ESEKIELI 4 - Biblía Axweesantá Hhohho' ar Mungú 2004

Gixsár Yerusalemu ka harweer

¹ «Heewí, matfaalmo taataahheek, dír geeraawók ti qas, naagáy gixsár Yerusalemu ka gawaadá' i gooiín.

² Laqaameek, adór kara harweér. Slaqsoó koo/irós nee slumtós bihhaawósí gooimeek, slumaá slaqwaruuse bihhaawós i tleehheek, nee gufteeraá gixsa kar fe/iiti.

³ Naagáy hhartá muqsli taataahheek ka sihhtís adór koo/ír kuúng nee gixsa nu paraatl. Daqaní guruuwók ku amór gixsarí ta harweér xu'ús, ka laqaán adór gixsarí kara harweér. Layár kawa harweeri tleehheek. Gaarí a laya dír xoorór múk Israeliwo.

⁴ «Daqaní tláw ta qát ar bihhiiwók awa doó basáy. Qooma sleémeerowo ar tawa adoorír hot, tlakweemaá múk Israeli in gagát adór huwár iloo'.

⁵ Aníng kuúng ugwa deeloórí qoomeés. Deelór naa haniís a tsiire tám nee mibeeri gwaleél. Gaarí an hariímár qoomár sakwasleemar'ín. Baalár wák i qoná' nee kurkú wák. Sakwasleemár múk Israeli an gagát.

⁶ Deeloorí bara hhe'és faakaro, daqaní ta qát ar bihhaá doó /iyáy, nee diirihe a tlakweemaá múk Yuda in loohís har afiqoomoó deelo mibeeri tsiyáhh. Baalár wák i qoná' nee kurkú wák.

⁷ «Gimáy, ilaawók kiririhheek amór gixsár Yerusalemu, tidá' taa harweér, dakók oo kaahaár ku laqaán, ta aariín daanduuwose.

⁸ Aníng kuúng un tseék ar hima as tawa bihhaaqá' nee kuqá' i warqeeraaká ay dír gixsár Yerusalemu kay hhe'eesi harweeraro.

⁹ «Angaáno taataahheek, nee angaánoó shayiíri, nee loosí, nee deéngu, nee mangwaré', nee basooro dinkwaárií haragaaseek baraá xooslmoó wák, mukaatmoowók tleehheek. Mukaatmoosíng an muruú /aymarók deeloodá' tawa bartá wák ar gu', tidár tsiire tám nee mibeeri gwaleél sleémeero.

¹⁰ Muruú /aymár ta /ak aqo kun qoomeemees, inós an graám tsiire tsár nee mibeeri tám looár wake, nee kuúng looár wake /ayma ka hhe'es a wak.

¹¹ Ma'aay sleeme aqo kingin qoomees slooqi'i tsár looár wake.

¹² /O/ór hee an asltár oohís, mukaatamoowók kuri humiín nee kuri /ák geeraá múk wa aleeró.»

¹³ AAKOÓ MUNGÚ iri báy, «Adoorí an adoodá' múk Israeli mikaater'ín tidá' slasla/aren ngir /ayiya', qoomár barta baraá tla/ángw xoorduudá' ngi huuw.»

¹⁴ Aníng nguri báw, «Aá Aakoó MUNGÚ! Aníng taa baloó meetagaasiiká as tuua ngiwa /aay, laqaá gár makiito'ór sla/a aa ót, laqaá tam fu'unaá makaá slasla/aren iga /ayiiká iimír tawa na/oó niiná.»

¹⁵ Iri báy, «Gimáy daxta, ugwa pa/aángwí haniís oo tsuunkoó hikwa kuwa asltár oohis kitángw /oo/odaá muko as tawa mikaátér tlehh.»

¹⁶ Iri malé báy, «Heewí, ga/aaweek, aníng muruú /aymár baraá gixsár Yerusalemu u hayóh, yaamuloouuser'ín gár i /ak a muruú /aymár ta qoomeemesi ar dae, ma'aá wahaangw a kudá' ta qoomeemesi ar xure.

¹⁷ Adoorí an tleéhh as muruú /ayma nee ma'aywo ngiwa dakuusiya', umuú heewo kuqá' gun ga/áy ar gurhaami, tari hhaasumiit niri hhaná' as tlakweemaaín.»