ESEKIELI 35 - Biblía Axweesantá Hhohho' ar Mungú 2004

Aaru'uuma daanduú Edomu

¹ Axweesantá AAKOÓ MUNGÚ ana axaás, i kat,

² «Heewí, warqáw amór tloomár Seiri, aariím daanduú yaamuloouuseerose.

³ Kibeeto, anuú Aakoó MUNGÚ a kah, ‹Aníng nee kiíng ti araán, aá tloomár Seiri, dakw'eé' un tleés gawaawók, tari deewá' nee iri xaanxay tleéhh.

⁴ Gixsaduuwók in taangu tleéhh, nee kiíng tari adór xaanxay tleehhít. Daqaní kuungá' a tsahhá' adór aníng tar AAKOÓ MUNGÚ.›

⁵ «Kiíng ana wakuso'ór daqisleém tleehhít dír múk Israeliro, nee múk yaariír una tsú/ ar paánga qoomár tawa baraá slahh'amuuínií dirii'i, nee iwa baraá sakwasleemar'ín ar alhhe'eesáy dirii'iya'.

⁶ Gawaá adoorihe Aakoó MUNGÚ i kaahi, ‹Adoodá' aníng nir hotaatima, aníng kiíng i amohhe'eés ar tseererók kawa ku'uusi, nee tseererí kiíng i eeharahát, asma kiíng tiwa kuunday raa/aát, gawaá adoorihe kiíng tseere i alkoón.

⁷ Aníng tloomár Seiri an deewa'atís nee ngiri xaanxay tleéhh, nee kudá' baraadár ohiimá' ki hhaamiis.

⁸ Tlom'iiwók i hatsiís tuaá múk taa tsu/i, nee baraá gongoamawoge nee tlapu mukdá' sleémeero taa tsuú/ wa/angwdá' guri dalaa/.

⁹ Aníng kiíng in xaanxay tleéhh ay alhhe'eesay wasle, gixsaduuwók ki malé wa hootiiká. Daqaní aníng i tsahhá' adór tar AAKOÓ MUNGÚ.›

¹⁰ «Kiíng ana ó', ‹Xoorduuká' tsár awa múk Yuda nee Israeliwo a daqaari'iimar'eé' nee in aál!› Adoorí ana ó' tam handá' AAKOÓ MUNGÚ i baraadae.

¹¹ Gawaá adoorihe, adoodá' anuú Aakoó MUNGÚ nir hotaatima, aníng kiíng in harasihhiít ar adoodá' buhhtaawók i dirii'iya' nee da/ito as inooín kiwa áhh. Qoomár bira sakwasleemuút daqaní kiíng a tsáhh adór aníng tar heemá.

¹² Kiíng daqaní kari xú' adór anuú kiluú AAKOÓ MUNGÚ, /oslisliingók kudá' taa aaiín daanduú tloomár Israeliwo ngura axaás, kudá' tawa kat, ‹Tlom'aá múk Israeli kaa xaanxay tleéhh, kinga haniís dirén i ale as kiwa aalaan.›

¹³ Aníng aga axaás adór tir xirfayeemaamis nee muruú yaariír kur axweemaamis.

¹⁴ «Anuú Aakoó MUNGÚ a kah, ‹Qoomár aníng kiíng Edomu bira xaanxay tleéhh, daanduú yaamu sleémeero iri qwalaa/,

¹⁵ adoodá' kiíng tara qwalá/ as yaamaá Israeli kiwa xaanxay tleéhh. Gawaá adoorihe aníng kiíng i harasihhiít. Kiíng tloomár Seiri a xaanxay tleehhít, dinkwa nee yaamu sleémeero awa Edomu. Qoomaarihe daqaní kuungá' a tsahhá' adór aníng tar AAKOÓ MUNGÚ.› »