ESEKIELI 3 - Biblía Axweesantá Hhohho' ar Mungú 2004

¹ Iri báy, «Heewí gaarí tindi hanmiisi /ayeek, kitaábuuwí /ayeek, daqaní ta amór múk Israeli keér kiwa kaangwí beer.»

² Gawaá adoorihe afkueé' nguri awaátl, inós iri /aymiís ar kitaábuudá'.

³ Aluuwo iri báy, «Aá heewí, kitaábuuwí ni hanmiis /ayeek, guruuwók dalaa/eek.» Kitaábuudá' nguri /aáy, naxés baraá afkueene tsuaarirós a adór tiqár danú.

⁴ Iri báy, «Heewí, tláw dír múk Israeli, kangw'eé' kwí baweek.

⁵ Aníng kuúng u ya/abitaaká dír xoorór kuúng ta tsifri xuaká, nee axweesanti'ín ta axamiská, ala dír uy ya/aaw a dír múk Israeli.

⁶ U ya/abitaaká dír xoordaá yaariir awa tsifir hatlo nee awa tsifri gawden, tidá' kuúng ta xuaká. Asma geeraawo barnaxes un ya/abiít dír múk adór kwí, ar ló' geeraawo inooín kuúng u axaasiyá'.

⁷ Ala múk Israeli kuúng u iiaárií qaasiiká, asma inooín aníng iiaárií qaasaro i slaiaaká. Múk Israeli sleémeerowo a múk sage gawdén nee muner'ine.

⁸ Ga/aaweek, aníng kuúng ugwa gawdeés dir'ine, sagók ugwa gawdeés dír sager'ín tidá' gawdene.

⁹ Aníng kuúng u pihháy qaás, tay adór miislidá' gawit ta umuúqo tlaa/anoowo, an adoodá' ura saga gawdeés. Kuúng inooín mi da'ayumitaar, nee sleeme gitsee/er'ín muwa dae tláq, asma mukwí an múk aa dee/anuut.»

¹⁰ Iri male báy, «Heewí, axweesantí ni kuúng babaw sleémeero baraá muunaáwók ti qas, nee iiaárií qaasa hhe'eeseek.

¹¹ Daqaní ta tleér amór mukók kudá' taa loohatís nee ki beer, ‹Aakoó MUNGÚ gár i kaahi a tí.› Tam ngi axaasiyá' laqaá tam ngi axaasiaakahe, kuúng kángw baweek.»

¹² Aluuwo qeeru iri gáwtí tleés, afór adór kunselír ur ana aluueé' axaás, i kat, «I xirfuuti xirfuú AAKOÓ MUNGÚ oo gawaá doori.»

¹³ Nee sleeme ana axaás afór hhaampa'aá muruudá' slaáf, kudá' ti kwatimiitá', dinkwa nee afór /angeegéuudá' ti tuu'uút, kuduú bihhaaín.

¹⁴ Naagáy qeeru iri gáwtí tleés iri puruúts amór saaw. Niri tláw amooqae aga slahhaá', nari qa/iít baraá muunaáeene, nee /uuruú AAKOÓ MUNGÚ ina hatsiís.

¹⁵ Mukduú baraá loohaay nguri i hardáh, kudá' bihhaá Kebarírí dirií', tidár baraá Tel-abibu. Niri didá' wa hoót nee inooín deelo faanqw, amorqae gár ni xuu' i káhh.

Esekieli kuwa ateét tawa xuumusmo

¹⁶ Alaá deelo faanqwe axweesantá AAKOÓ MUNGÚ ana axaás, i kat,

¹⁷ «Heewí, aníng kuúng ugwa xuumusmoó múk Israelír wa qaás. Aníng gaa birnga oó' dirók, kuúng mukwí ku naanáq kitangw'eé' wa aleeró.

¹⁸ Aníng barnaxes heé tlaákw ugwa báw, ‹Ar loe kuúng a gwá',› aluuwo bar kuúng ugwa naanaqiká, laqaá ugwa beeriká, ‹Tlakweema maweek,› as slafiingós nguwa ba/amis, naagáy heewí tlaákw iri gwaá' baraá tlakweemawós, tseereerós ngi gawaawók i iinuús.

¹⁹ Ala kuúng barnaxes heewuú tlakusmo ugwa naanáq, nee tlakweemawós gaa mayká, laqaá loohirós tí tlaakw gaa mayká, heewí i baraá tlakweemawós i gwaa', ala kuúng slafiingók ugwa ba/amís.

²⁰ «Slám malé alé heé gan'amuú koóm, bar gan'amuwós gwa máy nee tlakweema gay tleéhh, aníng nguri dukutsamoó i qaás, heewí iri gwaá', asma kuúng kuwa naanaqiká heewí i gwaa' as tlakweemaawós, tam tlehhmi'iiwós kudá' hho' ki inslayká. Ala tseereerós a iinuús gawaawók i alé.

²¹ Ala heé geeraawo gan'amuú koóm bur naanáq as tlakweema mingiwa tleéhh, inós gay tleehhiiká, ar loe heewí i hoot asma hara'ayaarók gaa ya/án, nee kuúng slafiingók ugwa ba/amís.»

Esekieli aa afawasli tleehhiít

²² /Uuruú AAKOÓ MUNGÚ aníng ina hatsiís, iri báy, «Sihhiít, tláw ay dír tlapapaai. Aníng nee kuúng a amoodá' wa axweesaán.»

²³ Naagáy niri sihhiít, niri tláw ay dír tlapapaaidá'. Héh, amoodae xirfuú AAKOÓ MUNGÚ una ár, aa sihhiít adoodá' ira sihhiít qoomaadár niwa dír yaaér Kebari, aníng niri i gurúr qaát.

²⁴ Ala qeeru iri i dáh, iri galaalaá' sihhitisaro. Naagáy Mungú iri axweés nee aníng, iri báy, «Tláw, ti baraá do'ók i tsek.

²⁵ Heewí, kuúng tu tseek ar hima as tawa ti'itaká nee tawa amór múk keeraaká.

²⁶ Aníng tsifraangók u iilooeés, nee kuúng a afawasli tleehhít as muu kuwa iigahhatká as tawa dee/aanuuse.

²⁷ Ala qoomár bar nee kuúng a axweesaán, aníng afkók u waatleés, daqaní kuúng ki beer axweesanaywí ni kah, AAKOÓ MUNGÚ nguna oó'. Heé kuúng u iiárií qaás uqo iiárií qaas, oo axweesantók ga sií' gaqo sii', asma mukwí a múk aa dee/anumiit.»