ESEKIELI 41 - Biblía Axweesantá Hhohho' ar Mungú 2004

¹ Aluuwo heedaádá' iri huúw ay baraá guruú do', didá' hhoohhoo'. Inós loohidá' baraá dó' i darah gari qoomeés, tlenaangós oo baraay a miíta tám,

² nee intlaxweemaawós a miíta kooán nee loohidá' umuú bihhiiwo i koo/ír koón, nee koo/idá' yaangareemawo a miíta tsár nee tlaqi. Matla/aangw guri qoomeés tlenaangós a miíta mibeeri tsár nee intlaxweemaawós a miíta mibaangw.

³ Aluuwo iri dáh baraá kutuwidár baraá guruú do'. Loohidá' aa baraá guruú dó' i dat gari qoomeés, tlenaango a miíta wak nee intlaxweemaawós a miíta tám nee tlaqi. Koo/idár bihhér loohi a miíta tám nee tlaqi.

⁴ Kutuwidá' gari qoomeés, bihhe sleémeero i alqoón, bihheerós a miíta mibaangw. Kutuwirí i geeraá didá' hhoohhoo'. Aluuwo aníng iri báy, «Diirí an didá' ló'wa hhoohhoo'.»

Maraá taa tleéhh bihhaá Doó Mungú

⁵ Heedaádá' yaangareemaá koo/iidár Doó Mungú giri qoomeés naxés a miíta tám. Maraá ninakw awa Doó Mungú ngwa harweeriye' i dayá', umuú do'o yaangareemaawo a miíta tsár.

⁶ Marayká' a adór maraá taa tleéhh gawaá daanduú kuqá' mari tám, nee umuú do'o kutuwáy ngu kon a mibeeri tám. Koo/ír Doó Mungú ar gawaá do'oduú gawa ka algeé niina ta ak tidár do'oduú baraá hará', as Doó Mungú munguwa al'iloouyé'.

⁷ Bartakaaro, koo/idár Doó Mungú bara xuuxú' tsee/aá wa alé, yaangareemawo i alqoná' iimír baráy wa tleemu ay gawa. Tsee/aá Doó Munguhe nee tsee/aá kutuwaywo tsa/aa/amto tsár i deer, tidá' tar gáwtí tsa/aa/an amór do'oda' gáwtí dirií'.

⁸ Naagáy ngiri ár, naxés Doó Mungú i sakaáfu taa gáwtí tleés kón oo gwaa harweer, sakaáfuudá' an dír iihhafiirír maraydá' gáwtí diriiá' awa tám kay tleéhh, kudaá afiqoomár Doó Mungú, tlenángw saweemaá iihhafiirirós i qoná' nee pa/almooduú qoomeemes, oo miíta tám.

⁹ Yaangareemaá koo/idár tsee/aá kutuwaydá' a miíta tsár nee tlaqi. Tsirxaadár tla/ángw kutuwayduú bihhe kudá' nee Doó Mungú ti ga/aawá',

¹⁰ nee kutuwayduú xuumuuse intlaxweemaawós a miíta mibaangw, Doó Mungú guna harweér.

¹¹ Kutuwayduú bihhe afer'ín kaa gweér amór afeeni, afkú wák i bihhaá /iya, nee oo hatlá' i bihhaá basa. Nee iihhafiiridá' taa haragaás nee afeenidá' uroó bihheero a miíta tsár nee tlaqi.

Doó bihhaá /uwa

¹² Alhhe'eesoó kilá' oo afeenidá' bihhaá /uwaawo doó tleerantleér oo tlenaango miíta mibeeri tsiyáhh nee kooán, nee intlaxweemaawo a miíta mibeeri tám nee kooán i deer. Koo/irós yaangareemaawo a miíta tsár nee tlaqi.

Qoomoó Doó Mungú dinkwaaro

¹³ Heedaádá' bihhaá tsee/a awa Doó Mungú giri qoomeés nee tlenangw'ín a miíta mibeeri kooán. Iimír alaá Doó Mungú ay tsirxaadá' tar waraahhi ay alhhe'eesoó tsirxaadá', bihhaá /uwa sleeme aqo miíta mibeeri kooán.

¹⁴ Tlenángw geeraá Doó Mungú iimír bihhaaká' ay kuqá' bira dinkwaárií haraafát nee tsirxaduudá' taa geexáy, a miíta mibeeri kooán.

¹⁵ Heedaádá' tlenángw do'odá' guna qoomeés ay bihhaá /uwa dinkwa nee gar/aawedár bihhe sleémeero, tlenaangós a miíta mibeeri kooán. Kutuwidá' tar daraahi baraá Doó Mungú i ale, didá' hhoohhoo' nee didá' ak ló'wa hhoohhoo',

Alki/ituú daanduú Doó Mungú

¹⁶ sleémeero kana qaalín ar peehháy iimír baraá yaamuú wa alé ay har afiqoomoó pa/eeri. Pa/eeriiká' tuuntukaro ki aleesláy.

¹⁷ Afkú do'o bihhaá gawa kin qaalín nee tam guruú kutuwi nee daanduú tsee/a oo kutuwidá' kina qaalín, koo/i sleémeero ar kutuwidár guruú do' kina qaalín.

¹⁸ Slaqsa'aá keruúbi nee awa slaansla kina gawaá koo/írí tleéhh, slaqsi'iidaá slaansla kina tla/a slahhán nee kudaá keruúbi, kiri kutuwírár harweér. Umuú kerubumoowo gitsee/a ngi kon a tsár.

¹⁹ Gitse/aá hee i amór slaqsoó slaanslír ga/ayá' bartá wake, nee gitse/aá diraangw i amór slaqsoó slaanslír hatlá' ga/ayá', adoorí an adór do' sleémeero kura parootuús.

²⁰ Iimír baráy wa tleemu ay gawa, slaqsi'iidaá keruúbi nee awa slaansla kina dó'ar parootuús.

²¹ Maanda nee duxuutér didá' hhoohhoo' i alqoná'. Dír geeraá afkuduú dahamaá didá' ló'wa hhoohhooe garkar

Kitángw ilahhooa oo peehháy

²² adór kitángw ilahhooa oo taa tleéhh ar peehháy i deer. Tlenaangós a tlaqtá miíta nee bihheerós a miíta wak, xareemiiwós iwitanangós nee bihheerós sleémeero kina tleéhh ar peehháy. Heedaádá' aníng iri báy, «Gaarí an meésadá' hoot dír geeraá AAKOÓ MUNGÚ wa ale.»

Afér do'

²³ Afkuko i deer oo dahamaá baraá matla/ángw Doó Mungú nee afkú hatlá' oo dahamaá didá' ló'wa hhoohhoo'.

²⁴ Afeerí peehháy'ín kwa qasiís as iwa bihheérí gweeriti.

²⁵ Didár afkuduú dahamaá baraá matla/aango slaqsoó keruúbi nee oo slaansla kuna tleéhh, aqo adoodá' kira tleéhh gawaá koo/írí ale. Nee tuuntukumár taa tleéhh ar peehháy afkú do' gun tsee/aá wa tuuntúk didár dahamaá baraá do'.

²⁶ Bihhaá kutuwirihe pe/eeraá ninakw nee koo/ír taa qaalín ar slaqsoó slaansla i deer.