ESEKIELI 36 - Biblía Axweesantá Hhohho' ar Mungú 2004

Mungú yaamaá múk Israeli gi tsuuq

¹ Aakoó Mungú aníng ina báy, «Heewí, aariím daanduú tlom'aá Israeliwo. Kibeeto, Axweesante'eé' iiárií qaasaak.

² Anuú Aakoó MUNGÚ a kah, ‹Wakuuserhúng naa niqís nee inooín ta kaahi, kuungá' aga aalir'ín tleehhité'.›

³ «Gawaá adoorihe, Esekiéli, kuúng aariím ta ó', ‹Anuú Aakoó MUNGÚ a kah, kuungaá tlom'aá múk Israeli, muu naa yaamaá tawo tleéhh, nee tunda i haratláy bihhe sleémeerowo, nee aga daqaari'iimár xoordaá hatlá' tleehhité', nee tari gár ta kaantin, nee ar ta waaqaqaai tla/ángw xoordu sleémeerowo.

⁴ Gawaá adoorihe, kuungaá tlom'aá múk Israeli, axweesante'eé' iiárií qaasaak, anuú Aakoó MUNGÚ. Kuungá' tlóm'i nee gongoáma' nee kutloó ma'aay, nee tlapu, nee xatso, nee gixsadudaá sluhhaay, kuungádá' taa haasaáng wa huúw, nee tunda waaqaá' nee xoordudá' sleémeero naa harweeriye'.›

⁵ «Ala hám daxta aníng taa ló'wa buhhtís, aníng xoordaá hatlá' i sakwasleemuút, kawa ure múk Edomu. Inooín adoodá' yaamuueé' ngiwa kooín tleehhiyé' ngina saqwalaala/iyé', aníng iri waaqaaiyé'.

⁶ «Gawaá adoorihe, aariím daanduú múk Israeliwo, tlom'ii'ín nee gongoamaawo nee kutlo ma'aay nee xatsoowo, ki beer, anuú Aakoó MUNGÚ a kah, ‹An axweés ar sla'aarir'eé' tidá' da/tá koom daanduú yaamuueene, asma yaamuueé' kaa ló'wa /oosliislín nee xoordaá hatlá'.›

⁷ Looeemaawo anuú Aakoó MUNGÚ a kah, ‹Múk xoordaá hatlá' kudaá awa inslaawayhúng, inooíná kilá' kin /oosliislín.

⁸ Ala gawaá tlom'aá yaamaá Israeliwo xaai haleemi ngi duuxiyá', nee mamu ngi laqwaaliyá' as muk'eé' oo Israeli, asma inooín deeloorí tseewe ta kii/ ayaaín.

⁹ Ga/aawaak, aníng a bartahúng i dirií', aníng kuungá' nu warqeés, tundu doosl tunduri dahaasín.

¹⁰ Múk Israeli un ló'wa tlahhás. Gixsaduuín ki tleehh, nee taanguuín ki male /abees tleehhamooro.

¹¹ Muu nee makaywo in ló'wa tlahhás. Nee kuungá' tlóm'i, tundu male hoot adoodár aáng wa ale. Muruú hhó' ngu ló'wa tleéhh adoodá' aáng ba/a. Daqaní kuungá' a tsahhá' adór aníng tar AAKOÓ MUNGÚ.

¹² Aníng múk Israeli un aleesleemuú i haniís oo kuungá' tunduwa yaamií kala/an. Nee kuungá' nay aaliyá', tam na/ii'ín i malé tsu/a'aaká.›

¹³ «Anuú Aakoó MUNGÚ an kah, ‹As muu daanduhunge iwa kaahi, kuungá' a múk /agá' nee xoororhúng aga na/ii faké',

¹⁴ ala hám daxta a ki/a'aaká malé ale muu /aymaaro, laqaá na/aá xoororhúng kiwa hayohiindá'. Anuú Aakoó MUNGÚ tí aga oó'.

¹⁵ Aníng xoordaá hatlá' i malé pa/aángwí hanisaaká oo kuungá' nuwa /oosliislina'. Nee sleeme xoororhúng i malé dakuuská.› Anuú Aakoó MUNGÚ tí aga oó'.»

Hotaá /aben awa múk Israeli

¹⁶ Axweesantá AAKOÓ MUNGÚ ana axaás, i kat,

¹⁷ «Heewí, qoomár múk Israeli iwa hoót baraá yaamuuín wa ale, ayaaín nguna slasla/areesiyé' ar tlehhmi'ii'ín kudá' tlakw. Tlehhmi'ii'ín ngiwa ga/aw slasla/aruuwo, i qoná' nee /ameenír baraá deeloorós i dirii'.

¹⁸ Inooín ina i buúhh asma tseereedá' naa ku'uusiye' baraá yaamuwo nee munguiidá' hatlá' kudá' yaamuuín ngaa slasla/areesiye'.

¹⁹ Ina diyaá/ baraá tla/ángw xoordaá hatlá', ngiri tsiyayaáx baraá yaamaá hatlá'. Inooín ina sakwasleemuút ar har qoomoó tlehhmi'ii'ín.

²⁰ Tam qoomaadá' tawa baraá tla/ángw xoordaá hatlá', umuueé' nguna /oosliisliné', tam muu tari oó' daanduuine, ‹Ga/aawaak, mukwí an kuduú AAKOÓ MUNGÚ, ala inooín kina loohatís baraá yaamuuwose ar /uuru.›

²¹ Aníng ana gurboo/áw as umuueé' kudá' hhoohhoó' múk Israeli nguwa slasla/areesiyé' baraá tla/ángw xoorduudá' inooín naa kayé'.

²² «Gawaá adoorihe múk Israeli kubeer, Aakoó MUNGÚ i kaahi, Tí ni tleehhár wa slaa' a tleehhaaká as kuungá', ala an tlehhiít as ilaiwa/amér umuueé' kudá' hhoohhoó', kudá' kuungá' taa slasla/areesé' baraá tla/ángw xoorduudá' ti diya/até'.

²³ Umuueé' kudá' úr kuungá' taa slasla/areesé' baraá tla/ángw xoorduudá' wa alé, un adoorós tidár aáng i ki/ís baraá tla/angw'ine. Qoomaarí an qoomaadá' xoorduká' ngiwa tsaahhiya' adór aníng tar AAKOÓ MUNGÚ. Anuú Aakoó MUNGÚ tí aga oó'. Aníng kuungá' nu gadiyuús as hhohhooari ngiwa laqaam geeraá xoorduuwo.

²⁴ Aníng kuungá' nu duúx baraá tla/ángw xoordú wa alé, nee nuri burumbuúr baraá yaamaá dah'iimár wa alé, nuri ki/ís baraá yaamuuhúng awa kilá'.

²⁵ Aníng kuungá' nun ma'áy tsiririxiís, ma'aá hhohho', nee tari hhoohhoaaeerá' baraá slasla/aruhúng kudae, nee dír slasla/aruú slaqsi'iihúng kudaá mungui sleémeerowo.

²⁶ Aníng kuungá' nun muunuú /abén i haniís, nee qeeruú /abén nguri qaás baraahúng i alé. Muunuúdá' gawít baraahunge oo adór tlaa/ano un hingeés, nee nuri muunuú ilaiwa/amér i haniís.

²⁷ Qeeruueé' nguri baraahúng i qaás, nee nuri intsaahhatís daber'eé' kawa eehada' nee kaahir'eé' kari iialooeesá'.

²⁸ Tari hotá' baraá yaamaá baabi'iihúng naa hootiyé'. Kuungá' tari muk'eé', aníng tari Munguúhúng.

²⁹ Aníng kuungá' nun ba/amís baraá slasla/aruhúng sleémeerowo. Aníng balangwhúng ngu hamareés, tam giyeé ni baloó tleeraaká.

³⁰ Aníng mamaá xaai nee balángw qamu i tlahhás, as mutunduwa murekeés ar giyeé tidá' tla/ángw xoorduuwo.

³¹ Naagáy kuungá' hotaarirhúng tidá' tlakw kari insleerá', nee tlehhmi'iihúng kudá' tlakwe, kuungá' tari kiloohúng ahhitá' asma tlakweemahúng nee muruudá' aníng ni waak taa tlehhé'.

³² Ala xuaak, adoorí a tleehhaaká as kuungá'. Anuú Aakoó MUNGÚ tí aga oó'. Múk Israeli gimsé', muruuté' nee ta amoqwaqwadiindá' asma tlehhmi'iihúng kudá' tlakw.

³³ «Anuú Aakoó MUNGÚ a kah, Baldá' aníng tlakweemaahúng kudá' sleémeero bira hheehhe'eés, gixsaduhúng ngiri ya/aám kiwa male hota', nee sluhhayhúng kuri male /abees tleehharo.

³⁴ Yaamuudá' aáng na xaanxay tleehhitiye' kin malé doosl, tam múk baraadár waaraáhh mingiwa ár tawa xaanxaay.

³⁵ Muu iri ooi, ‹Yaamuká' aáng adór xaanxaay, hamí daxta a adór asalmooduú Edeni, nee gixsadudá' aáng naa deewaiyé', kudá' tawa lóh niri sluhhuutiyé', hamí daxta ki hoot nee muu, slamí kaa harweér ar koo/ír gawit.›

³⁶ Aluuwo xoorduudá' naa meetiye' dír inslaawayhunge, ngiri tsaahhiyá' adór anuú AAKOÓ MUNGÚ tar kudá' wa/ameedá' aa hhitiruumit gaa /abees tleehhamooro, nee dahaasiingw nguri dahaás baraá yaamuudaá xaanxaay. Anuú AAKOÓ MUNGÚ tí ngina oó', nee adoorí an adór ni tleehh.

³⁷ «Anuú Aakoó MUNGÚ a kah, Múk Israeli aníng i firín as tawa tlahhi adór daqtá bee/ángw wa alé, aníng in adoorí tleéhh.

³⁸ Inooín in firiná' tawa tlahhi adór bee/ángw taa ilahhooár wa tsu/i, eeít, an adór bee/ángw baraá gixsár Yerusalemu qoomár deelór ur. Adoorí an adoodá' gixsaduhúng kudá' taa geexáy nir hatsiya' daqtá muko. Diirí an didá' iwa tsaahhiya' adór aníng tar AAKOÓ MUNGÚ.»