bihhaá /iya.» Aníng niri bihhaá /iíkwí qaytsiít, nee bihhaadaá /iiko afkú dahma, amór kitángw ilahhooa kawa hanmamisi, gár naa ár a slaqsaydá' Munguú buhhtamís.

⁶ Mungú iri báy, «Heewí, xáy aga aándi muruú ta tlehhiiti. Múk Israeli muruú urén oo aníng i buhhtamís ngu diirí wa tlehhiitiyá' as aníng iwa gusisina' dír dooeé' wa aleeró. Tam adoorihe kuúng muruú slasla/arén oo hatlá' u male aán, kudá' taa tlehhiít oo aníng i buhhtamís ló'wa alé.»

⁷ Aluuwo iri ar tláy ay dír afkú afeeni. Niwa qaytsiít fooxa ngiri baraá koo/írií ár.

⁸ Inós iri báy, «Heewí, koo/irí fooxiseek.» Aníng ngiri fooxiís, afkú do' nguri ár.

⁹ Inós iri báy, «Dáh baraá do', muruudá' slasla/arén i tlehhiitiya' barasinge xuxueek.»

¹⁰ Naagáy aníng niwa dáh, koo/i ngiri ár, naxés kaa gooaaín slaqsa'aá dayshe nee awa makaá hatlá' awa slasla/aren, nee awa makaá sla/a awa i buhhtamisá', nee slaqsa'aá munguaá múk Israeli naa tleehhiyé' ar dabaaín, kaa tlehhahhiít, guruú do' ngway harweeriyé'.

¹¹ Nee dír geeraá slaqsi'iikae bariise mibeeri faanqw ar múk Israeli, taa didií sihhiít dinkwa nee Ya'asaniya garmoó Shafani. Umuú heewo dakose i hhaansoó kón, nee quuír muruudú mooyángw tsuú' iri tsa/aán gáwtí alé.

¹² Aluuwo Mungú iri báy, «Heewí, aga aándi kángw bariisér múk Israeli taa tlehhiít baraá giwtír wa alé, umuú heewo i baraá kutuwirós tidá' slaqsa'aá munguaá hatlá' koom. Inooín i kaahiya', ‹AAKOÓ MUNGÚ atén ti ga/ayká. AAKOÓ MUNGÚ yaamu gwaa máy.› »

¹³ Slám ina malé báy, «Gimáy daameek, muruú urén oo aníng i buhhtamís oo i tlehhitiyá' u ara hhe'és.»

¹⁴ Naagáy iri huúw ay dír afkú bihhaá /iya oo Doó AAKOÓ MUNGÚ, didaádae /ameena aa iwít ar tsuunqumiis as Tamusi Múk Kana'ani guna sluufmiís. Inós a munguú harma/o, qoomár ageewo tan tsuunqumiis ngiwa xuiya' Munguúín kwí aa gwaá'.

¹⁵ Mungú iri báy, «Heewí, tí aga aándi? Gimáy lakiít, muruú aníng i buhhtamís oo kwí ba/a u aán.»

¹⁶ Naagáy aníng iri huúw ay dír afeenír Doó AAKOÓ MUNGÚ, didár afkú Doó AAKOÓ MUNGÚ, dír tla/ángw matla/aangw nee kitángw ilahhooa. Naxés hhawaataá mibeeri tsár nee kooán i didií dirii'iyá', Doó AAKOÓ MUNGÚ ngwa alaá xu'usiyé', gur'er'ín kaa da/aáw xu'ús, ta tse/amuú firirín, gur'e a da/aáw.

¹⁷ Mungú iri báy, «Heewí, kuúng kaangwí ugwa aándi? Tam adoorihe, múk Yuda adoorí iwa mune duxuna' kawa ga/ay a gár niina. Yaamu gaa hatsisiyé' /aytaro, adoorihe tari buúhh aníng mune duxuungo. Áx ga/aaweek adór haleemaá xaai ngira qaasiyé' gawaá dunger'ín.

¹⁸ As daanduú muruuwihe aníng inooín in i xaraásl. Hee tumu wák i kotsoqotiiká, laqaá guruueé' i baloó tlayká. Tam i /a/aminá' ar afór ur, aníng i baloó axaasaaká.»