ESEKIELI 40 - Biblía Axweesantá Hhohho' ar Mungú 2004

ESEKIELI DOÓ /ABÉN OO MUNGÚ GWA ÁR ( ) Esekieli kuwa huúw Yerusalemu

¹ Bál slahhángw geera tawa mibaangw, kurkú mibeeri tsár nee kooán iimír tiwa loohatís, /uuruú AAKOÓ MUNGÚ una ár. Qoomaarí an kurkú mibaá nee tsiyáhh iimír gixsár Yerusalemu kawa hayóh.

² Naagáy qoomár niwa baraá iigu'utií dirii', AAKOÓ MUNGÚ ina ar tláy ay baraá yaamaá Israeli, iri tsa/aás gawaá tloomár ló'wa tleer, nee bihhaá basko gár adór maraá baraá gixsa nina lak geehhoouyé'.

³ Naagáy iri amoodá' i huúw, aníng heé gwa/aát adór muqslidá' sirdaa/aat nguri ár. Heewí dabaawose i hhutlmoó kataánír kón oo tar qoomeemesi, dinkwa nee pa/almoó qoomeemes. Inós qoomaadae aa sihhiít tsufoó do'.

⁴ Naagáy iri báy, «Heewí, axáy, ló'wa qaytsiít nee iia qaasa hhe'eeseek. Axáy, ló'wa magaáhh umuú gár ni dirógií laqaama ara hhe'eeseek. Asma kuúng tuna diirií huúw as uwa gaarií laqaam. Múk Israeli ku afoorí ilaharís daanduú tidá' taa aandi.»

Afkú bihhaá da/aáw

⁵ Aluuwo Doó Mungú una ár kwaa harweér ar koo/i daanduú tsee/aá wa ale. Heedaádá' pa/almoowós kuduú qoomeemes guri taataáhh, kudá' tlenaangós afiqoomoó miíta tám, harqoomoó koo/idá' guri leeleéhh. Koo/irí tlenaangós a miíta tám, nee yaangareemaawós sleeme a miíta tám.

⁶ Naagáy aluuwo iri tláy amór afkú bihhaá da/aáw, tsa/a/amto gari ar tsa/án. Qoomár iwa gawaadá' i dirii'i maandár afkú do' gari qoomeés.

⁷ Kutuwoó xuumuuse umuú bihhér tar waraahhi i deer, umuú kutuwiro tlenángw bihheerós sleémeero i qón, a miíta tám. Koo/ír taa kutuwaywír qasiís yaangareemawós a miíta tsár nee tlaqi. Dír matla/ángw hungu/uumis tlenaangós a miíta tám. Afkós i amór kutuwidá' úr ga/áy nee Doó Mungú.

⁸ Heedaádá' kutuwidá' yangaariit sleeme gana qoomeés, naxés tlenángw baraywós a miíta tsiyáhh.

⁹ Aluuwo koo/irós tidár tsee/a gari qoomeés, yaangareemaawós a miíta wak. Bihhaá guruú baraá do'o awa afkú do' ki ló'wa hartseew nee Doó Mungú.

¹⁰ Didár dahama i kutuwoó tám oo xuumuusér koón, umuú bihheero uraywo a slaqmiimís, koo/idá' gaa paratl yaangareemawo i alqoná'.

¹¹ Naagáy heedaádá' dír waarahhama ar afkú do' gari qoomeés. Bihheerós a miíta lahhoó' nee tlaqi, yaangareemaá matla/angwdá' yangaariít, kudá' tar ohin a miíta kooán.

¹² Geeraá kutuwayduú múk xuúm, kudá' bihher'ín sleémeero miíta tám, baquú ququmaár adór kuquú ga ilaa/a i deer, tlenaangós a sentimiíta mibeeri kooán nee yaangareemaawós a sentimiíta mibeeri kooán.

¹³ Naagáy heedaádá' koo/ír alaá do' gari qoomeés ay bihhaá hatlá' didá' tar waraahhi tlenaangós a miíta mibaá nee tsár nee tlaqi.

¹⁴ Kutuwidá' ar alhhe'eesáy, tidá' afkós amór afeeni, inós sleeme gari qoomeés, bihheerós a miíta mibaangw.

¹⁵ Iimír dír afkú geeraá do' wa tleemu ay matla/angwdú baraá guruú do' a miíta mibeeri tsár nee kooán.

¹⁶ Pa/eeraá ninakw i dayá' dír umuú maandár tsee/aá kutuwaay sleémeerowo nee ay dír koo/idá' kutuwaay gwaa paratl. Slaqsoó xaa'aá slaansla kuna tleéhh gawaá maandár yooridá' tar waraahhi.

Afeenír tsee/a

¹⁷ Naagáy heedaádá' iri huúw ay dír afeenidár tsee/a ar Doó Mungú. Didaádae kutuwoó ninákw oo mibeeri tám oo koo/idá' gaa tsee/aá wa harweer i deer, nee dír geeraá kutuwaywihe afeenír taa tlaa/ér tleéhh i deer.

¹⁸ Tlaa/eeká' kina insláhh ar har qoomoó uroó afér kutuwaydá', tlaa/eeká' an kudaá baraá hará'.

¹⁹ Aluuwo heedaádá' tlenángw loohidá' naa baraá matla/ángw baraá dó' wa ti'it, kuduú bihhaá baráy dirií' guna qoomeés, gár aa sláy a miíta mibeeri kooán.

Afkú bihhaá /iya

²⁰ Naagáy heedaádá' iri geeraaeé' wa tláy ay bihhaá /iya, tlenángw afkú bihhaá /iya guri qoomeés, nee uroó bihheero nee afeenidár tsee/a.

²¹ Kutuwoó tám oo xuumuuse i deer bihhaá umuú afkú do'o. Tlenángw maandár kutuwaydá' nee qul/áywose aqo adór kuduú da/aáw haár. Tlenángw loohidá' a miíta mibeeri tsár nee kooán, nee bihheero uraywo a miíta mibaá nee tsár nee tlaqi.

²² Yoorír kutuwaydá' nee pa/eeriwose nee xaaidaá slaansla taa gawaá koo/írí gooín a slaqás nee kudaá afkú da/aáw. Diirihe tsa/a/amto faanqw i deer, nee qul/áywós i baraá guruudá'.

²³ Iimír dír loohír dahmaá afkú bihhaá /iya nee afeeni bara waaráhh, loohír hatlá' i deer ar aa gana' ay dír afeenír baraá guruú do', aqo adór kuduú bihhaá da/aáw. Heedaádá' tlenaangw guna qoomeés iimír afkú tsee/aá wa tleemu ay kuduú baraá do', gár aa sláy a miíta mibeeri kooán.

Afkú bihhaá basa

²⁴ Heedaádá' aníng iri huúw bihhaá basa. Bihhaadaá basko afkú do' i deer, maandár afkú do' gari qoomeés nee matla/aangose, naxés i alqoná' nee kudaá hatlá'.

²⁵ Pa/eeri i dayá' bihhe sleémeerowo adór kudaá kutuwayduú hatlá'. Tlenaangós a miíta mibeeri tsár nee kooán, nee bihheerós a miíta mibaá nee tsár nee tlaqi.

²⁶ Didae tsa/aa/amto faanqw i deer ar tar hardihi afkú dahma. Dír bihhaá afkudae matla/aangw i deer oo nee afeeni ti ga/aawá', nee slaqsoó slaansla oo taa gooín gawaá koo/ír guruú do' i deer, oo nee loohír dahma ti ga/aawá'.

²⁷ Dír bihhaá loohír dahmaawo loohír hatlá' i deer ar aa dat baraá matla/angwduú guruú do'. Heedaádá' tlenángw tla/ángw lohduudá' guri qoomeés, gár aa sláy a miíta mibeeri kooán.

Afér baraá guruú do'

²⁸ Heedaádá' aníng iri waarahhaás ar loohír bihhaá basa, tari hardahaán ay afeenír baraá guruú do'. Loohidá' gana qoomeés, naxés i alqoná' nee lohduudá' daraahá' baraá koo/ír tsee/ií ale.

²⁹ Kutuwoó xuumuuse nee matla/eerduine nee koo/iro sleémeero uraywo i alqoná' nee kudaá hatlá'. Pa/eeri sleeme i dayá' dír bihhaá loohidár dahamaá baraá matla/aango. Tlenángw loohidá' a miíta mibeeri tsár nee kooán, nee bihheero a miíta mibaá nee tsár nee tlaqi.

³⁰ Kutuwoó ninákw i deer bihhaá loohidae, tlenangw'ín a miíta mibeeri tsár nee kooán, nee uroó bihher'ín a miíta mibaá nee tsár nee tlaqi.

³¹ Matla/angwdá' ti ga/ayá' nee afeenidár tsee/a. Nee slaqsoó xaa'aá slaansla kwaa gooín gawaá uheemiidaá bihhaá loohidár dahmaá amór tsa/aa/amto. Didae tsa/aa/amto dakaát i deer ar tar tsa/aa/an amór afkú do'.

Afeenír baraá guruú do'

³² Heedaádá' aníng ina huúw bihhaá da/aáw awa afeenidár baraá guruú do'. Loohidá' tar daraahi gari qoomeés, naxés tleenangós a adór lohduudá' hatlá' baraá afeenír kawá'.

³³ Kutuwáywós sleémeero kuduú xuumuuse, nee uheemiwós kudaá baraá guruú do', dinkwa nee matla/aangós sleémeero, uraywo i qoná' nee kudaá hatlá'. Pa/eeri i dayá' bihhe sleémeero, tam baraá qul/ayhe, nee baraá kutuwidá' tar daraahi. Tlenaangós a miíta mibeeri tsár nee kooán, nee uroó bihheerós a miíta mibá nee tsár nee tlaqi.

³⁴ Kutuwidár dahma nee afeenidár tsee/a ti hariyá'. Slaqsa'aá xaa'aá slaansla kaa gooín gawaá koo/ír didá' tar waraahhi. Didae tsa/aa/amto dakaát i deer ar tar tsa/aa/an amór afkú do'.

Afeenír baraá guruú do'

³⁵ Naagáy heedaádá' iri huúw ay amór loohidá' tar bihhaá /iíkwár daraahi. Inós loohidá' gari qoomeés, naxés i alqoná' nee lohduudaá hatlá'.

³⁶ Amoodae kutuwoó xuumuuse sleeme i deer, nee koo/ír baraá guruú do' kaa qaalín, nee matla/ángw tar daraahi nee pa/eeri i bihhe sleémeero. Tlenaangós sleémeero a miíta mibeeri tsár nee kooán, nee uroó bihheerós a miíta mibaá nee tsár nee tlaqi.

³⁷ Matla/ángw tar daraahi nee afeenidá' ti hariyá', slaqsoó xaa'aá slaansla oo taa tleéhh gawaá koo/i didár warahhama i deer. Nee sleeme tsa/aa/amto dakaát i deer ar tar tsa/aa/an amór afkú do'.

Maraá hatlá' bihhaá afkú /iya

³⁸ Dír afeenidár tsee/aawo kutuwír hatlá' i deer ar taa doogiye' nee loohidá' naa /iíkwár dat. Kutuwirí ti ga/ayá' nee matla/aangw, diirí an dír makaydá' ta ilahhooár dá/tá wa hanmaamisi kiwa hamtlatliti.

³⁹ Baraá matla/aango meesadaá tsár kaa qaás bihhaá wák, nee awa hatlá' awa tsár kaa qaás bihhaá hatlá'. Gawaá meesaduukae makaydaá muruuduú ilahhooár da/a/aangw nee ar tlakweema hingeesa nee ar dakuús fiitsa kun gawaadá' wa tsu/aa/ín.

⁴⁰ Tsee/aá matla/aangwihe meesadaá tsár i dayá' bihhaá wake, nee meesadaá hatlá' awa tsár i bihhaá hatlá' awa loohidá' naa afkú /iíkwár dat.

⁴¹ Meesadu sleémeero kudá' ta makaá ilahhooár i tsu/aa/in a dakaát. Meesadaá tsiyáhh baraá matla/aangw nee awa tsiyáhh i tsee/aá matla/aangw.

⁴² Meesadaá hatlá' awa tsiyáhh baraá matla/aango i dayá', kudá' ilahhooár da/a ki amohhe'eemamisi. Meesaduuká' kina tleéhh ar tlaa/aá taa dakuút. Umuú meésaro tlenaangós a sentimiíta mibeeri kooan, nee daanduú meésa tlenaangw nee uroó bihheero i alqoná', a sentimiíta mibeeri faanqw nee kooán. Xoosla sleémeero ar ta tsu/umamiti kan babaats gawaá daanduú meesaduudá'.

⁴³ Baraá matla/angwdae kikiár fu'unaay ki kiki'in ar afe magól ar sentimiíta faanqw nee tlaqi i deer. Fu'unaay kaa qaás gawaá meésa.

⁴⁴ Tsee/aá loohidár baraá guruú do'o kutuwoó daauuse i deer oo baraá matla/angwduú baraá do'. Kutuwír wák i bihhaá afkú /iya i baskú ge/eér, kutuwír hatlá' i bihhaá afkú da/aáw i /iikú ga/eér.

⁴⁵ Heedaádá' aníng iri báy, «Kutuwirí baskú ga/aw ar kaahamuusér Mungú, tidá' gadiyuus dír Doó Mungú wa ale.

⁴⁶ Nee kutuwidá' /iikú ga/aw an kutuwír kaahamuusér Mungú, tidá' gadiyuus dír kitángw ilahhooár wa ale. Kaahamuuseerír Mungú ar guruú doó Sadoki, inooín kilooín an múk taa pa/aángwí haniís baraá tlahhoó Laáwiwo, iwa dír geeraá Aakoó MUNGÚ kakaya'.»

Afeenír baraá guruú do' nee doó Mungú

⁴⁷ Heedaádá' afeenidár baraá guruú do' gari qoomeés, tlenaangós nee uroó bihheero i alqoná'. Bihhe sleémeero a miíta mibeeri kooán. Kitángw ilahhooa hanmis i dír geeraá Doó Mungú i dirii'.

⁴⁸ Aluuwo aníng iri huúw ay dír matla/angwduú dahmaá baraá Doó Mungú. Afkú do' guri qoomeés, naxés tlenaangós a miíta tsár nee tlaqi, nee uroó bihheero a miíta faanqw. Nee koo/irós yaangareemaawo a miíta wak nee tlaqi umuú bihhiiwo.

⁴⁹ Tsa/aa/amto i deer ar tar tsa/an amór matla/angwduú kutuwír tar daraahi, matla/angwdá' uroó bihheero a miíta mibaangw, nee tlenángw baraay a miíta lahhoó'. Uheemaá tsár i dayá' dír afkú do'o, kuqá' i bartaqá', kuqií bartaqá'.