ESEKIELI 44 - Biblía Axweesantá Hhohho' ar Mungú 2004

Gadiyér afkú bihhaá da/aáw

¹ Heedaádá' aníng iri ki/ís dír afkuduú tsee/a, kuduú bihhaá da/aáw, guruú tsee/a didá' hhoohhooe, nee afkudá' kwa tseék.

² AAKOÓ MUNGÚ aníng iri báy, «Afkusíng mukuwa baloó gweér. Hee tumu wák miwa diisíng ar dáh, asma anuú AAKOÓ MUNGÚ, Munguú Israeli, ana dáh ar afkusíng. Gawaá adoorihe mukuwa baloó gweér.

³ Tam adoorihe, geeraharusmo kilós amoodá' keemuuwo gan aleesláy nee muruú /aymaadá' hhohhó' guri /aay geeraaeé' wa alé. Inós aqo in dah iri ti'iit ar afkuduú kilá'.»

Harimadaá baraá doó Mungú

⁴ Aníng iri huúw dír geeraá Doó Mungú ar loohír bihhaá /iya. Niwa qaytsiít xirfuú AAKOÓ MUNGÚ una ár, Doó AAKOÓ MUNGÚ gwaa hatsiís. Aníng niri tumbarara'aát, giti ngiri yaamúr óh.

⁵ AAKOÓ MUNGÚ aníng iri báy, «Aá heewí, muruuwí ta ara'aan, nee ta axamis, kángw kilá' wa harmagahheek baraá muunaáwoge. Dabér Doó AAKOÓ MUNGÚ ngi oó', ló'wa iiárií qaaseek, a muu gaalá oo dáh nee oo ti'iít baraá Doó Mungú, nee a muu gaalá oo dahamaawo ta ya/a/anká?

⁶ «Mukuú Israeli aa dee/anuut kaangwí ti beer, anuú Aakoó MUNGÚ a kah, ‹Muruudá' sleémeero kuungá' ta tlehhita' aníng saqitluuwo u aleeslawaaká.

⁷ Dír hotaeé' aga meetagasé', as múk taa hhehhe'eesiiká iwa didií daráh, múk aníng i ilaiwawa/aaká, qoomár di/i nee tseere birki dir'eénií hanmiis. Gawaá adoorihe, muk'eé', kuungá' alqador'eé' aga geexeeré', ar muruuhúng kudá' aníng ni ahhiit kuungá' taa tlehhité'.

⁸ Kitángw geera kuungá' gadiyér'eé' tidá' hhohho' kawa tlehha', múk xoordaá hatlá' gadiyeédá' gana tleéhh didár hotaaeé' wa ale.›

⁹ «Gawaá adoorihe, anuú Aakoó MUNGÚ a kah, hee tumu wák oo ta pa/ángw dahmá i haniisi i kaahh tam oo xooro gaalá, oo taa hheehhe'eesiiká slaqwto laqaá muunahe, laqaá oo aníng i ilaiwawa/aaká, oo taa ya/aámár dahmií haniisi i kaahh ar didá' hhoohhoo', tam hoomaadá' ayaahúng hoot sleeme.»

Múk Laáwi ku hingeemiis

¹⁰ «Ala múk Laáwi aníng iga geexáy, qoomár múk Israeli tiwa paraátl dir'eene as munguaá hatlá' ngiwa eehariyé', aníng múk Laáwi u muúx.

¹¹ Inooín gadiyeé ngin tleehhiyá' didár hotaaeé' wa alé, adór sagadiyuusér afér maraá dooeé' xuum, nee tawa gadiyuusi baraá dooeé' wa ale, nee hikwaadá' muu naa ilahhooár da/tá wa huwahuúw nee awa ilahhooár muruú ta tsu/i as ngiwa tsu/iya'.

¹² Asma inooín múk Israeli nguwa geerahariyé' firór munguaá hatlae, nee muu nguri tlakweemár ayé', aníng dakw'eé' ugwa gáwtí tleés as ngiwa muux. Anuú Aakoó MUNGÚ tí aga oó'. Inooín muxtar'ín ngi slayá'.

¹³ Inooín i male i tseewuy'aaká as iwa sagadiyusiya' adór kaahamuuse, laqaá xooslar'eé' tidá' hhohho' ngi malé kwatimitiaaká, laqaá tidá' ak ló'wa hhohho'. Ala inooín ki mureekees nee tlehhmi'ii'ín kudá' slasla/aren naa tlehhiitiyé'.

¹⁴ Tam adoorihe inooín baalaqasidár xuumár dooeé' ngi oohiyá', nee gadiyeé sleémeero ar ta didá' wa tleehhi, inooín sleeme ngi tleehhiyá'.»

Kaahamuusér Mungú

¹⁵ «Ala kaahamuusér Mungú ar tlahhoó Laáwi, kudaá xwaylár Sadoki, kudá' gadiyeé nga alkone' dir'eé' tidá' hhoohhooe, qoomár múk Israeli aníng iwa geexáy, kuká' an kudá' aníng i sagadiyusá' nee geeraaeé' hardáh as di/i nee tseere ngiwa haniisiya'. Anuú Aakoó MUNGÚ tí aga oó'.

¹⁶ Kuká' kilooín an kudá' dahá' didár hotaaeé', inooín nin tseewuyá' dír kitangwduú ilahhooa as iwa sagadiyuusiya'.

¹⁷ Ala barnaxes ta darah baraá afeenidár guruú baraá do', tlabaá hhohho' awa neewór kitaáni ki tsiit, ala tlabaá se'éngw bee/aangw mikiwa tsiít qoomár bir gadiyusiyá' dír afeenidár guruú do' nee baraá do'o.

¹⁸ Warqamaá neewór kitaáni ngi tsegitiyá' gawaá sager'ín, nee surwaánaay ngun dahaasiyá', ala hima ku tseegiiká.

¹⁹ Qoomár inooín birna ti'itiyé' amór afeenír tsee/a amór muu, tlabaaín kudá' naa dahaasiyé' qoomár tawa gadiyuusi, ki duuxi nee kiri baats baraá kutuwaydá' hhohhó'. Tlabaadá' aqo ngin warqeesiyá' nee awa hatlá' aqo ngi dahaasiyá' as muu mukuwa hhoohhooeés ar tlabaaín kudá', qoomár birti kwatimitiyá'.

²⁰ «Sager'ín ngi baloó deqwiaaká, laqaá se'engw'ín ngu tlenaángwí may'aaká, ala se'engw'ín aqo ngu tawo /aaresiyá'.

²¹ Kaahamusmoó Mungú difaái mingiwa wáh, qoomár bir dah dír afeenidár baraá guruú do'.

²² Kaahamusmoó Mungú /ameenír kwaalo'o mingiwa duúx, laqaá tam /ameenír taa talaákaárí haniís, ala inós masók aqo dasír nee hhawaata naa baloó alqati'iiká ar múk Israeli, laqaá /ameenír hhawaatuuwós kaahamusmoó Mungú, hhawaatuuwós kuú kaahamusmo bira gwaá' ngi duuxi.

²³ «Kaahamuuse xooror'eé' gan intsaahhatís as gár hhoo' nee ar tlaakwe ngiwa tsaahhiya', nee muu kuwa xu'utisi gadaádá' gi meetagaamiis nee tidá' gi meetagamisaakahe.

²⁴ Barnaxes gila i dayá', inooín kin har'oh ar adór daber'eé'. Inooín hara'ayar'eé' nee kaahir'eene ngi amohhe'eesiyá' ar deeloodá' urén sleémeero ngiwa harmagaahhiyá' nee Sabaátor'eé' kawa hhoohhoeesi.

²⁵ «Inooín tuua ngi kwatitiaaká as mitiwa meetagaasiyé', ala inooín ti meetagaasiyá' barnaxes tuua ar baabá laqaá ar aayo, laqaá ar na/oó dasi laqaá oo garma, laqaá hhiya', laqaá hho'o tidá' taa duuxiiká.

²⁶ Inós barnaxes kwaa meetagaás, aqo in adoorí wa hoot deelo faanqwe. Alaá deeloorí faanqwe meetaawós naa faakiyé'.

²⁷ Bál bir dah didá' hhoohhoo' ar afeenír baraá guruú do' as iwa didá' hhoohhoó' wa gadiyuusi, ilahhooár tlakweés hingeesa ngi haniisi as inós. Anuú Aakoó MUNGÚ tí aga oó'.

²⁸ «Kaahamuusér Mungú aalír yaamu a gar'ineeká, inooín gár iwa harina' aqo aníng in sagadiyuusiyá' kilós, mi yaamií haniisara' awa i aaliya' baraá yaamaá Israeliro, asma aníng an aalir'ín.

²⁹ Inooín ilahhooár balaangw ngi /ayá', nee ilahhooár tlakweema hingeesa, nee ilahhooár dakuús fiitsa sleeme. Umuú gár baraá yaamaá Israeli ar taa paraátl as Mungú a tooín.

³⁰ Mura' sleémeero kudá' slaqo hhó' oo baris, nee bu'ungwhúng oo geera, nee umuúqo gár ta ilahhooár wa hanisa' dir'eé' ar kaahamuusér Mungú. Slamí male ale dír tara huuríngw eeri'iiká, puuruú har geera ku hanisá' dír kaahamuusér Mungú, as aníng marayhúng ngiwa tsuuq.

³¹ Kaahamuusér Mungú fu'unaá gár aa kilós gwa' ngi /ayiaaká, laqaá tsir/ír aa kilós gwa', laqaá gu/umoó makiito'ór sla/a.»