ESEKIELI 30 - Biblía Axweesantá Hhohho' ar Mungú 2004

AAKOÓ MUNGÚ Misri ga sakwasleemuut

¹ Axweesantá AAKOÓ MUNGÚ ana malé axaás, i kat,

² «Heewí, aariím, ta o', Anuú Aakoó MUNGÚ a kah, tsuunqumisé' nee tawa kata', ‹Tsaxwaarén baldae!›

³ Asma deeloodá' ka tseew, deeloodár AAKOÓ MUNGÚ ka ló'wa tseew. Deeloorí a adór giwtír ma/ami, baalár xoordu kiwa hhaamisi.

⁴ Slaqwara ti'it baraá yaamaá Misriro, nee yaamaá Kushi gurhaamír ur gi sleér qoomár múk yaariír oo Misri burkwa tsuú/. Daqaari'iimar'ín barka ar tláy, nee ihhafiirír gixsaduuín barkaa feé/.

⁵ «Muu sleémeero kudá' taa dabe oohiye' nee múk Misri, adór múk Kushi, nee oo Puti, nee oo Ludi nee oo Ma/arabu sleémeero nee oo Libya kiri dinkwaárí hhaamiís.

⁶ «Anuú AAKOÓ MUNGÚ a kah, mukdá' nee múk Misri ti dabe ohiimá' ki hhaamiis, slaqwaruuseedá' pihh'uumár koom sleémeero ka hhaamiis. Iimír Migdoli ay Siyene muu ku tsuú/ baraá slaqwara. Anuú Aakoó MUNGÚ tí aga oó'.

⁷ Yaamaá Misri i xaanxay tleehhitiyá' adór ayeemoodaá xaanxaay. Nee gixsaduuwós i taangu tleehhitiyá' adór gixsadaá taa daá/.

⁸ Aníng yaamaá Misri bira ásltí qaás nee ayeemoodá' sleémeero ngi alee/iimisá' bira qwaareés. Daqaní ngi tsaahhiyá' adór aníng tar AAKOÓ MUNGÚ.

⁹ «Baalaadae ya/abuuse a ya/aáw ar múk Kushi gu naxwtá aw, kudá' ti xuá' iwa baraá wayda. Inooín gurhaamír ur giri eér bál Misri bara hhaamiís. Ar ló' deelo ni hi'ít.

¹⁰ «Anuú Aakoó MUNGÚ a kah, Waawutmo Nebukadnesa oo Babuloni un ar gadiyuús, as daqaari'iimár yaamaá Misri ngiwa hhaamisi.

¹¹ Nebukadnesa inosuú kilá' dinkwa nee mukós a xoordaá xaraaslá' ta ak xoordaá hatlá' sleémeerowo. Kingi ya/aaw as yaamaá Misri kiwa hhaamisi. Paangaduuín ngi taataahhiyá' as yaamaá Misri, nee yaamaá Misri ngiri hatsiisiyá' tu'uwo.

¹² Aníng yaaér Nili nee duxeerose a kahaás, nee yaamaá Misri in weeriís dír múk tlákwií ale, yaamu sleémeero awa Misri i hhitiím ar dabaá múk dahaaye. Anuú AAKOÓ MUNGÚ tí ngina oó'.

¹³ «Anuú Aakoó MUNGÚ an kah, Slaqsi'iidaá munguaá hatlá' in hhitiím, tam slaqsi'iidá' baraá gixsár Memfisi in hhitiím. Geeraharusmo i sangw deeruutiiká baraá yaamaá Misriro. Múk Misri tari daeérár hoot.

¹⁴ Gixsár Parosi a tawo tleéhh, gixsár Soani a ásltár daá/, gixsár Tebesi ngiri sakwasleemuút.

¹⁵ Án Pelusiumu an i buúhh, koo/idá' gawit ta harahhifi nee múk Misri, nee daqtá Tebesi an hhaamiís.

¹⁶ Yaamaá Misri i daá/ ar asla, Pelusiumu slahh'amaayér ur ga sleér, koo/ír Tebesi ka yaamií daahh, nee gixsár Memfisi ka harasihhiit nee wakusmo tlaatla/ángw /awaák alé.

¹⁷ Masoombár daaqaay ar Oni nee ar Pi-beseti ka tsuu/ ar paánga, nee gixsaduuká' kiri loohatis.

¹⁸ Amór Tahafnesi tlaatla/aangw in xweera tleehhiit, qoomár bar aleesleemuú múk Misri ugwa hhitiím, nee daara/aangós kudá' úr un suqúw. Huunkáy yaamaá Misri giri tuuntuuk nee dasuuwós kuri loohatis.

¹⁹ Adoorí an adór múk Misri ngur sakwasleemuút. Nee muu gari tsaahh adór aníng tar AAKOÓ MUNGÚ.»

/Uuruú Misri ku hhitín

²⁰ Slahhángw geera bál tawa faanqw, kurkú mibaá nee wák, iimír atén tiwa loohatís, axweesantá AAKOÓ MUNGÚ ana axaás, i kat.

²¹ «Heewí, aníng dákw waawutmo Farao oo Misri ugwa geeqáw, inós kwaa tseegiiká as kuwa hungu/uusi, nee paánga ooharo ngiwa aleeslay.

²² Gawaá adoorihe, anuú Aakoó MUNGÚ a kah, Aníng nee Farao ti araán, waawutmoó yaamaá Misri. Dabaawós tsaraawo in giqáw, kudá' hhoó' nee kudá' taa geeqayi. Nee aníng paángadá' gawaá dakós i dirii' an yaamií kwaáhh.

²³ Múk Misri u diyaá/ baraá xoordu sleémeero, nee ngiri tsiyayaáx baraá hhapeemaá hatlá'.

²⁴ Aníng dabaá waawutmoó Babuloni in /uurií qaás, nee paángar'eé' ngiri qaás gawaá dakós. Ala dabaá waawutmo Farao in giqáw, nee inós iri /iif geeraá waawutmoó Babulonír wa alé, adór heé taa ló'wa tlaaqán.

²⁵ Dabaá waawutmoó Babuloni in /uurií qaás, ala dabaá waawutmo Farao nin huuiyá'. Daqaní kuungá' a tsahhá' adór aníng tar AAKOÓ MUNGÚ, qoomár án paángar'eé' bar aga qaás gawaá dabaá waawutmoó Babuloni, dakós guri tlees gawaá yaamaá Misri.

²⁶ Aníng múk Misri un diyaá/ baraá tla/ángw xoordaá hatlá' nee ngiri tsiyayaáx baraá ayeemaá hatlá'. Daqaní ngi tsaahhiyá' adór aníng tar AAKOÓ MUNGÚ.»