ESEKIELI 5 - Biblía Axweesantá Hhohho' ar Mungú 2004

Esekieli sagós nguwa deéqw

¹ AAKOÓ MUNGÚ iri báy, «Heewí, paángár afa xaraasl slaweek, ka sagók ar déqw adór deeqwár wa ale. Sagók nee daamoode deeqweek. Aluuwo gár se'eengw kur qoomeemes slaweek, ku qoomés, daqaní ku uf'e tám tléhh.

² Ala gixsár Yerusalemu barka hhe'eés harweeraro, ufuú wák oo se'eengók, baraá ufeedá' tame, da/eek baraá gixsár i alé. Ufuú hatlá' paángaro tlaaqeek, gixsa tir harwet. Ufuú tám kuduú alhhe'eesáy ku tsiyayaáx ar fur'a. Aníng paángar'eé' a aluú wa geeleéhh as nguwa diyaa/.

³ Se'éngw niiná ku tsék baraá paslmír hiyaywók.

⁴ Ala se'éngw niiná taataahheek ku kwáhh baraá asla, ngu /ak. Asma asla i yaamuuká wa ti'ít, múk Israeli sleémeero guri /ák.

⁵ «Anuú Aakoó MUNGÚ a kah, Aníng gixsár Yerusalemu a gixsár afhhamít tleéhh baraá yaamuwo, nee xoordaá hatlá' awa bihhe sleémeerowo ngiri slaiyá'.

⁶ Ala yaamuloouuser'ín hara'ayar'eé' nga si'iyé', tari ló'wa tlakúy ta xoorduuká' yaamuuká nga harweeri'i. Eeít, hara'ayar'eé' nga si'iyé', nee adoodá' aníng ngir gan'aamiis ngina geexayé'.

⁷ Gawaá adoorihe anuú Aakoó MUNGÚ a kah, Hám daxta asma kuungá' tundu sage gawdén ta xoorduuká' kuungá' na harweeri'i, nee sleeme aga hoti'iiká ar adoodá' hara'ayar'eé' i kat, tam sleeme adoodá' kuungá' naa báw aga oti'iiká, aqo tidá' xoordaá hatlá' kudá' kuungá' naa harweeriye' ana eehadé'.

⁸ Gimsé', anuú Aakoó MUNGÚ a kah, Aníng sakwasleemar'eé' a boo/eés dirhunge, dír geeraá xoordaá hatlae.

⁹ Asma gawaá daanduú tidá' kuungá' taa tlehhi'i, tidá' aníng iga buhhtís, nun sakwasleemuút ar sakwasleemár naa baloó tleehhiiká nee anqo baloó tleehhaaká male alé.

¹⁰ Baraadá kilá' gixsaro xwayliité na/ii'ín awa kilá' gi /ák, nee na/ii xwayliitér'ín ngi /ayiyá'. Sakwasleemar'eé' a boo/eés daanduuhunge, nee panaydá' aa meet nguri diyaá/ bihhe sleémeerowo.

¹¹ «Gawaá adoorihe, ar adoodá' anuú Aakoó MUNGÚ nir hotaatima, kuungá' diirír hotaaeé' aga meetagasé' ar muruudá' aníng ni sla'aaká, aníng kuungá' nun amór saáw i kwaáhh. Guruueé' i baloó tlayká, nee hee tumu wák oo ni meetiis i kaahh.

¹² Daqtá wák gawaá daqooroó tám oo baraá Yerusalemuro i qátl ar tiqtír pu/i nee qwari. Daqtá hatlá' ka tsuu/ baraá slaqwaraaro. Daqtá tám ar alhhe'eesáy a diyaá/ baraá daanduú yaamu sleémeero, nee ngiri hhaamiís ar paánga.

¹³ «Adoorí an adoodá' buhhtaeé' nir faakiya'. Aníng muner'eé' daqaní i tsauúr nee muunaáeé' iri qwalaa/. Diirihe kuungá' kari tsahhá' adór anuú AAKOÓ MUNGÚ, nura sakwasleemuút, asma aga buúhh ló'wa ale as kuungá' tawa inkihhimu waslesé'.

¹⁴ Slám malé alé kiíng gixsár Yerusalemu i adór panmo tleéhh, nee tari gár ta waaqaqai nee xoordu, kudá' iga harweeriye', nee dír ilaá mukdá' waraahha ar bihhiiwók.

¹⁵ «Kiíng tari gár waaqa'atiit, nee gár mureekeemiis, adór slaqsoó gár buhhtamis dír tlahh'i kudá' iga harweeriye', qoomár sakwasleemár buhhtaeé' kudá' xaraaslá' bara boo/eés daanduuwoge. Anuú AAKOÓ MUNGÚ tí ngina oó'.

¹⁶ Qoomaadae maheerieé' kudá' ngwatsayen awa qwari ngin tlaquút as iwa slaya', yaamuloouuseerók ngari hhaamisiyá'. In tsuú/ ar qwari, asma balangw'ín kudá' naa batsiyé' un hhitiím.

¹⁷ Aníng kiíng u qwárkwí huúw, nee makaá xaraaslá' kudá' na/iiwók ngi /ayá', nee tiqtír pu/i, tsu/uta nee slaqwara in hardát as iwa hhaamiis. Anuú AAKOÓ MUNGÚ tí aga oó'.»