ESEKIELI 38 - Biblía Axweesantá Hhohho' ar Mungú 2004

Waawutmo Gogu a xooslmoó Mungú

¹ Axweesantá AAKOÓ MUNGÚ ana axaás, i kat,

² «Heewí, warqáw amór waawutmo Gogu oo yaamaá Magogu, waawutmoó úr oo Mesheki nee oo Tubali. Aariím daanduuwose,

³ ta o', Aakoó MUNGÚ i kaahi, ‹Gógu, aníng nee kuúng ti araán, kuúnguú waawutmoó úr oo yaamaá Mesheki nee Tubali.

⁴ Aníng kuúng un mumukuús nee taqesmoowók un óh ar muqslír afa mogoolmo, nee uri tsee/ií kwaáhh, kuúng dinkwa nee slaqwaruuseerók sleémeero, nee faras nee slaqwaruusér faras ngwa i tsa/aandi, nee daqtá yaariir ar muu ar tlabaá slaqwara gaa dahas, gaambu gawaá daber'ín, nee ta paangaduuín mumukumiis.

⁵ Slaqwaruusér amór Persiar daahh, nee ar Kushi nee Putír dahha, ta dinkwa nee inooín, sleémeero i gaambá koná' nee kofiydaá muqsla.

⁶ Sleeme slaqwaruuse sleémeero ar Gomerír daahh, nee ar Bet-togarma ar amoodár /iikú saáw daahh, dinkwa nee slaqwaruusér xoordaá hatlá' ta dinkwa nee kuúng.

⁷ Ti amohhe'es kuúng dinkwa nee slaqwaruuseerók sleémeero tidá' aa burumburit, nee mukduú dinkwa nee kuúng, sleémeero magaahhé'.

⁸ Alaá deelór yaariir bira waaráhh tu ateet, yaamaá muu kway húp as kiwa i haratleer nee hamí daxta tawa hooti daér slaqwara i káhh. Tlom'aá múk Israeli in i haratleér, kudá' aáng awa xaanxaay nee taangu har afiqoomoó deelór niinawe, ala hám daxta muu i hoot ar saxareema.

⁹ A ta'aaiín adór bambaao, nee daanduú yaamu kuri tuuntúk adór huunki, kuúng kilók nee slaqwaruuserók sleémeero nee xoordaá hatlá' kudá' awa dinkwa nee kuúng.›

¹⁰ «Kuúng, Gógu, anuú Aakoó MUNGÚ a kah, baalaadá' birna xeér muruú tlákw kuri axwés baraá muunaáwók i ale, nee kuri qoomeemés tari o',

¹¹ ‹Aníng a slaqwarár áw amór yaamuudá' koo/ír kooma'aaká, yaamuuká' muk'ín in waydúr hoot. Inooín sleémeero dír ta hooti a baraá gixsadaá koo/ír kooma'aaká nee awa afer'ín taa tsegitiiká ar gadaádár peehhír afkú do' tsegit.

¹² Daqaari'iimár mukduú baraá gixsaduudá' hoót kuúng an hayót, gixsaduudaá aáng xaanxaay. Mukwí kunguna burumbuúr baraá xoordaá hatlá' wa ale, nee hám daxta inooín i hikwaá koná' nee daqaari'iimaro, inooín ta tla/ángw yaamuú wa hoot.›

¹³ Yaamulouusér Sheba nee Dedani dinkwa nee múk halaanu'uumár tlehhiít oo yaamaá Tarshishi nee oo isapaydá' bir yaahamisiyá', tawa kaahi, ‹Xáy, naa haasaángú léhhi? Xáy, slaqwaruuseerók aga buruumbúdi as tawa haratleera' nee haasaáng kuwa ar tleér nee peésa kawa taatahh nee sahaábu, nee haasaángú yaariír kuwa ar tleer?› »

¹⁴ «Gawaá adoorihe, Heewí, aariím danduú Goguwo, ku beer, Aakoó MUNGÚ i kaahi, ‹Qoomár xooror'eé' ar Israeli iwa hot ar wayda, kuúng a xu'káhe?

¹⁵ Kuúng aai ngina tség amór do'ók wa ale, amoodár /iikú ló'wa saáw, dinkwa nee slaqwaruusér yaariir ar faras ngwa i tsa/aan, nee slaqwaruuse nee múk /uuruú koóm.

¹⁶ Múk Israeli kuri haraxeér adór huunkír giiw gawaá daanduú yaamuwo. Qoomaadae aníng kuúng un ya/aáw yaamuueé' kiwa i haratleer, as múk xoordu ngiwa tsaahhi adór aníng kuúng Gógu ura ya/aáw as hhohhoarir'eé' ngiwa laqaám dir'inií ale.›

¹⁷ Anuú Aakoó MUNGÚ a kah, ‹Kuúng an kudá' aáng kaangós naa geerií qaroó oó' ar loohír sagadiyuuser'eé', aaruusér múk Israeli, tidá' qoomaadae aa aaririin adór aluuwo ur hara'awmis nee múk Israeli tawa slaqwa'.› »

Mungú Gogu gu sakwasleemuut

¹⁸ Aakoó MUNGÚ i kaahi, «Baldá' Gogu bira haraatláy baraá yaamaá Israeli, aníng buhhtaawo a da/atúw.

¹⁹ Aníng tí an káh ar gwa/aateema nee ar da/i nee buhhtaaeene, asma baalaadae kuunseelír ur i ti'ít baraá yaamaá múk Israeliro.

²⁰ Siyoó baraá tlabeemo, nee tsir/ór /akumiit, nee makaá sla/ato, nee ya'a wasleero, dinkwa nee múk baraá yaamu sleémeero ta daraxaat aníng bira ariyé'. Tlom'i ki yaamií hhaaf, nee geetawe nee koo/i sleémeero i yaamií hú'.

²¹ Aníng umuú gár de'e tlaaq a tsaanguús as Gogu kuwa ilaa/i. Anuú Aakoó MUNGÚ tí aga oó'. Slaqwaruuseerós tin kilooín layá' ar paangaduuín.

²² Aníng Gogu un slaáhh ar tiqtír pu/i nee qatlór yaariir. Aníng tluwoó yaariír ngu huúw, nee tluwoó tlaa/eewo, nee asla nee kibiriíti i gawaawós nee gawaá slaqwaruuseerós nee dír xoorduudá' sleémeero kudá' nee inós dinkwaárií diriiá'.

²³ Adoorí an adoodá' xoordu sleémeero hhohhoarir'eé' ngir ariya'. Aluuwo aníng iri tsaahhiya' adór tar AAKOÓ MUNGÚ.»