ESEKIELI 34 - Biblía Axweesantá Hhohho' ar Mungú 2004

De'eemuusér múk Israeli

¹ Axweesantá AAKOÓ MUNGÚ ana axaás, i kat,

² «Heewí, aariím daanduú de'eemuusér Israeliwo. De'eemuuse kabeeto, anuú Aakoó MUNGÚ a kah, ‹Tsaxwaahúng, kuungaásingaá de'eemuusér múk Israeli, kuungaásingá' ti kiloohúng /aymisá'. Xáy, hariimaro a de'eemuuse bee/angw'eé' gun /aymiskáhe?

³ Kuungá' di/i an /agá', nee tlabaá taa tleéhh ar se'éngw bee/aangw in tsititá', nee bee/ángw aa wahhdiit un tsu/á', ala kuungá' bee/aangw de'eengo ugwa meeré'.

⁴ Kudá' liitlakwén uga /uurií qaasiiká, nee oo tiíq ugwa maasáy hanisi'iiká, kudá' aa qeqtin ugwa tlaawindi'iiká, kudá' tawo hi'iimiít iga haraki/isiiká, nee kudá' aa qwaqwadin ugwa leelehhtuú eeri'iiká. Ala kuungá' una de'eendé' ar /uuru nee ar xarasleema.

⁵ Gawaá adoorihe, asma de'eemusmoó bee/aangwí iwa kahhi, inooín niri diyaa/atiyé', sleémeero tari /aymár makaá sla/a.

⁶ Bee/angw'eé' iri diya/aát iri tawo hi'iimiít gawaá tlom'i wa alé nee gawaá tlom'aá tlet, iri tsiyayaáx baraá yaamu sleémeero, nee heé gwaa gaárí xuu' gway leelehhtuú áy i kaahh.›

⁷ «Gawaá adoorihe kuungaásingaá de'eemuúse, axweesantá anuú AAKOÓ MUNGÚ iiaárií qaasaak.

⁸ Adoodá' anuú Aakoó MUNGÚ nir hotaatima, aníng aga ló'wa slahhaá' bee/angw'eé' nguwa ga/áw tawa muruú /aymár makaá xaraaslá', asma heé gu de'eém i kaahh, asma de'eemuuser'eé' bee/aangw gwa leeleehhitká, ala inooín gur'er'ín kilós ngina harmagaahhiyé'.

⁹ Gimsé' kuungaasingaá de'eemuúse, axweesantá' anuú AAKOÓ MUNGÚ iiaárií qaasaak.

¹⁰ Anuú Aakoó MUNGÚ a kah, Aníng nee kuungá' de'eemuuse ti araán. Aníng kuungá' nu hingeés bee/angw'eé' kuwa sawaawuti'iinda', slám a malé ya/amaaká bee/angw'eé' kuwa de'eenda'. Pa/ángw kuungá' tiwa kiloohúng /aymisa' u sleera'aaká. Bee/angw'eé' un tuú/ baraá aferhúng wa ale, mukuwa malé /aáy.»

De'eemusmoó hhoó'

¹¹ «Gawaá adoorihe anuú Aakoó MUNGÚ a kah, Anuú kilá' bee/angw'eé' un leeleéhh nee nguri amohhe'eés.

¹² Adoodá' de'eemusmo bee/aangós kudá' aa diyaya/aat ngur leelehhaahhiti, an adoodá' aníng bee/angw'eé' ngur leelehhiit. Un haraaki/ís umuú dír iqo diyaa/ati, bál huunkáy nee ma/amír a kiqiti.

¹³ Aníng i duúx baraá tla/ángw xoordaá hatlá' wa ale kudá' sawen, nee ngiri huuw baraá yaamuuín kudaá kilá' i ale. Nguri de'eém gawaá tlom'aá Israelír wa ale, bihhér duxe, nee baraá yaamu sleémeero kudá' muu i hooti.

¹⁴ In huúw dír qawtantá hhoohhoo' gawaá tlom'aá tledaadet awa yaamaá Israeli, kudá' qawtantá hhoó' koomá'. Inooín niri tlahhsiya' baraá xatstá hhoohhoo', eeít, inooín qawtantá hhoo' ngi slayá' gawaá tlom'aá Israeliwo.

¹⁵ Anuú kilá' bee/angw'eé' un de'eém. Anuú kilá' in tlahhás. Anuú Aakoó MUNGÚ tí ngina oó'.

¹⁶ «Bee/angwdá' aa qwaar un leelehhtuú áw, nee kudaádá' tawo hi'iimiít un amór dó' i ki/ís. Kudaádá' aa qeqtin un tlaawiím, nee kudá' litlakwén aníng in /uurií qaás. Ala bee/ángw slaqo hhó' nee kudá' /uuruú koóm un hhaamiís. Aníng bee/aangw un de'eém adoodá' kus hariím.

¹⁷ «Nee kuungaaká' daqataeé', anuú Aakoó MUNGÚ an kah, Kángw bee/i nee tiqá' un tsaát, nee oo gwaanda nee gurtuuwo.

¹⁸ Kuungá' ka ga/eera', a gár niináwe kuungá' tunduwa /aymiís ar qawór hho', nee qawtantá hatlá' aa met kari tlupitá' ar ya'aahúng? Slám kuungá' ma'aá hhohho' ina wahaandé', ala kudá' naa meetiye' misa tumbiindé' ar ya'aahúng?

¹⁹ Xáy, bee/angw'eé' in qawór áya dír qawtantá taa tlupiimaamité', nee ma'aá taa tumbindé' ngin wahiía?

²⁰ «Gawaá adoorihe, anuú Aakoó MUNGÚ nun adoorí babáw, Anuú kilá' kángw bee/ángw aa wahhdiit nee kudá' slaqo tlákw un tsaát.

²¹ Kuungá' bee/ángw slaqo tlákw un amoqár saáw i gusisiindá', nee un difá' ar xareemiihúng, nee sleémeero ugwa diya/é' amór saáw i ale.

²² Ala aníng bee/angw'eé' un ba/amís as mukuwa malé slakaát.

²³ Aníng de'eemusmoó wák un qaás as ngiwa de'en, waawutmoó adór sagadiyusmooeé' Daudi un qaás. Inós gin /aymiis nee tari de'eemusmooín.

²⁴ Ala aníng AAKOÓ MUNGÚ tari Munguúín nee sagadiyusmooeé' Daudi tari geeraharusmooín. Anuú AAKOÓ MUNGÚ tí ngina oó'.

²⁵ Aníng nee inooín alqadór wayda ngiri qaasaán. Aníng makaá xaraaslá' in faák baraá yaamuwo as bee/angw'eé' iwa baraá darmú xatsoó wa hooti ar amohhooa, nee iwa gui baraá sla/atá wa ale.

²⁶ «Aníng ngiri hootiís bihhaá tloomar'eé' tidá' hhoohhoó' wa ale, nee nguri tsuúq. Tluwaay nguri huúw ar qom'aá hariimá', nee tluwaaywí a tluwoó tsuuqaá koóm.

²⁷ Xaa'aá baraá qamu mamu ngi laqwaaliyá', yaamu mamaá yaariir ngi laqwaaliyá', nee mamuudá' niri hootiyá' ar wayda. Qoomár aníng him'eedá' inooín kira tsegiít bara tsaát, nee in tuú/ baraá dabaá kudá' ngaa lawaale tleehhi'i, aníng daqaní i tsaahhiyá' adór tar AAKOÓ MUNGÚ.

²⁸ Inooín ki baloó slakaatiiká nee xoorór hatlá', laqaá tawa /aymár makaá sla/a. Inooín in hootiyá' ar saxareemo, nee heé gi baloó dae tsaát i kaahh.

²⁹ Aníng in qamaá xawuú koomá' i sláw as qwari mingiwa hhaamiís baraá yaamuwo, laqaá mikiwa malé waaqaá' nee xoordaá hatlá'.

³⁰ Inooín ngiri tsaahhiyá' adór anuú AAKOÓ MUNGÚ, Munguúín tar dinkwa nee inooín, nee adór múk Israeli tar muk'eé'. Anuú Aakoó MUNGÚ tí aga oó'.

³¹ «Kuungá' a bee/angw'eé' oo baraá qawtantaeéní dirií', aníng a Munguúhúng. Anuú Aakoó MUNGÚ tí aga oó'.»