ESEKIELI 45 - Biblía Axweesantá Hhohho' ar Mungú 2004

Yaamaá hhoohhoo' awa bihhaá doó Mungú

¹ Qoomár bar yaamaá qasimisá' ar tsawdo, as umuú tlahhaywo dirós ngiwa slay, dír wák baraá yaamuwo masók aqo in mét as AAKOÓ MUNGÚ. Tlenaangós a kilomiíta mibaá nee tsár nee tlaqi, nee bihheerós kilomiíta mibaangw. Daqaní yaamuuká' sleémeero ki hhoohhoo'.

² Baraá guruú yaamuudae yaamaá alqoomá' i dayá', daqaní awa dír hhoohhoo', umuú bihheero a miíta tsiire tsár nee mibeeri kooán, nee kari harweér nee yaamaá uroó bihheero miíta tsiire tsár nee mibeeri kooán.

³ Nee sleeme baraá yaamuukae yaamaá tlenaango kilomiíta mibaá nee tsár nee tlaqi ki qoomés, bihhe kilomiíta kooán, diirí an didár hotaaeé' didá' ló'wa hhoohhoo'.

⁴ Yaamuuká' awa diirí an yaamaá hhoohhoo' dír ayahunge, nee yaamaá taa paraátl as kaahamuusér Mungú, tidá' AAKOÓ MUNGÚ sagadiyuus didár hotaawós wa ale. Baraakae inooín maray'ín ki tleehhi, nee a dír dooeé' sleeme.

⁵ Dír hatlá' baraá yaamuuhunge ka paraatl ar kilomiíta mibaá nee tsár nee tlaqi tlenaango, nee bihheero kilomiíta kooán, as tawa gixsár tlahhoó Laáwi, kudá' gadiyuús baraá Doó Mungú wa aleeró as tawa dír hotaaín.

⁶ «Gixsadá' tseew dír yaamuudá' hhoohhoo', kudá' tlenaango kilomiíta mibaá nee tsár nee tlaqi, nee bihheero kilomiíta tsár nee tlaqi, ki qoomesá', daqaní yaamuuká' heé gi slaá' oo Israeli ti hanise'.»

Dír geeraharusmo

⁷ «Geeraharusmo yaamuuwós slawaak bihhaá da/aáw wa ale, nee bihhaá /uwa awa yaamuudá' taa paraátl as AAKOÓ MUNGÚ. Yaamuuká' harki/isay'ín ay afaá Tlawtá Tla/aangw, nee bihhaá da/aawe ay alhhe'eesoó yaamu. Yaamuuká' uraywós masók i alqoná' nee yaamuudá' taa umuú tlahháy haniís oo múk Israeli.

⁸ Gaarí an dír aalír geeraharusmoó Israeli. Gawaá adoorihe geeraharusmo muk'eé' gu /aytárí tleehhiiká, ala masók inós muu aqo gu máy kuwa yaamií qasiisi adoodá' xoorór Israeli kawa hariím.»

Gadiyér geeraharusmo

⁹ «Anuú Aakoó MUNGÚ a kah, Kuungaá geeraharuusér Israeli, kuungá' tlakweemaá yaariir iga ló'wa tlehhé'! Muruú tlákw mawaak nee /ayta ma tlehhitara'! Muruú ganaá' nee oo hariím tlehhitaak. Muk'eé' mu gusisimaara' baraá yaamuuine. Anuú Aakoó MUNGÚ tí aga oó'.

¹⁰ «Umuú heewo qoomoó ganaá' nee oo hariím ngur gadiyuusi.

¹¹ «Qoomoó qoóm oo eéfár balaangw nee besénír di/i i alqoná'. Gawaá adoorihe xooslaarí i dat wai mibaangw baraá xooslmoowí ta bay homeéri.

¹² «Bar muruú iiló' qoomeemesá' xooslmoodá' ta bay geéra mibeeri tsár i qoná' nee shekeélír wák nee shekeélír mibeeri kooán i qoná' nee xooslmoodá' ta bay miína wák.

¹³ «Qoomoó qoóm oo hanmisuú ilahhooarhúng a kwí: Baraá hoomeérír wake eéfa i dat lahhoó'. Baraá eéfár lahhooe ar angaáno, eéfár wák an hanmisá', nee eefár wák baraá lahhooe ar angaánoó shayiíri, eéfár wák an hanmisá'.

¹⁴ Qoomoó di/i a kwí: Baáthír wák ar di/i baraá baáthír mibaango an hanmisá'. (Koórír wák i qoná' nee hoomeérír wák. Nee i alqoná' nee baáthi mibaangw.)

¹⁵ Bee/ír wák kan haniis dír umuú daqtá bee/ángw tsiire tsare dír múk Israeliwo. Ilahhooár balaangw barka huúw, ilahhooár da/a nee ar wayda as haraki/isa kawa tleehhi. Anuú Aakoó MUNGÚ tí aga oó'.

¹⁶ «Muu sleémeero oo yaamaá Israeli ilahhooar'ín ngi haniisiye' dír geeraharusmoó Israeli.

¹⁷ A gadiyér geeraharusmoó ilahhooár da/a ngiwa slay, nee ilahhooár balaangw, nee ilahhooár wahaangw ar ta hanmiisi qoomár deelór ur bál slahhaangw birna ti'iít, nee deelór Sabaáto, nee deelór uren sleémeero ar taa qaás baraá múk Israeliwo. Geeraharusmo ilahhooár tlakweema hingeesa gan amohhe'ees, nee ilahhooár balaangw, nee ilahhooár da/a, nee ilahhooár wayda as haraki/isa kawa tleehhi dír múk Israeliwo.»

Deelór ur

¹⁸ «Anuú Aakoó MUNGÚ a kah, Bál slahhángw geera tawa wak awuú xaslxaansli wásl gaasaak as didár hotaaeé' kawa hhohhoeesa'.

¹⁹ Kaahamusmo tseerér ilahhooa gan bahh taataahh, nahhtá Doó Mungú gari sliik nee kankeemoodá' tsiyáhh awa kitángw ilahhooa, nee nahhtá afkú tar daraahi baraá afeenadár baraá guruú do'.

²⁰ Adoorí gan male tleehh bál faanqw ar slahhaangwihe as daanduú heé tlakweema gaa tleehh as xuaawasle, laqaá as fahhari. Daqaní Doó Mungú ku haraki/isárí tlehhá'.

²¹ «Bál slahhángw geera bar mibaá nee tsiyáhh deelór ur ar Pasaáka ka tlehhá'. Ar afiqoomoó deelo faanqw mikaátér taa sluuftisiiká ka /agá'.

²² Baalaarihe geeraharusmo awu wák gu ilahhooár wa haniis as tlakweemaawós nee as tlakweemaá muu sleémeero oo Israeli.

²³ Umuúqo baalaaro baraá deeloorí faanqwe inós awe faanqw ar batláy gari ilahhooár da/tá wa haniis dír AAKOÓ MUNGÚ, nee gwaandaawér faanqw ar xaslxaansli wasl, kin adoodá' aldaa/. Slamí gurta gun ilahhooár wa haniis umuú baalaaro as tlakweema hingeesa.

²⁴ Naagáy ilahhooár puurú ar kílo mibaangw gay haniis as umuúqo awu, nee kílo mibaangw as umuúqo gwaanduuwo nee liíta tám ar di/i as umuúqo kílo mibaangw ar puurú.

²⁵ «Bál slahhángw faanqw bar mibaá nee kooán deeloodá' ur, geeraharusmo muruú ilahhooa gu haniis as ilahhooár tlakweema hingeesa, nee ilahhooár da/a, nee ilahhooár balaangw nee ilahhooár di/i.»