ESEKIELI 31 - Biblía Axweesantá Hhohho' ar Mungú 2004

Misri kawa alqoomeés nee ta/eewi

¹ Slahhángw tám bál tawa wak, kurkú mibaá nee wak, iimír atén tiwa loohatís, axweesantá AAKOÓ MUNGÚ ana axaás, i kat,

² «Heewí, waawutmo Farao oo Misri nee mukós ki beer, ‹Heé uraywo ur alqoomees a heemá?

³ Kuúng a adór sahhtír yaamaá Lebanoni, tidár haleemi hhohho', nee loo/o yaariir nee tidá' tleer, tsitsini ina purúts gawaá doori.

⁴ Ma'aay ngina ureesiyé', iloodaá baraá ma'aay ngina /aymisiyé', didá' inós i diri' duxér ma'aay nina ti'ít, duxeedá' iri wá/ amór xaai sleémeero awa gara.

⁵ Gawaá adoorihe iri tleeruúr ló'wa alé xaai sleémeero awa gara ba/a. Haleemoowós nina ló'wa tlahhiyé' nee niri diraaruyé', asma dee/áruuwós ma'aá yaariir nguna du'umisiyé'.

⁶ Tsir/o sleémeero ar gawaá doori maray'ín giri gawaá haleemiiwós i tléhh. Makaay sleémeero niri laqwaaliyé' baraá guruuwós i alé, xoorduudá' sleémeero kudá' uren tari hungu/umiís bara mahhtirós.

⁷ Yaangaremaawós kudá' ki ló'wa hhoohhoo'. Nee haleemiiwós kudá' tlet dee/áruuwós ina ló'wa yaamií kiki'ín ay dír ma'aá yaariir.

⁸ Dír sahhtár baraá asalmoó Munguhe ar ta inósár alqoomeesi i káhh. Tam /aantsí nee haleemiiwós ta qonká. Tam xa'anoó ta babay miamoóri haleemi gi konká adór inós ar alé. Tam nee xa'anoó hhohhoaariro slaqmís baraá asalmoó Munguhe i kaahh.

⁹ Aníng ana ló'wa hhoohhoeés tleehharo ar haleemiiwós kudá' yaariir. Xaai sleémeero awa baraá asalmoó Edeni gur'e giri ohiín as inós, kudá' sleémeero awa baraá asalmoó Mungú.›

¹⁰ «Gawaá adoorihe anuú Aakoó MUNGÚ a kah, ‹Asma kiíng ana tleeruúr, nee tsitsiniirók tiri gáwtár dúx baraá haleemiidá' urene, tlenaangók kuri ar daara/aán.

¹¹ Aníng a haniís gawaá dabaá geeraharusmoó xoordu. Inós ga sakwasleemuut, ngiri amór saáw i kwaáhh har qoomoó tlakweemaawós.

¹² Múk xoordu oo ló'wa xaraásl sahhtidá' ngi tsatiyá', nee ngiri yaamií kwahhiyá', nee kari geexáy. Haleemoowós niri yaamií huuhu'uná' gawaá tlom'ií alé nee baraá xatso, nee baraá mapeeraá ma'aay nee yaamu ngiri dalaa/iyá' sleémeero. Muu sleémeero didár mahhtirós ngiri geexayá' nee ngiri mayá'.

¹³ Tsir/o sleémeero iri iwít gawaá gu/eemidaá haleemi, nee makaá sla/a sleémeero haleemiidá' ngiri adaraahiyá'.

¹⁴ Adoorí ina tleehharút asma xaai sleémeero kudaá dír ma'aay mindiwa tlenaanuyé' ay gawaá doori. Xa'anoó hatlá' oo taa eemiís tlenaango adór kwí mingiwa malé áy. Asma umuú gaa alhhe'eesaywós a gwa'ara, tam muu sleeme a adoorí, sleémeero ta /eet baraá gi'i.›

¹⁵ «Gawaá adoorihe anuú Aakoó MUNGÚ a kah, ‹Baalaadá' sahhti iwa hardát baraá gi'i ana uuntsuús ar giwti, yauuwós ina kahaás, nee duxeedá' yaariir wa/amiim ana ilaá/. Tam Lebanoni ana qaás baraá giwti tawa layár gurhaamir'ín, nee xaai sleémeero baraá sla/to niri /araarané' as inós.

¹⁶ Xoordu ina daaraxaás ar afór huu'umaawós, qoomár ngiwa yaamií daáhh baraá gi'i, dinkwa nee kudá' /e/etimá' baraá bohoongw, nee xaai sleémeero awa Edeni, xaa'aá hhohho' awa dimbé baraá Lebanoniro, kudá' taa eemiís ar ma'aay, kina gurkwa/amís baraadaá gi'iiwo.

¹⁷ Inooín sleeme tana /eét baraá gi'i dinkwa nee inós, tam kudá' nee inós taa dabe oohiye', kudá' aa huungu/uumiis baraá mahhtuuwós wa alé.›

¹⁸ «Hhohhoaarír xa'anoowí nee uraywós xa'anoó kur alqoomeesi i kaahh baraá asalmoó Edeniro. Hám daxta, xa'anoowí a kuúng waawutmo Farao. Kuúng tu yaamií kwaahh baraá gi'i dinkwa nee xaai sleémeero awa Edeni. Kuúng tari qát dinkwa nee mukdá' Munguú xuaaká, nee tari haraagwá' nee kudá' taa tsuú/ ar paánga. Adoorí an adór kuúng tay diri', aá Faráo, kuúng nee mukók. Anuú Aakoó MUNGÚ tí aga oó'.»