ESEKIELI 7 - Biblía Axweesantá Hhohho' ar Mungú 2004

Hartsatángw múk Israeli naa tseewúy

¹ Axweesantá AAKOÓ MUNGÚ aníng ana axaás, i kat,

² «Heewí, yaamuloouusér yaamaá Israeli ka beer, ‹Aníng AAKOÓ MUNGÚ a kah, hám daxta alhhe'eesayhúng naa xáy, alhhe'eesaay naa hardáh dír yaamuuká sleémeerowo, badu tsiyahhaawo.

³ Hám daxta alhhe'eesay naa hardáh. Buhhtaeé' awa xaraaslá' daanduhunge i axasá', nun sakwasleemuút ar har qoomoó tlehhmi'iihúng, nun sakwasleemuút as muruudá' sleémeero aníng i buhhtamís taa tlehhé'.

⁴ Nu baloó mawaaká, laqaá gurueé' i tlayká, aqo nun sakwasleemuút, har qoomoó tlehhmi'iihúng, barnaxes muruudá' aníng ni ahhiit i baraá tla/angwhúng kón. Daqaní kuungá' a tsahhá' adór aníng tar AAKOÓ MUNGÚ.›

⁵ «Gár anuú Aakoó MUNGÚ ni kah a tí, amotlakwe hhaywós i tsatitiiká dirhunge.

⁶ Alhhe'eesaay naa hardáh, eeít, alhhe'eesaay naa hamaár, naa dirhúngií hardáh.

⁷ Kuungá' yaamuloouusér yaamuuká', hhaamisarhúng naa i hardát, qooma naa hardát, eeít, deelo naa tseewuúr. A deelór amoqwaqwadiingw nee a deelór bar/uuwooká gawaá tlom'iiwo.

⁸ «Hamír kilá' ilooeemaá xarasleemaá daanduuhunge i axasá'. Án kuungá' nun i buúhh. Nun sakwasleemuút ar har qoomoó tlehhmi'iihúng kudá' taa tlehhité'. Nun sakwasleemuút ar har qoomoó muruudá' buhhtamís taa tlehhé'.

⁹ Nu baloó mawaaká, laqaá gurueé' i tlayká, aqo nun sakwasleemuút har afiqoomoó tlehhmi'iihúng, barnaxes muruudá' aníng i ahhiit i baraá tla/angwhúng kón. Daqaní kuungá' a tsahhá' adór aníng tar AAKOÓ MUNGÚ, kudá' nu hhaamiís.

¹⁰ «Ga/aawaak, deeloodá' ni hi'ít, hhaamiisarhúng naa hardát, gurtleemu i umuú dii, nee daara/aangw a /ar/aantuús.

¹¹ Gurtleemu wasle aa kumiít ar adór ló'wa tlaakw, hee tumu wák oo dirhunge meét i kaahh, laqaá tam muruudá' yaariír taa burumburariindé', laqaá daqaari'iimarhúng, heé ilaiwa/amér koóm oo dirhúng i meét i kaahh.

¹² «Qooma naa hardát, eeít, deeloodá' naa tseewuúr, heé gár tlaxuúm miwa qwalaá/, laqaá heé gár weeramiís miwa tsuunqumiís, asma buhhtaeé' muu sleémeerowo ngu slayá'.

¹³ Mukdá' muruú weeramiís tam ta slaáf, daqaari'iimar'ín tidá' ngi inki/iaaká. Asma iigu'utuwí a daanduú boo/aay sleémeero, i baloó warqayká. As tlehhmi'iiká tlakwe heé hotaawós gi ba/amís tumu wák i kaahh.

¹⁴ Tarumbeéta ka ufaahh, nee muu sleémeero taa amohhe'eés. Ala heé slaqwarár áw i kaahh, asma buhhtaeé' i gawaá daanduuín i dirii'iyá'.»

Muxtár Mungú as tlakweemaá múk Israeli

¹⁵ «Heé tsee/aá gixsár i dirií' ku gaas ar paánga, nee baraá gixsaro tiqtír pu/i nee qwari muu ngun faakiyá'. Múk baraá qamu ta qaatl ar paánga, kudá' baraá gixsár i diriiá' kin hhaamiis nee qwari nee tiqtír pu/i.

¹⁶ Múk aa kotsqoot bir deer, ta ta'aaín gawaá tlom'i, adór hhookár tinda baraá xatstá wa naáxw, umuú hee iri tsuunqumiis as tlakweemaawós.

¹⁷ Umuú heewo dabaawós nin tsatiitiyá' nee gurunge'eeriwós niri wanana'atiyá'.

¹⁸ Inooín tlabaá guniyadu ngiri tsiitiyá', dae giri eér. Inooín niri muruutiyá' nee sager'ín sleémeero kari deeqw.

¹⁹ Peésar'ín ngiri kwahhiya' baraá lohdu, nee sahaábuín tari adór gár meetagaamiis. Inooín ti tu/iiaakaá ar peésa nee sahaábuuwo baalaadár buhhtaá anuú AAKOÓ MUNGUHE. Inooín slám ta axiiká, laqaá gur'er'ín ka dala/iiká peesaaro nee sahaábu ta burumbuuri. Asma daqaari'iimar'ín an gár gaa tlakweemá i hup.

²⁰ Asma inooín xirfuú gaa wásl nguna tleehhiyé' ar miislidá' hhoohhoo'. Slaqsa'aá munguaá hatlá' kudá' iga buhhtisiye', dinkwa nee muruuín kudá' alsi'ime, muruuwí sleémeerowo dir'ine un meetagaas.

²¹ «Daqaari'iimar'ín aníng a haniís gawaá dabaá múk xoordaá hatlá', múk tlákw oo xoorór hatlá' muruuín ku hayoh nee kuri meetaqaasiyé'.

²² Aníng i alaá xu'ús as Dooeé' nguwa meetagaas, múk malguuse ta dah baraaká i ale nee kuri meetagaas.

²³ «Minyororo tleehheek, asma yaamu tsu/utaro naa hatsiyé', nee baraá gixsaro /ayta aa tláhh.

²⁴ Xoorór ló'wa tlaakw ngi huúw. Inooín maray'ín ki sawaawuti'ín. Daara/angw'ín u faák nee wa/aamer'ín tidá' hhohho' ka meetagaas.

²⁵ Qoomár slahh'amuú úr birna hardáh, wayda ngu leelehhiyá', ala ku slayká.

²⁶ Amotlakwe i baloó lakitká, muruú tlákw ti alkoomaakón hardahmuuwo. Iigu'utu ngun leelehhiyá' dír aaruuseero, kaahamuuse dabe ga xu'ká, hara'aya dír bariiseero i káhh.

²⁷ Waawutmo i tsuunqumiis, geeraharusmoó úr i diqay tsatamiit, nee muu iri daaraax daeero. Aníng adoodá' tlehhmi'ii'ín i dirii'iya' an dir'íní tleéhh, in sakwasleemuút adoodár múk hatlá' ngura sakwasleemuút. Aníng daqaní i tsaahhiyá' adór tar AAKOÓ MUNGÚ.»