ESEKIELI 6 - Biblía Axweesantá Hhohho' ar Mungú 2004

Lu'umis as munguaá hatlá' kiwa sluufmiisi

¹ Axweesantá AAKOÓ MUNGÚ ana axaás, i kat,

² «Heewí, warqáw amór tlom'aá yaamaá múk Israeli, kangw'eé' kwí tsiyayaxeek dír yaamuloouuser'ín,

³ ki beer, Axweesantá Aakoó MUNGÚ iiárií qaasaak, kuungá' yaamuloouusér hoot gawaá tlom'aá yaamaá Israeli. Anuú Aakoó MUNGÚ kuungaáká' gawaá tlom'aá hootá' nee gawaá dindirma', nee awa baraá yaamaá tawo, nee awa baraá xatso, aníng nu slaáhh, wa/amerhúng tidá' ta tlehhé' gawaá gongoama' as ilahhooár munguaá hatlá' ngiri hhitiím.

⁴ Kitangwdá' ta ilahhooár i hanmaamisi ku hhitín, nee kudá' ta mooyángw tsuú' i da/a/aanda' ku geqaaqáy. Múk taa tsuú/ u kwaáhh dír geeraá slaqsi'iidaá mungui.

⁵ Tuaá múk Israeli i hhaáf dír geeraá slaqsi'ii'ín kudá' munguaá hatlá', nee faduuín ngiri tsaafiís bihhaá kitangwdá' ta ilahhooár wa hanmaamisi.

⁶ Amór taqo i hotaá eera'a, gixsaduhúng ki muu waslen, nee wa/ameedár gawaá gongoama' ar munguaá hatlá' kiwa sluufmaamisá' an hhitiín, slaqsi'iidaá munguaá hatlá' ki giqáy kiri hhitín. Didá' ta mooyángw tsuú' i da/a/aanda' ka fee/, nee umuú gaaro kari hhaamiis.

⁷ Kudá' ta tsu/i ta huhu'ún baraá tla/angwhúng, kuungá' kari tsahhá' adór aníng tar AAKOÓ MUNGÚ.

⁸ «Tam adoorihe aníng panaay u geexáw, bahh'ale tsaxwa ngi /ayiyá', kuká' tari diya/aat baraá yaamaá dimbadimbé.

⁹ Amoodaádae aníng in inslayá' baraá tla/ángw xoorduudá' nay diya/ati'i. Ngiri inslayá' adoodá' ngira slaáhh, asma inooín nina inkihhimu wasleesiyé', niri warqayé', aníng harahhifooro iri mayé', niri warqayé' amór slaqasi'iidá munguaá hatlá', ngiri harahhifiyé'. Gawaá adoorihe inooín tari kilooín aahhiyá' asma tlakweemaín kudá' sleémeero naa tleehhiyé'.

¹⁰ Diirí an didaádá' ngiwa intsaatsahhiya' adór aníng tar AAKOÓ MUNGÚ, iga tawo naxwiiká, a ngiwa amotlakweérí huúw.»

¹¹ Aakoó MUNGÚ ina báy, «Tsa/i'i slahheek! Yaamu kala/eek tawa o', Tsaxwaahúng múk Israeli asma muruudá' tlákw taa tlehhahhité' sleémeero. Asma kuungá' a qatlá' ar paánga, nee qwari nee tiqtír pu/i.

¹² Heé saáw tiqtír pu/i gu gás, heé tseéw ku gaas ar paánga. Panmoó aa meet, oo taa geexáy kuká' tsár niwa qatliyé' un alhhe'eés ar qwari. Adoorí an adoodá' buhhtaeé' ngir boo/ees daanduuine.

¹³ Qoomár tu'uuín birka hhaáf didá' mungui ngi firór aa'aya' gawaá tlom'iiwo, gawaá umuúqo gongoamoowo, nee dír gamuú xa'anoó loo/o naa/e oo ti'ita, didá' ilahhooár mooyángw tsuú' ngiwa hanmamisiya', daqaní inooín aníng iri tsaahhiyá' adór tar AAKOÓ MUNGÚ.

¹⁴ Aníng dakw'eé' u tleés gawaaíní aleeró, nee yaamuuín i hhitiím ngiri taangu tleéhh, iimír amór xaanxoó bihhaá basa ay gixsár Ribla bihhaá /iiko, yaamuuín i taangu tleéhh as dír hota mingiwa slayé'. Inooín sleémeero ngiri tsaahhiyá' adór aníng tar AAKOÓ MUNGÚ.»