ESEKIELI 28 - Biblía Axweesantá Hhohho' ar Mungú 2004

Aaru'uumár daanduú waawutmoó Tiro

¹ Axweesantá AAKOÓ MUNGÚ ana axaás, i kat,

² «Heewí, waawutmoó Tiro baweek anuú AAKOÓ MUNGÚ a kah, Kuúng aga ló'wa pooraa/amút sagabi/uuwo, sleeme tari ó', ‹Aníng a mungú, aga iwiít gawaá kitángw waawuti'iima oo munguaá hatlá', aga iwiít baraá tláwtí alé.› Ala kuúng a heé tawo, kuúng a munguheeká. Tam sagalooarók kilók a ara'aanda tawa adór taqár mungú.

³ Áx gimáy, baré ka xu' kuúng Danieli u bá/ sagalooaro, kuúng ka xu' naaqór ta xu'uká i káhh.

⁴ Ar sagalooarók nee fuquraangoge daqaari'iimár yaariir aga sleér, sahaábu nee peésár yaariir iga burumbút nee kari qás baraá do'ók i alé.

⁵ Ar fuquraangók oo yaariír baraá halaanu'uumaro, daqaari'iimarók aga tlahhás, tari daara/út as daqaari'iimarók.

⁶ «Gawaá adoorihe anuú Aakoó MUNGÚ a kah, Asma kuúng tiwa xu' sagalooaro tawa adór Mungú,

⁷ gawaá adoorihe, ga/aaweek, aníng dahaaye ngi amoorók i tleés, xoorór ló'wa xaraasl baraá xoorduuwo. Inooín sagalooarók tidá' ló'wa qoom ka suwatsaat ar paánga, nee hhohhoaarirók kari slasla/arees.

⁸ Inooín un /aytisiyá' baraá bohoongw, kuúng tari gwá' ar gwa'arár tlakw adór tigár hee aa /eet baraá iltá ma'aay.

⁹ Xáy, kuúng aqo kumíta tawa kat, ‹Aníng a mungú,› dír geeraá mukdá' kuúng u gaamisa? Kuúng tin tsáhh adór tar hee, ala a munguheeká dír geeraá mukdá' kuúng u tlaqmiisa'a.

¹⁰ Kuúng a gwá' ar gwa'arár heé taa hhehhe'eesiiká gawaá dabaá xoordaá hatlá'. Asma anuú Aakoó MUNGÚ tí aga oó'.»

Hu'uumaá waawutmoó Tiro

¹¹ Axweesantá AAKOÓ MUNGÚ ana malé axaás, i kat,

¹² «Heewí, tsuunqumiís daanduú waawutmoó múk Tirowo. Ku beer, Aakoó MUNGÚ i kaahi, Kuúng aáng a slaqsoó ganaá', sagalooaro a háts, nee tu ló'wa hhoohhoó'.

¹³ Ana Edenír wa hót, dír asalmoó Mungú, tuna qaalín ar tlaa/aá tlaxo uren, awa akiíki, nee topaási, nee yáspi, nee sabarajaádi, nee beriíli, nee sardoniíki, nee yakuúti-sirboo/, nee miisli, nee sumariídi. Tuna qaalín ar sahaábu hhohhó'. Muruuwí sleémeero kuna amohhe'eés as kuúng, iimír bál tuwa tleéhh.

¹⁴ Aníng keruúbi una tsawaár as kuúng uwa xun, kuúng ana hót gawaá tloomar'eé' tidá' hhoohhoó' wa alé, nee ana hi'imít baraá tlaa/aá qwiirii/á' wa ale.

¹⁵ Kuúng tu lo'o wásl baraá hotaawoge, iimidá' tuwa tleéhh ay qoomaadá' tlakweema kiwa iimu/uún tlehhtuuwo.

¹⁶ Slaasláwár yaariir ar taa sleér uri malgu'uumár ar eér, nee tlakweema kiri tléhh. Gawaá adoorihe án un guús adór gár slasla/aár wa ale dír tloomar'eé' tidá' hhoohhooe. Nee keruúbidá' u xuúm uri tlatlahhás amór saaw baraá tla/ángw tlaa/eedá' qwiirii/á' wa ale.

¹⁷ Ana daara/út asma tuwa hhoohhoó', sagalooarók ana hhitiín ar xirfuuwók, aníng kuúng una yaamií kwaáhh, uri murekeés dír ilaá waawitá wa ale.

¹⁸ As tlakweemaawók kudá' naa tlahhiye', nee halaanu'uumarók tidár /ayta taa tlehhít, dirók tidá' hhoohhoo' kari meetagás. Gawaá adoorihe aníng asla ngi baraawók wa duúx, inós kuúng uri hhaamís. Aníng kuúng uri da/ara tleéhh baraá yaamuwo dír ilaá muu sleémeero kudá' kuúng ga/aawa'a.

¹⁹ Kudá' sleémeero u xuá', daér yaariir gaa eér as kuúng. Alhhe'eesoó tlaákw ugwa eér, nee a male slafíngw i ki/iká tam ay alhhe'eesay wasle.»

Aaru'uuma daanduú Sidoni

²⁰ Axweesantá AAKOÓ MUNGÚ ana axaás, i kat,

²¹ «Heewí, warqáw amór gixsár Sidoni.

²² Aariím daanduuwose, ka beer, Aakoó MUNGÚ i kaahi, ‹Kiíng Sidoóni, ga/aaweek, aníng nee kiíng ti araán, nee xirfuueé' nguri laqaám baraawók wa alé, qoomár sakwasleemar'eé' bara boo/eés daanduuwoge. Nee hhohhoartaeé' ngiri laqaám. Daqaní aníng kuungá' i tsahhá' adór aníng tar AAKOÓ MUNGÚ.

²³ Aníng tiqti ngi amoorók i kwaáhh, nee tseerdu kiri ku'uus baraá lohduuwoge, muu kuri tsuu/ baraawoge, umuú barto kiri tsuu/ ar paánga. Daqaní kari tsaahh adór aníng tar AAKOÓ MUNGÚ.› »

Múk Israeli tsuuqa gi sláy

²⁴ «Xoorduudaá inslaawoó múk Israeli i sangw kumiitiaaká múk Israeli nguwa slahh'eemisiya' ar adór laqaya nee fuquráy. Daqaní kari tsaahh adór aníng tar Aakoó MUNGÚ.

²⁵ «Anuú Aakoó MUNGÚ a kah, Án múk Israeli un burumbuúr nee nguri dinkwárí ki/ís baraá xoordu sleémeero amoodá' ni diyaya/atiyé'. Gawaá adoorihe múk xoordaá hatlá' gari tsaahh adór aníng tir hhoohhoó'. Múk Israeli tari hoot baraá yaamuudá' aníng naa sagadiyusmooeé' Yakobo ii haniís.

²⁶ Inooín tari baraaká' wa hoot ar saxareema, maray'ín ngiri tleehhiyá' nee xaa'aá sabiíbu ngiri dahaasiyá'. Inooín tari hoot ar saxareema, asma xoorduudá' inooín ngi slahh'eemiisá' aníng i sakwasleemuút. Daqaní inooín ngiri tsaahhiyá' adór aníng tar AAKOÓ MUNGÚ, Munguúín.»