ESEKIELI 43 - Biblía Axweesantá Hhohho' ar Mungú 2004

AAKOÓ MUNGÚ aa kií/ baraá do'ós

¹ Naagáy heedaádá' aníng iri huúw bihhaá afkudaá da/aá xuu'.

² Ga/aawaak, xirfuú Munguú múk Israeli niri da/aáw wa hardáh, afoorós adór kududuhoó úr oo xuraaír ma'aá yaariir, yaamu niri gwa/aatiyé' xirfuuwose.

³ Iigu'utuuwí a adór iigu'utudá' naa ár qoomár Mungú gixsár Yerusalemu ngiwa hhaamiisár áy. Nee sleeme a slaqmís nee iigu'utuudá' naa ár bihhaá yaaér Kebarír wa alé. Tidá' niwa huú' niri gurúr qaát yaamií ale.

⁴ Xirfuú AAKOÓ MUNGÚ iri dáh baraá Doó Mungú ar afkú bihhaá da/aáw.

⁵ Qeeru iri ar tláy iri huúw ay dír afeenidár guruú baraá do'. Aníng niri qaytsiít, naxés Doó Mungú xirfuuwós gwa tuuntuúk.

⁶ Qoomár heedaádá' iwa bihhaaeé' wa sihhmiiti, afór AAKOÓ MUNGÚ ana axaás i baraá Do'ós wa axwés.

⁷ Inós iri báy, «Heewí, diirí an didár kitangw'eé' oo waawuti'iima, an dír tsa/aá ya'aaeé' ngay qamaamiim. An hoót baraá tla/ángw múk Israeli wa ale ay alhhe'eesay wasle. Nee múk Israeli aníng i meetagaasiaaká, inooín awa kilá', laqaá waawitaáín, as slaqsi'iidaá munguaá hatlá' ngiwa haratlintatii'iya', laqaá waawitaáín kudaá qaatl kuwa inslaslay.

⁸ Waawitaaín ina tleehhiít, nahhtaín ngina tleehhiyé' bihhaá nahhtaeé', nee duxutamaaín bihhaá duxutmooeé', nee maandaduuín bihhaá maandar'eé', aníng nee inooín gár taa paratl a har koo/i kilós. Gawaá adoorihe aníng iri meetagaasiyé' ar muruuín kudá' slasla/arén naa tlehhiitiyé'. Aníng niri buúhh, ngiri hhaamiís.

⁹ Hám daxta slaqsi'iidá' ngi maye' sluufmisuuwo, nee waawitaáín kudaá qaatl ngu amór saáwí gunqareesiye' dir'eene, daqaní aníng a hoót dinkwa nee inooín kureerisleém.

¹⁰ «Heewí, hám daxta, múk Israeli kángw Doó Mungú ti beer, nee adoodá' kura tleéhh ngi intsaatsahhiye'. Ki mureekeesi nee tlakweemaaín.

¹¹ Bar mure ngaa ariyé' gawaá daanduú tidá' inooín naa tleehhiyé', daqaní ki ádbeér adoodá' Doó Mungú kura tleéhh, afér dahama nee ar ti'inaango, nee adoodá' kura tleéhh, nee adoodá' umuú gaaro kara qoomeés, dabeerós nee kaahirose. Tí sleémeero ka gooiín as kahhó' inooín dabeerós nee kaahirós sleémeero ngiwa eehariya' nee ngiwa iialooeesiya'.

¹² Ga/aaweek, dabér AAKOÓ MUNGÚ adór i diri' a adoorí: Yaamuudá' sleémeero Doó Mungú ngwa harweeriye' gawaá sagér tlom'i masók a yaamaá ló'wa hhoohhoo'. Adoorí an adór dabér Doó Mungú i diri'.»

Kitángw ilahhooa

¹³ «Qoomoó kitángw ilahhooa hanmis aqo adór qoomoó Doó Mungú. Harweermór kitángw ilahhooa i mapeeraá koón, mapeeroodá' tlenángw baraywo a sentimiíta mibeeri kooán, nee uroó bihhe a sentimiíta mibeeri kooán nee uroó afayduuwós a sentimiíta mibeeri tsár nee kooán.

¹⁴ Bihhaá baraay awa kitaangw iimír iihhafiiri kingiwa baráy wa tleés ay alhhe'eesoó iihhafiiri a miíta wak. Harweermór hatlá' kana aluudá' wa tleéhh dír gangeefidár geeraá wa ale, harweeramoorós a sentimiíta mibeeri kooán.

¹⁵ Bihhaá gáwtí diriiá' awa kitaangw, kudá' taa ilahhooár da/aa/an i alqoná' bihhe sleémeero, umuú bihhiiwo a miíta tsár. Kankemaá tsiyáhh kaa alge tleés gáwtí ale ta ak amór hatlae.

¹⁶ Bihhaá gawa awa kitangwduú ilahhooa i alqoná' umuú bihhiiwo miíta lahhoó'.

¹⁷ Didár tla/aangw i alqoná', a miíta faanqw umuú bihhiiwo, inós sleeme gangeefirós tlenaango a sentimiíta mibeeri tsár nee kooán, bihhaá da/aawe sleeme maparír sentimiíta mibeeri kooán bihhiiwo i deer. Tsa/aa/amto i deer ar tar tsa/a/an amór kitángw ilahhooa.»

Kitángw ilahhooa kuwa paraátl

¹⁸ AAKOÓ MUNGÚ ina báy, «Aá heewí, anuú Aakoó MUNGÚ a kah, Qoomár kitángw ilahhooa hanmis burkwa tleéhh, ku parátl ar ilahhooár da/a kawa gawaá daanduuwós i da/, nee tseerér makaá taa ilahhooár wa hanmiís kawa tsiririxis gawaadá' i ale.

¹⁹ Daqaní ku hanís dír kaahamuuseedár tlahhoó Laáwi, kudá' awa xwaylár Sadoki, inooín kilooín aníng i haratseewuye', as iwa sagadiyusiya'. Anuú Aakoó MUNGÚ tí aga oó'. Tsa/tamoó niiná oo awu ti sleer as tawa ilahhooár tlakweema hingeesa.

²⁰ Tseere ka qás gawaá kankemoodá' tsiyáhh awa kitangwduú ilahhooa, nee gawaá gangeefaydá' aa harweerin. Adoorí an adoodá' kitángw ilahhooa kur paratl, as kuwa haraki/isárí tlehh.

²¹ Awu ku ilahhooár tlakweema hingeesár wa hanís. Inós ku da/i didá' taa tsawaár baraá Doó Munguhe, didá' hhoohhoo' ar tsee/a.

²² Matlaatleero looa birna tleér, gurtuú xaslxaansli wásl ku hanís as tawa ilahhooár tlakweema hingeesa, kitángw ilahhooa ku hheehhe'és adoodá' kura hheehhe'és ar tseerér awu.

²³ Qoomár hheehhe'eesaro bura hhe'és, daqaní awuú niiná oo xaslxaansli wásl, nee gwaanduú xaslxaasli wásl oo wák,

²⁴ ngi hubá' dír geeraaeé', kaahamuusér Mungú ngi slik ar diwi nee kiwa haniisi as tawa ilahhooár da/a ar AAKOÓ MUNGÚ.

²⁵ Har afiqoomár deelo faanqw, umuú looaro gurtuú wák a ilahhooár tlakweema hingeesa ku hanís. Awuú wák nee gwaanduú xaslxaansli wásl oo wák ku hanís.

²⁶ Gawaá adoorihe har afiqoomár deelo faanqwe haraki/isa ka tléhh as kitangwduú ilahhooa, nee ku hheehhe'és, nee ku parátl as Aakoó Mungú.

²⁷ Alaá deeloorí faanqw bira waaráhh, bál dakaát nee deelór hi'iita kaahamuusér Mungú ilahhooár da/a nee ar wayda ngin haniisiyá' gawaá kitangwduú ilahhooa. Aníng kuungá' nu ya/aám. Anuú Aakoó MUNGÚ tí ngina oó'.»