ESEKIELI 47 - Biblía Axweesantá Hhohho' ar Mungú 2004

Kutltá baraá doó Mungú wa wa/amiim

¹ Aluuwo heedaádá' iri male ki/ís ay dír afkú dahmaá Doó Mungú. Didár duxutmoowo ma'aay i bihhaá baráy wa/aminá' bihhaá da/aáw (asma afkú Doó Mungú in da/aáw ga/áy). Ma'aay i wa/aminá' bihhaá baskú wa ale, dír afkú Doó Munguhe, bihhaá basa awa kitangwduú ilahhooa.

² Naagáy iri tsee/í duúx ar afkú bihhaá /iya. Iri harweeritís ar loohír tsee/a ay afkú tsee/a bihhaá da/aáw wa ale, nee ma'aay i bihhaá baskú wa wa/aminá'.

³ Heedaádá' pa/almoowós kuduú qoomeemesuwo bihhaá baraay giri da/aáw wa qoomeés miíta tsiire kooán, iri waarahhaás ar baraá ma'aay, ma'aydá' a har guruú tsa/aá ya'aaeé' kilós.

⁴ Gari male qoomeés miíta tsiire kooán, iri geerahaár ma'aay ngiwa waaraahh. Ma'aydá' a har gurunge'eerieé'. Iri male kií/ qoomeesaro miítár hatlá' tsiire kooán, inós iri geerahaár as ma'aydá' ngiwa waaraahh. Naxés ma'aydá' a har afeetlo dir'eene.

⁵ Miítár tsiire kooán gari malé qoomeés, nee naxés yaae iri ló'wa tsal'i tleehhít, nee waarahhamuuwo ngiri harslaaqaát. Waarahhamuuwo i ya/aandaaká, aqo hara qumburu/umit.

⁶ Heedaádá' aníng iri báy, «Aá heewí! Muruuwí sleémeero taa aán harmagahheek ló'wa alé.» Naagáy iri ki/ís ay dír afaá yaae.

⁷ Niwa amoodá' i hardáh xaa'aá ló'wa yaariir ina ár i gawaá gangeefír yaae.

⁸ Iri báy, «Ma'ayká' in wa/aminá' baraaká guruú yaamu nginar ohiiyá' ay yaamaá Araba, nee birna hardihiyé' ma'aay tlawtá diwi ngi tsuu'usiyá'.

⁹ Dír qo yaaeerí ira oti, makaá yaariir nee siyohe i hootiyá'. Yaaeerí ma'aá tlawtá diwi gi tsuu'ús, nee dír irqo ota slafiingw ngu húp.

¹⁰ Múk siyoó ohiím ta sihhiit bihhaá tlawtí ale, nee iimír Engedi wa tleemu ay En-eglaimu a dír tay baratsufáy intlaahi. Siyoó yaariír oo daa'aweemaá dimbadimbé adór kuquú tlawtá Mediteranea iri baraadá' wa haats.

¹¹ Ala wa/angwdá' oo niíts nee tlahhesoowo awa bihhaá tlawi, ma'aá tsuuá' ngi slay'aaká, ala ma'ay'ín in meetiyá' tawa ma'aá diwi.

¹² Naagáy dír bihhér yaaeerihe xaa'aá /aymár wa hariimá' ni ti'iitiyá'. Loo/or'ín i baloó katká, laqaá mamu laqwaliingo ngi may'aaká. Mamaá /aben umuú slahhaango ngin laqwaliná', asma ma'aydá' amór Doó Mungú wa wa/amimá' gin slaslayá'. Mamuuín a muruú /ayma nee loo/or'ín a maasoó tiqti hungu/uumis.»

Digeemaá yaamu

¹³ Aakoó MUNGÚ i kaahi, «Gaarí an digeemaá yaamuudá' ta qasisa' dír tlahhi'iidá' mibaá nee tsár awa Israeli. Ala tlahhoó Yosefu yaamuwo ku qay sagaá wa tsár wa ale.

¹⁴ Yaamu sleémeero qasisaro alqoomesaak, aníng aga tsabiím yaamuuká' ngiwa xwaylarhúng i haniis as tawa aalirhúng.

¹⁵ «Bihhaá /iiko digmuuhúng dír iwa iimu/ún a dír Tlawtá Tla/aangw amór gixsár Het-loni xu'useek ay dír loohidár Hamatiri dahmuú aw nee iri kumiit ay Sedadi.

¹⁶ Didae iri kumiit ay Berota nee Sibraimu, tidár digmuú tla/ángw Damasko, nee Hamati, ay gixsár Haser-hatikoni, tidár dír digmuú Haurani.

¹⁷ Gawaá adoorihe digma iri kumiit ay dír Tlawtá Tla/aangw, iri kumiit ay bihhaá da/aáw, ay gixsár Hasar-enoni, tidá' ti hará' nee yaamaá Damasko, nee Hamati bihhaá /iiko.

¹⁸ «Bihhaá da/aawe digma a dír yaaér Yordani, iri kumiit ay tla/ángw Haurani nee Damasko ay Gileadi yaamaá Israeli. Sleeme digma iri waaraáhh bihhaá da/aáw awa Tlawtá Diwi ay yaamaá Tamari.

¹⁹ «Bihhaá basko iimír Tamari wa tleemu digma iri kumiít ay kutltá Meriba-kadeshi. Imiír Meriba-kadeshiro digma iri waaraáhh ar bihhaá da/aáw awa yaamaá Misri, iri kumiit baskwá al/uwá ay Tlawtá Tla/aangw.

²⁰ «Bihhaá /uwaawo digma a Tlawtá Tla/aangw iri tsa/án bihhaá /iya, ay dír dahmaá yaamaá Hamati.

²¹ «Gawaá adoorihe yaamuuká' kuungá' ki qasmisá' ar harqoomoó tlahh'aá Israeli.

²² Yaamuuká' in qasmisá' as tawa yaamuuhúng. Hoomaadá' baraá tla/angwhúng hoot nee ar aa laqwal baraá yaamuuhúng wa ale, ki yaamuú i qasisá', qoomár bar yaamaá qasmisá'. Mukwí i harín kuwa adór múk Israeli ar qoomeesi, nee i hariná' yaamu ngiwa tsawdoórí tleehhiya' dinkwa nee múk Israeli.

²³ Umuú hoomoowo, kudá' nee kuungá' alhootá', dir'ín ka qasisá' dinkwa nee tlahh'aá nee inooín alhootá'. Anuú Aakoó MUNGÚ tí aga oó'.»