ESEKIELI 42 - Biblía Axweesantá Hhohho' ar Mungú 2004

Maraá tsár awa bihhaá Doó Mungú

¹ Naagáy heedaádá' aníng iri huúw dír afeenidár tsee/a ay dír do'duú bihhaá /iíkwií dirií', iri dahaás ay baraá kutuwaaydá' nee afeenír Doó Mungú ti ga/aawá' nee do'duú bihhaá /iya.

² Do'owí oo bihhaá /iíkwií dirií', tlenaangós a miíta mibeeri kooán, nee uroó bihheerós a miíta mibeeri tsár nee kooán.

³ Maraá tám awa taa daanduú kuqá' wa tleéhh i dayá', maraydá' bir kaa dinkwaárií haragaás a miíta mibaangw ar afeenidár baraá do', tidá' ti ga/aawá' nee sakafu oo afeenidár tsee/a.

⁴ Bihhaá /iya awa do'owí loohír warahhama' i deer ar bihheero miíta kooán, nee tlenaangós a miíta mibeeri kooán, afeerós i bihhaá /iíkwií dirí'.

⁵ Kutuwi tidár bihhaá gawa ka daqa niina ta tidár tla/aango nee tidár bihhaá baraywo.

⁶ Maraydá' gáwtí diriiá' iihhafiirir'ín aa tleemiís, nee kaa uheemí qaasiiká adór maraydaá dír afeenír tsee/aá wa ale.

⁷ Koo/i i deer ar nee maraydá' ti ga/aawá' ar amór afeenír tsee/áy ti'iit, tlenaangós a miíta mibeeri tsár nee kooán.

⁸ Kutuwoó baraá afeenidár tsee/a tlenaango a miíta mibeeri tsár nee kooán, ala kudá' nee Doó Mungú taa gur'ér xu'usiye' tlenaango a miíta mibeeri kooán.

⁹ Bihhaá baray awa kutuwáywí loohír ya'a' ar waarahhama' i deer ar naa bihhaá da/ár ot awa alhhe'eesoó do'odá', qoomár naxés hee bir amoodár afeenír tsee/á wa darah,

¹⁰ didár koo/idár tsee/a iwa iimu/uún. Bihhaá basko doó hatlá' i deer oo nee kudá' ti slawá', ku saweeká dír do'oduú bihhaá /uwawo dír Doó Munguhe.

¹¹ Geeraá kutuwáydae loohi i deer ar waaraahh ar adór tidár bihhaá /iya. Do'odá' uraywo an adór kuduú hatlá', adoodá' kura tleéhh nee adoodá' iihhafiirirós ira tleemís aqo adór kuduú hatlá'.

¹² Bihhaá baraay awa kutuwáydae afkú do' i deer bihhaá baskú do'odae alhhe'eesoó bihhaá da/aáw didá' awa koo/i iwa iimu/uún.

¹³ Heedaádá' aníng iri báy, «Kutuwaywí sleémeero ku ló'wa hhohhó'. Baraá kutuwaywihe kaahamuusér Mungú, tidá' darah dír geeraá AAKOÓ MUNGÚ, ilahhooadá' hhohho' gan /aa/ák, nee sluufaydá' hhohhó' sleeme. Diirí an dír ilahhooár balaangw kay qamaamin, nee ilahhooár tlakweema hingeesa nee ar dakuús fiitsa as didá' kawa hhoohhoó'.

¹⁴ Kaahamuuseedá' aa gadiyus didá' hhoohhoó' wa ale qoomár bir ti'inángw slaiyá' amoodár afeenír tsee/a, tlabaaín ngi baraadií duuxiyá', kudá' aáng naa dahaasiyé' qoomár iwa AAKOÓ MUNGÚ sagadiyusiya', asma tlabaadá' ki hhohho'. Inooín in hariná' tlabaaín ngiwa duuxiya' qoomár tawa ti'itiiká amór dinku'uumár múkwií alé.»

Qoomoó doó Mungú

¹⁵ Alaá heedaádá' guruú Doó Mungú nguwa hhe'eés qoomeesaro, ina tsee/ií duúx ar afkú bihhaá da/aáw, nee didár tsee/a gari qoomeés.

¹⁶ Pa/almoowós kuduú qoomeemes guri taataáhh, nee bihhaá da/aáw giri qoomeés, gár aa sláy a miíta tsiire tsár nee mibeeri kooán.

¹⁷ Nee bihhaá /iya giri qoomeés ar pa/almoodá', gár aa sláy a miíta tsiire tsár nee mibeeri kooán.

¹⁸ Naagáy bihhaá basa giri qoomeés ar pa/almoowós kudá', inós miíta tsiire tsár nee mibeeri kooán gari sláy.

¹⁹ Naagáy iri warqáy, bihhaá /uwa giri qoomeés ar pa/almoowós kudá'. Inós miíta tsiire tsár nee mibeeri kooán gari sláy.

²⁰ Gawaá adoorihe inós bihhe sleémeero gari qoomeés, naxés badu sleémeerowo gár aa sláy a miíta tsiire tsár nee mibeeri kooán. Koo/idá' an tidá' didá hhoohhoo' gaa paratl didá' nee didá' muu i burumburimaamiti.