ESEKIELI 33 - Biblía Axweesantá Hhohho' ar Mungú 2004

Esekieli kwa tsawaár tawa xuumusmo

¹ Axweesantá AAKOÓ MUNGÚ ana axaás, i kat,

² «Heewí, axweés nee múk yaamuuká' ki beer, Barnaxes aníng slaqwara ngaa huúw baraá yaamuwo, nee múk yaamuudá' heeín oo wák kuri qaás xuumusmooín wa alé.

³ Heewí bar wakuuse ngaa ár i hi'ít, tarumbeéta gan ufaahh as muu nguwa gurbui.

⁴ Hee bar afoodár tarumbeéta gaa waaqaá', nee gurbu'utí gaa iiaárí qaasiiká, nee wakuuse niri hardát guri gás, inós slafiingós i gawaá dabaawós i dirii'.

⁵ Oo afór tarumbeéta gaa axaas, nee gurbua gari waaqaá', slafiingós i gawaá dabaawósií dirii'. Ala barnaxes afoodá' gaa iiaárií qaás, slafiingós gwaa ba/amís.

⁶ Ala barnaxes xuumusmo wakuuse gaa ár i hi'ít, ala tarumbeéta gaa ufaahhiiká, nee muu kwa gurbuiiká daanduú tsaxwaaká hi'iita'a, nee wakuuse hee guri gás baraá tla/angw'ine, heewí tlaákw iri gwaá', inós ina gwaá' as dakuúsarós, ala aníng hhiintluú heewí u iinuús gawaá daanduú xuumusmoowí.

⁷ «Heewí, hamí daxta, aníng kuúng ugwa qaás tawa xuumusmoó múk Israeli. Kuúng axweesani bara dir'eé' wa axás, muk'eé' ku gurbú'.

⁸ Aníng heé tlaákw bura báw, ‹Aá heé tlaákw, looeemaawo kuúng a gwá',› ala kuúng heedaádá' tlaákw u gurbu'uundaaká as tlakweemaawós ngiwa may, ar ló' heewí tlakweemaawós ngu gaasiyá', ala aníng hhiintluú heewí u iinuús gawaá dabaawók.

⁹ Ala kuúng barnaxes heé tlaákw ugwa gurbú' as tlehhma'aá tlakw ngiwa may tlehhtuuwo, ala inós gi mamayká, inós aqo in gwaa' as dakuúsarós tidá', ala kuúng slafiingók ugwa tú/.»

Gadiyér umuú hee

¹⁰ «Heewí, múk Israeli kubeeto, kuungá' mas kata', ‹Atén tlakweema nee iringeede taa al'iiloouyé', aga neehuumitaán asma tlakweema. Xáy, adór hotaawo tar kumitaan a adoomá?›

¹¹ Mukwí baweek, ‹Adoodá' anuú Aakoó MUNGÚ nir hotaatima, gwa'arár heé tlaákw aníng a saqwalala/aaká, ala gár ni slaa' masók heé tlaákw tlehhma'aá tlakw gin máy, as iwa hooti. Tlakweemaahúng hhu'uu'umaak, nee muruudá' tlákw mawaak tlehhtuwo. Múk Israeli, ahaá waáy, mas qatlór slá'?›

¹² «Nee kuúng heewí, mukók kubeeto, Heé ganaá' bar tlehhma'aá tlakw gaa tleéhh, tlehhmi'iiwós kudá' gana'á aa geerií tleéhh ngu tu/iiaaká. Heé tlaákw barnaxes tlakweema tlehhtuwo gaa máy, ku sakwasleemuutiiká. Heé ganaá' bar tlakweema tlehhtuwo gaa iimu/ún, gan'amuuwós kuduú aáng gu ba/amisiiká.

¹³ Ala aníng tam al'axweesani aga qaasi ar heé gan'amuú koóm iwa hooti, ala inós barnaxes gan'amuuwós kudá' guna ár adór ira bu'uút, tlakweema giri iimu/ún tlehhtuwo, tlehhmi'iiwós kudá' aa geerií tleéhh ki inslayká, aqo in gwaa' as tlakweemaawós.

¹⁴ Slám heé tlaákw bura báw, ‹Kuúng looeemaawo a gwá',› nee inós tlakweema gay máy, muruú ganaá' nee oo qoóm guri iimu/ún tlehhtuuwo,

¹⁵ nee gár aa kiriík nee tidá' aa fiís gari ki/ís iri hoot baraá kaahír slafíngw wa alé, tlakweema giri máy, inós i gwaaiiká, aqo in slaaf.

¹⁶ Tlakweemaawós kudá' sleémeero aáng aa tleéhh ki inslayká daanduuwós i ale, asma inós tidá' hariim nee hhoo' gaa tleéhh. Gawaá adoorihe heewí in hoot.

¹⁷ «Ala mukók tam hamí i kaahi, ‹Gár Aakoó Mungú i tlehhiiti i qoondaaká,› laatí an inooín múk adór ganaa' ga tlehhiitaaká.

¹⁸ Qoomár heé ganaá' barnaxes gan'amu tlehhtuwo gwaa máy, nee tlakweema giri tlehhiít, heewí aqo in gwaa' as tlakweemaadá'.

¹⁹ Nee qoomár heé tlaákw tlakweemaawós birnga máy tlehhtuwo, nee muruú ganaá' nee oo qoóm guri iimu/ún tlehhtuwo, inós aqo in hoot as gan'amuudá'.

²⁰ Ala tam hamí kuungá' a katá', ‹Gár Aakoó MUNGÚ i tlehhiiti i gana'aká.› Aá múk Israeli, aníng umuú heewo un sakwasleemuút ar qoomoó tlehhmi'iiwós.»

Gixsár Yerusalemu kaa hayóh

²¹ Slahhángw mibaangw bál tawa kooán kurkú mibaá nee tsár iimír atén tiwa loohatís, heeko wák naa Yerusalemúr wa kotsqoot nina dir'eénií hardáh i kaahi, «Gixsár Yerusalemu kaa hayóh.»

²² Heewí niwa hardáh a matlaatle, laatí adór /isá'arós tsiindoowo aníng ilooeemaá /uuruú AAKOÓ MUNGÚ ina sláw. Matlaatlér looaytleérose heewí naa kotsqoot niwa dir'eé' i hardáh, aníng axweesani ngiri aleesláw.

Tlakweemaá muu

²³ Axweesantá AAKOÓ MUNGÚ ana axaás, i kat,

²⁴ «Heewí, yaamuloouusér aa met baraá yaamaá Israeli tam hamí i kat, ‹Aáng Abrahamu a kilós baraá yaamuukae, tam adoorihe, yaamuuká' gina aál. Ala atén ti yaariír, gaarí ka geehhoo' yaamuuká' a aaliirén.›

²⁵ «Gawaá adoorihe kibeeto, Anuú Aakoó MUNGÚ a kah, Kuungá' fu'unaay in tseerér al/agá', nee slaqsi'iidaá mungui in sluufmisá', nee tseerdu in tawo ku'umisá', xáy, ka xua' yaamuuká' kingiqo kuungá' i tsuwa haniísi?

²⁶ Kuungá' xooslarhúng ar slaqwara ana harahhifé', muruú ta tlehhita' an kudá' án i buhhtamís, nee umuú hhawaatuwo baraahunge nee harér heé hatlá' tan fuquus. Xáy, kuungá' ka xuá' yaamuuká' ngiqo tsuwa haniísa?

²⁷ «Kibeeto, Anuú Aakoó MUNGÚ a kah, Adoodá' aníng nir hotaatima, looeemaawo kudá' sleémeero aa baraá gixsadií meet kin hhaamiis ar paánga, heé tsee/aá /awaákí dirií' ku /aay nee makaá xaraaslá', kudá' baraá koo/ír gawít i dirií', nee kuduú baraá mar'o, tiqtír pu/i gin tsú/.

²⁸ Yaamuuká' i xaanxay tleéhh nee gaa wasle. Pihhuuseerós tidár daara/uuse an suqúw. Tlom'aá Israeli in xaanxay tleéhh, nee heé gawaadár óh i kaahh.

²⁹ Qoomár yaamuuká' bira xaanxay tleéhh, asma muruudá' sleémeero aníng iga buhhtamis, kudá' naa tleehhiyé', daqaní ngi tsaahhiyá' adór aníng tar AAKOÓ MUNGÚ.»

Gár dahareemisuú aarusmo naa huúw

³⁰ «Heewí, mukók i daanduuwók axwees, ta tlintaá maray'ín i iwiit ta kilooín axwees, ta kaahi, ‹Gusé', axweesantá AAKOÓ MUNGÚ a iiaárií qaasár awaán.›

³¹ Nina dír geeraawók i hardihiyé' adór múk wa ale, nee nina dír geerawók i iwiitiyé' adór muk'eé', axweesantók ngiri axaasiyé', ala naa iialooeesi'iiká. Barta axwees i sla'aarír koná', ala muner'ín i baraá slaasláw leelehhit.

³² Laatí dir'ine kuúng a adór heé /aylaá tsuuá' gi tawo daá' ar afór hhohho' nee ar xooslár daa'aangw. Asma axweesantók ngin tawo axamiisiyá', ngi iialooeemisiaaká.

³³ Qoomár tí sleémeero ni kah bira tleehharút, nee iqo tsuwa tleehharút, daqaní ngiri tsaahhiyá' adór aarusmo ir baraá tla/angw'ín i dirií'.»