ESEKIELI 37 - Biblía Axweesantá Hhohho' ar Mungú 2004

Tlapár fadaá kaaharen

¹ Anuú Esekieli /uuruú AAKOÓ MUNGÚ ina al'iilooúy, nee inós iri gáwtí tleés ar qeeruuwós, nee iri qaás baraá tlapár faduuwo haats.

² Inós aníng iri ar hi'imiít baraadaá tlapaadá' wa aleeró. Baraá tlapaarihe fadaá yaariir awa ló'wa kaaharen i dayá'.

³ Aníng AAKOÓ MUNGÚ iri yaahaás, «Heewí, xáy, faduuká' inqo slafiía malé ale?» Aníng nguri mu/aywaáts, «Aá Aakoó MUNGÚ, kuúng a xú'.»

⁴ Inós aníng iri báy, «Aariím daanduú faduukae. Ki a adoorí beér, Kuungá' fadaá kaaharen, axweesantá AAKOÓ MUNGÚ iiárií qaasaak.

⁵ Aakoó MUNGÚ aníng iri báy, Aníng kuungá' nun hinslií qaás, tari slafá'.

⁶ Aníng kuungá' nun dee/ár i qaás nee fu'unaywo, nee nuri tuuntuúk ar kaahari, nuri hinslií qaás, kuungá' tari slafá'. Daqaní kari tsahhá' adór aníng tar AAKOÓ MUNGÚ.»

⁷ Gawaá adoorihe, niri aariím adoodá' taa báy. Qoomár niwa aaririim afo niri hardát ar adór afór muruú ti gweehhiím, faduudá' tiri harasuruukiyé' nee tiri haragwaaiyé'.

⁸ Niwa qaytsiít faduudá' ngiri ár naxés kina dee/ár nee kaneerií qaás nee fu'uunaywo, kiri tuuntuúk ar kaahari. Ala i slafiaaká.

⁹ Aluuwo AAKOÓ MUNGÚ iri báy, «Heewí, afkueé' /ayeek aariím, fur'a kabeeto, Aakoó MUNGÚ i kaahi, Xáy fúr'a, qwaláng bihhe sleémeerowo nee fukuku'uút dír slaqooká' naa qatliye', kahhós i slafiyá'.»

¹⁰ Naagáy aníng niri aariím adoodá' taa báy, hinsla iri dáh baraá tu'uudá', inooín niri slafíngwií ki/iyé', niri sihhiitiyé' daqtá ló'wa yaariir.

¹¹ Aluuwo AAKOÓ MUNGÚ iri báy, «Heewí, faduusingá' a múk Israeli sleémeero. Inooín ta kaahi, ‹Faduurén naa kahiyé', harahhifoorén aa fák, atén aga hhaamaán.›

¹² Gawaá adoorihe, aariím, ki beer, Anuú Aakoó MUNGÚ a kah, Muk'eé', aníng /aantuhúng in gweér nuri waslee/atís baraá /aantuú wa alé. Nuri watlís ayaahúngí ale baraá yaamaá Israeli.

¹³ Kuungá' muk'eé', qoomár aníng /aantuuhúng bira gweér, nee burna waaslee/atís, a tsahhá' adór aníng tar AAKOÓ MUNGÚ.

¹⁴ Aníng qeeruueé' un baraahúng i qaás, nee kuungá' tari slafá', aníng kuungá' nuri male ki/ís baraá yaamuuhúng i ale. Daqaní kuungá' a tsahhá' adór anuú AAKOÓ MUNGÚ tí ngira oó', nee aníng an tleéhh. Anuú AAKOÓ MUNGÚ tí ngina oó'.»

Yuda nee Israeli ki sawaawuti'ín nee waawutmoó wák

¹⁵ Axweesantá AAKOÓ MUNGÚ ana axaás, i kat,

¹⁶ «Heewí, xwaytsír wák taatahheek, nee /aymi'iiká' gawaawós ti gooiin, ‹Dír múk Yuda nee oo Israeli kudaá mar'eefo.› Naagáy xwatsatsír hatlá' taatahheek nee /aymi'iiká' gooimeek gawaawós, ‹Dír Yosefu (xwaytsír Efraimu) nee múk Israeli kudá' guruú doó wák.›

¹⁷ Aluuwo xwatsoodá' taatahheek kay dinkwaárií naga'ás adór xwaytsír wák wa alé.

¹⁸ Yaamulouuseerók barnaxes ugwa yaahás, tawa kaahi, ‹Xáy, gaarí gár i laqaqaan ngi o'káhe?›

¹⁹ Kuúng daqaní ki mu/aywáts, Aakoó MUNGÚ i kaahi, Xwatsír Yosefu tidár baraá dákw Efraimu an óh as tlahh'aá múk Israeli kudá' nee inós dinkwa, nee an dinkwaárií nag'aás nee xwaytsidár Yuda, as xwatsooká' tawa xwaytsír wák tleehhiti baraá dakw'eene.

²⁰ «Qoomár bar aga geeraaín i sihhít a xwaytsoodá' koón, kudá' taa gooín.

²¹ Kibeeto, Anuú Aakoó MUNGÚ a kah, Aníng múk Israeli ngu ki/ís baraá xoordudá' nay tlay'i, in burumbuúr bihhe sleémeerowo, ngiri ki/ís baraá yaamuuín i alé.

²² Aníng ngari xoorór wák tleéhh nee ngiri qaás baraá yaamaá tlom'aá Israeli. Waawutmoó wák gi sawaawuti'ín inooín sleémeerowo. Inooín ta male kumiitiiká tawa xoordaá tsár, laqaá ti malé tsatiaaká kiwa de'en nee waawituú tsár.

²³ Inooín tin male slasla/aresiaaká ar slaqsi'iidaá mungui, nee muruudá' aníng i buhhtamís, laqaá tlakweemaaín. Aníng i ba/amís as tawa malé dee/anutiiká. Inooín tari muk'eé' nee aníng tari MUNGUÚÍN.

²⁴ Sagadiyusmooeé' Daudi inooín gin sawaawuti'ín, eeít, kiri de'én nee de'eemusmoó wák. Inooín daber'eé' ngin harmagaahhiyá' nee kaahir'eé' ngin oohiyá'.

²⁵ Inooín tari hoot baraá yaamaá baabi'ii'ín kudá' naa haniís dír Yakobo. Inooín nee na/ii'ine nee na/aá nangw'ine, tari baraaká' wa hoot ay alhhe'eesay wasle, Daudi sagadiyusmooeé' giri sawaawuti'ín daqisleeme.

²⁶ Aníng alqadór wayda an tleéhh nee inooín, alqadoorí tari ar alhhe'eesay wasle. Aníng inooín i tsuúq, yaamu ngiri dala/iyá', nee hotaaeé' ngiri tleéhh baraá tla/angw'ín ay alhhe'eesay wasle.

²⁷ Niri hoót tla/angw'ín wa ale, aníng tari Munguúín nee inooín tari muk'eé'.

²⁸ Qoomár bar aníng dír hotaaeé' aga baraá tla/angw'ínií tleéhh ay alhhe'eesay wasle, xoordu ngin tsaahhiyá' adór anuú AAKOÓ MUNGÚ, múk Israeli ngur heehhe'eemiís.»