ESEKIELI 46 - Biblía Axweesantá Hhohho' ar Mungú 2004

Geeraharusmo nee deelór ur

¹ «Anuú Aakoó MUNGÚ a kah, Afkú do', kuduú afeenír baraá guruú do', kuduú bihhaá da/aáw, ku tseegi deelo lahhoó' tidár gadiyeede. Deelór Sabaáto nee deelór slahhángw /abén birna ti'iít ku gweeri.

² Geeraharusmo bir tsee/aá daahh in dah ar afkú matla/aangw. Inós iri sihhiit dír uhmoó dír afkú do', qoomár kaahamuuse bir ilahhooár hanmís ar da/a nee ar wayda. Naagáy geeraharusmoodá' iri tumbarara'aat, giti gari yaamúr oh, dír afkú do', aluuwo iri tsee/aá i ti'iit. Afkú do' kuri gweeramoórí máy ay tsiindo.

³ Umuú deelór Sabaátooro nee bál slahhángw /abén birna ti'iít, muu sleémeero anuú AAKOÓ MUNGÚ in sluufmiis dír geeraá afkú do' wa ale.

⁴ Bál deelór Sabaátooro geeraharusmo deeloó bee/aangw oo lahhoó' nee gwaanduú wák sleémeero awa xaslxaansli wasl ngin huuw amór AAKOÓ MUNGÚ as kiwa adoodá' alda/i ilahhooár wa ale.

⁵ Dinkwa nee gwaanda inós ilahhooár puuruú kílo mibaá nee faanqw nee tlaqi ngiri huuw, ala dinkwa nee deelmoó bee/iro ilahhooár inós i aleeslay ngi huwi nee dír umuú ilahhooadár puuruhe inós liíta tám ar di/i ngi huwi.

⁶ Qoomár slahhángw /abene inós awu batlitamo ngu haniisi, nee deeloó bee/aangw oo lahhoó', nee gwaanduú wák, sleémeero ki xaslxaansli wasl.

⁷ Dinkwa nee umuú awuuwo nee umuúqo gwaanduwo kudá' ta ilahhooár wa haniisi, i hariín tawa nee kílo mibaá nee faanqw nee tlaqi ar puurú, geeraharusmo ilahhooadá' i slai ngi umuúqo deelmoó bee/ír alhaniisi, slám umuú ilahhooár balaango i hariín kawa liíta tám alhaniisi ar di/i.

⁸ A hariima geeraharusmo iwa ti'iiti ar loohidá' ira dáh.

⁹ «Muu birna AAKOÓ MUNGÚ sluufmisuú áy qoomár deelór urene, mukdá' naa dah ar afkú do' oo bihhaá /iya, i ti'iiti ar afkú bihhaá basa, nee kudá' naa dahiye' ar afkú bihhaá basa ni ti'iitiye' ar afkú bihhaá /iya. Hee miwa kií/ ar afkudá' nira dáh, ala aqo in ti'iit ar afkudá' amór geeraawós i dirií'.

¹⁰ Geeraharusmo nee muu tan aldah nee tan alti'iit nee muu sleeme.

¹¹ Qoomár deelór ure nee deeloodá' taa qaás as firo, ilahhooár balaangw a kílo mibaá nee faanqw tin alkoná' nee umuú awuuwo laqaá gwaanda, nee heé naa sluufmisuú ay tidá' haniisaro i aleeslaya' dinkwa nee umuúqo deelmoó bee/iro. Umuú ilahhooár balaango i hariín kawa liíta tám alhaniisi ar di/i.

¹² «Geeraharusmo bir ilahhooarós tidár muunuú /awaák haniisár wa slaa' dír AAKOÓ MUNGÚ laqaá ilahhooár da/a/aangw, laqaá ar wayda, afkú da/aáw oo matla/ángw guruú baraá do', ku gweeri. Ilahhooarós ngi haniisi adór deelór Sabaátoro ta /iamamisi, nee qoomár bir ti'imiit afkú do' ku aluuwós wa tseegi.»

Ilahhooár umuú baala

¹³ «Umuú matlaatleero deelmoó bee/i oo xaslxaansli wásl oo kurkú wák un ilahhooár da/tá wa hanisá' dír AAKOÓ MUNGÚ, kuwa adoodá' alda/i.

¹⁴ Umuúqo matlaatleero ilahhooár kílo tsár ar puurú ka haniisi, dinkwa nee liítár wák ar di/tá seituúni, tidá' taa aleedoók nee puurú. Dabeerí eeharto i ló'wa hariín, ar ilahhooa kawa hanmiisi dír AAKOÓ MUNGÚ umuú daqto.

¹⁵ Umuú daqi matlaatleero deelmoó bee/i, nee puurú, nee di/i makawa máy hanisaro dír AAKOÓ MUNGÚ, ay alhhe'eesay wasle.»

Geeraharusmo nee yaamu

¹⁶ «Anuú Aakoó MUNGÚ a kah, Barnaxes geeraharusmo garmaawós gwaa qáy yaamuwo, yaamuuká' kura qáy a aalír garmaawí ay kureeraá kureér, yaamuuká' tay aalír mukós.

¹⁷ Ala barnaxes lawaalmoowós gwaa qáy yaamuuwose, yaamuuká' a kós, ay bál inós kway gweeri. Daqaní geeraharusmo yaamuuká giri i kii/. A inós kilós nee na/iiwós awa daaqaay yaamuuká' ngi sa aaliná' daqisleeme.

¹⁸ Geeraharusmo tam ado gaalá yaamaá hee mingiwa hayóh. Yaamuudá' i na/iiwós ar qaaqay masók aqo yaamuuwós awa kilá'. Gawaá adoorihe inós muk'eé' gu /aytinká as yaamuuín ngiwa hayoohi.»

Dír huuriingw ar doó Mungú

¹⁹ Naagáy heedaádá' aníng iri waarahhaás ar loohidá' aa dat baraá kutuwaydá' hhohhó' oo kaahamuusér Mungú i hot, kudá' afe /iya isaapoó afkú bihhaá basa oo matla/angwduú baraá guruú do'. Dirka ngiri laqán bihhaá /uwa awa kutuwaydá'.

²⁰ Iri báy, «Diirí an didá' kaahamuusér Mungú fu'unaydá' taa ilahhooár wa haniís ar dakuús fiitsa ngiwa humaamina', ilahhooár tlakweema hingeesa nee didá' ilahhooár balaangw. Inooín gár ta tsee/ií ar ti'iiti i káhh baraá matla/aangwihe, as muu mukuwa hhoohhooeés.»

²¹ Naagáy iri huúw dír afeenír tsee/a, iri waarahhaás dír ku/iyaá tsiyáhh awa afeena. Dír umuú ku/uuwo afeenír niina i deer.

²² Ku/uyaadá' tsiyahhaawo i afeenár ninakw koná', umuú afeeniro tlenaangós a miíta mibeeri tsár, nee uroó bihheero a miíta mibaá nee kooán.

²³ Umuú afeeniro kaa harweér nee koo/ír tlaa/e, nee baraá guruudae akweeso kina hhay tleéhh.

²⁴ Heedaádá' iri báy, «Gaarí an akweeso awa sagadiyuusér Doó Mungú, ilahhooadár muruú ta tsu/i ar muu ni huwaahuwi kan gawaaká' wa humín.»