ESEKIELI 48 - Biblía Axweesantá Hhohho' ar Mungú 2004

Adór yaamu kira tlahh'ií qasmiís

¹ «Gaarí an umér tlahh'aá Israeli nee yaamuudá' kay qasiís. Digmuú yaamu oo iimír bihhaá /iiko nina Hetiloni wa tláy ay ti'inángw gixsár Hamati, iri kumiít ay Hasar-enoni, tidár digmuú Damaskoro bihhaá /iikwí dirii', nee iri kumiít iimír bihhaá da/aáw wá tleemu ay bihhaá /uwa. Yaamuuká' a yaamaá tlahhoó Dani.

² Yaamaá digmuuwo ti hará' nee awa Dani bihhaá da/aáw ay bihhaá /uwa a yaamaá Asheri.

³ Tlahhoó Naftali yaamuuín dír kiwa sleera' a bihhaá yaamaá Asheri bihhaá da/aáw wá tleemu ay bihhaá /uwa.

⁴ Alaá yaamaá tlahhoó Naftaliwo, daqaní tlahhoó Manase yaamu ngi slay, iimír bihhaá da/aáw wá tleemu ay bihhaá /uwa.

⁵ Yaamuudá' ti hará' nee yaamaá Manase iimír bihhaá da/aáw wa tleemu ay bihhaá /uwa. Yaamuuká' awa tlahhoó Efraimu.

⁶ Yaamaá nee tlahhoó Efraimu digma, iimír bihhaá da/aáw ay bihhaá /uwa, yaamuuká' awa tlahhoó Reubeni.

⁷ Yaamaá nee yaamaá tlahhoó Reubeni ti hara' iimír bihhaá da/aáw ay bihhaá /uwa a yaamaá tlahhoó Yuda.»

Yaamaá taa tsawaár baraá tla/ángw yaamuwo

⁸ «Alaá yaamaá tlahhoó Yudawo yaamaá tlenaango kilomiíta mibaá nee tsár nee uroó bihheero kilomiíta mibaá nee tsár, ki qasisá' iimír bihhaá /iya ay basa, nee tlenaangw aqo adoodá' iimír bihhaá da/aáw wá tleemu ay bihhaá /uwa. Yaamuuká' i alqoná' nee yaamaá tlahh'i sleémeero. Dír hotaá AAKOÓ MUNGÚ ka tlehhá' tla/ángw yaamuuká'.

⁹ «Yaamaá taa dimbeé paraátl as AAKOÓ MUNGÚ tlenaangós a kilomiíta mibaá nee tsár nee tlaqi nee bihheerós a kilomiíta mibaangw.

¹⁰ Kaahamuusér Mungú yaamuuín ngi sleer baraá yaamuuká' wa ale. Yaamuuká' tlenangw'ín a kilomiíta mibaá nee tsár nee tlaqi iimír bihhaá da/aáw ay bihhaá /uwawo, kilomiíta kooán iimír bihhaá /iiko ay bihhaá basa. Dír hotaá AAKOÓ MUNGÚ ka tlehhá' tla/ángw yaamuuká'.

¹¹ Baraá yaamuuká' hhoohhooe kaahamuusér Mungú, tidár Sadoki, dir'ín ngi slaye', kudá' aníng iga sagadiyusiye' ar inkihhimu qoomár múk Iraeli iwa dee/anuút, adoodá' sleeme múk tlahhoó Laáwi aa tleéhh.

¹² Yaamuuká' an yaamuuín kudá' taa tsawaár dír yaamaá hhoohhooe, kudá' ak ló'wa hhoohhoo', kudá' nee yaamaá tlahhoó Laáwi taa hariye'.

¹³ Yaamaá Laáwi a yaamuudá' awa bihhaá basa, dír yaamaá kaahamuusér Munguhe. Tlenaango yaamuuká' a kilomiíta mibaá nee tsár nee tlaqi iimír bihhaá da/aáw wá tleemu ay bihhaá /uwa. Uroó bihheerós a kilomiíta kooán iimír bihhaá /iíkwá tleemu ay bihhaá basa.

¹⁴ Yaamu ki baloó weerisiiká nee ki qasisiiká tam dír hee gaalá, asma yaamuuká' an yaamaá hhoohhoo' nee awa AAKOÓ MUNGÚ, an yaamaá hhoo' ta ak yaamu sleémeero.

¹⁵ «Yaamuudá' taa tsawaár naa meetiye' tlenaango a kilomiíta mibaá nee tsár nee tlaqi nee uroó bihheero kilomiíta tsár nee tlaqi, yaamuuká' gadiyér alhotaari ar gixsa, nee yaamaá hota nee dír qamu. Baraá tla/ángw yaamuudae gixsa ka tleehhi.

¹⁶ Yaamuuká' masók bihheero i alqoná' umuú bihhiiwo a miíta kume tsár nee tsiire tsár nee mibeeri kooán.

¹⁷ Yaamaá gixsa ngaa harweeriye' awa intlaxweemawo miíta tsiiruú wák nee mibeeri tsár nee kooán meetisaak.

¹⁸ Yaamaá naa meetiye' alaá Doó Mungú tleehharo burkwa hhe'eés, bihhaá basa awa gixsaro tlenaangw kilomiíta tsár nee tlaqi, bihhaá da/aawe kilomiíta kooán, nee bihheero kilomiíta tsár nee tlaqi, nee bihhaá /uwawo, yaamuuká' awa dosluuse nee awa yaamuloouusér baraá gixsa.

¹⁹ Umuúqo heé baraá gixsár wa hoota tam oo tlahhay gaalá, yaamuudá' ki doosli.

²⁰ «Gawaá adoorihe yaamuudá' sleémeero taa tsawaár, didá' hhoohhoo' dinkwa nee yaamaá gixsa, bihheero sleémeero i alqón a kilomiíta mibaá nee tsár nee tlaqi umuú bihhiiwo.

²¹ «Yaamuudá' naa meetiye' bihhe sleémeerowo awa yaamuudá' hhoohhoo' nee kudaá gixsa, yaamuudá' sleémeero i alqoná', tlenaango a kilomiíta mibaá nee tsár nee tlaqi bihhe sleémeerowo, iimír bihhaá da/aáw wá tleemu ay /uwa. Yaamuudá' ti ga/aawá' nee yaamuudá' ta tlahh'ií qasiís a yaamaá geeraharusmo. Yaamuudá' hhoohhoo' handá' Doó Mungú i baraá tla/angwdá',

²² nee yaamaá tlahhoó Laáwi dinkwa nee yaamaá gixsa in baraá tla/ángw yaamuudaá geeraharusmo. Yaamaá geeraharusmo a digma nee yaamaá tlahhoó Yuda, nee awa tlahhoó Benyamini.»

Yaamaá tlahh'aá hatlá'

²³ «Tlahh'iidaá hatlá' naa meetiye' yaamuuín ki adoorí qasís. Tlahhoó Benyamini yaamu ngi slayá' iimír bihhaá da/aáw ay bihhaá /uwa.

²⁴ Ala yaamaá tlahhoó Benyamini a digma nee yaamaá tlahhoó Simeon, iimír bihhaá da/aáw ay bihhaá /uwa.

²⁵ Yaamaá tlahhoó Simeon a digma nee yaamaá Isakari iimír da/aáw wá tleemu ay /uwa.

²⁶ Yaamaá tlahhoó Isakari a digma nee yaamaá tlahhoó Sebuluni, iimír da/aáw wá tleemu ay /uwa.

²⁷ Yaamaá tlahhoó Sebuluni a digma nee yaamaá tlahhoó Gadi, iimír bihhaá da/aáw wá tleemu ay /uwa.

²⁸ «Dír yaamaá Gadi wa tleemu digma ina baskú xuú' ay yaamaá Tamari, iri kumiít ay kutltá Meriba-kadeshi, iri waaraáhh ar bihhaá da/aáw awa yaamaá Misri, iri ti'iít ay Tlawtá Tla/aangw.

²⁹ «Yaamuuká' an yaamaá tlahh'aá múk Israeli sleémeerowo. Baraakae yaamaá hotaaín ki sláy, umuú tlahhoó yaamuuine. Anuú Aakoó MUNGÚ tí aga oó'.»

Afér gixsár Yerusalemu

³⁰ «Gixsár Yerusalemu koo/ír gaa harwet i deer, nee koo/irí i afér dahamaá koón nee ar ti'inaango. Bihhaá /iiko koo/i a miíta kume tsár nee tsiire tsár nee mibeeri kooán. Bihhiiká' awa /iya,

³¹ afer'ín a tám, afkú doó Reubeni, nee afkú doó Yuda, nee afkú doó Laáwi.

³² Koo/ír bihhaá da/aáw tlenaango a miíta kume tsár nee tsiire tsár nee mibeeri kooán. Bihhiiká' afe ngi kona'a a tám, afkú doó Yosefu, nee afkú doó Benyamini, nee afkú doó Dani.

³³ Koo/irí bihhiikaá basko tlenaango a miíta kume tsár nee tsiire tsár nee mibeeri kooán. Bihhiiká' sleeme afer'ín aqo tám, afkú doó Simeon, nee afkú doó Isakari, nee afkú doó Sebuluni.

³⁴ Koo/ír bihhaá /uwa tlenaangós a miíta kume tsár nee tsiire tsár nee miberi kooán. Bihhiiká' sleeme afe ngi kona'a a tám, afkú doó Gadi, nee afkú doó Asheri, nee afkú doó Naftali.

³⁵ Tlenángw koo/irí sleémeero bihhe tsiyahhaawo a miíta kume gweleél. Umuú gixsa iimír hamí ku báy, ‹AAKOÓ MUNGÚ i diirí dirii'.› »