ESEKIELI 26 - Biblía Axweesantá Hhohho' ar Mungú 2004

Aaru'uuma daanduú múk Tiro

¹ Bál geera ar slahhaangw oo kurkú mibaá nee wak, axweesantá AAKOÓ MUNGÚ ana axaás, i kat,

² «Heewí, múk Tiro, múk Yerusalemu ngwa sawaaqasené' tawa kaahi, ‹Ahaá ala, Yerusalemu gixsadá' muu sleémeero ira waaraáhh, kaa hhaáf, daxta atén pa/aangw ugwa slawaán, daqaari'iimarós kaa hhitín.›

³ Gawaá adoorihe, anuú Aakoó MUNGÚ a kah, Aníng daxta nee kiíng Tiro ti araán. Xoordaá yaariir ngi tleés, inooín kiíng in i haratlayá' adór gwaanduú ma'aay.

⁴ Inooín koo/irók nee kiteeridaá tsaa'aso kay qamaamin ngi fee/iyá'. Aníng hhapeerók an paapa/aás, nee tlaa/ár kaahaar iri met.

⁵ Tari yaamaá kaahaar tleehhít awa baraá tla/ángw tlawi, nee múk siyoó ohiím baratsufay'ín nguri gawaadí intlaahán. Anuú Aakoó MUNGÚ tí ngina oó'. Xoordu iri ar tlayá' haasaáng wa alé,

⁶ nee gixsadaá hatlá' awa inslaawaywók kudaá baraá aya in hhaamiís sleeme. Daqaní inooín ngiri tsaahhiyá' adór aníng tar AAKOÓ MUNGÚ.

⁷ «Anuú Aakoó MUNGÚ a kah, waawutmo Nebukadnesa oo múk Babuloni, waawutmoó waawitá ngu /iikú wa huúw, nee farsuuwós nee gaardaá slaqwaraaro nee slaqwaruuseedá' faras gwa i tsa/aandi, nee slaqwaruusér yaariire, Tiro ngin i haratlayá' ngiri haraweeliyá'.

⁸ Inós gixsadaá inslaawaywók kudá' baraá aya giri hhaamiis. Kiíng tiri haraweel badu sleémeero adór koo/i, ufér hhape kari dalaa/ dír koo/irók, kari tuuntuuk ar gaambu as tiwa baraadií ilaa/i.

⁹ Gufteraá koo/i fe/it gi geeraá koo/írí qaas, nee /ampuuwók awa xuuma giri fee/ ar suruúru.

¹⁰ Farsuú waawutmo Nebukadnesa ku ló'wa úr, nee teeri birnga gáwtí tleesiyé' iri tuuntúk. Koo/i iri daaraxát as kududuhoó slaqwaruusér faras gwaa i tsa/aan, nee gaardaá slaqwara nee kudá' huwaá koomá', qoomár bir darah afkú gixsaroge a adór múk daráh baraá gixsa ar dír aa fee/it.

¹¹ Ar fuqeenaá farsuine ayaawók sleémeero gun adarah, mukók guri tsuu/ ar paánga, maraywók kudá' tlet giri yaamií daraahh.

¹² Daqaari'iimarók ngiri ar tlayá' nee umuú gaaro ar ta koonda. Koo/irók ngi fee/iyá', nee marayhúng kudá' xirfayen ki yaamií daahh, kudaá tlaa/e nee awa peehháy, nee hhapeedá' taa maraysír tlehhé' gari ku'uus baraá tlawi.

¹³ Tsimaahhír daa'aangw a hhaamiís. Afór gidandoorayhúng a male axasa'aaká.

¹⁴ Nuri tlaa/ár kaahaar tleéhh, tari dír baratsufaay kway intlaahan, nee ti malé tleehhiiká. Asma anuú AAKOÓ MUNGÚ tí ngina oó'.»

¹⁵ Anuú Aakoó MUNGÚ Tiro an babaw, «Yaamuloouusér afaá tlawi tlunaa/ír huuamaawók birnga axaasiyé', nee /aa/aá múk taa slahh'eemisi, nee kudá' taa tsu/i afor'ín barka axaás tari daaraxaat.

¹⁶ Waawitá sleémeero kuduú yaamaá afaá tlawi tari huuhu'ún gawaá kiteeri'ín kudaá waawuti'iimaro, nee him'er'ín ngiri gweeriyá', tlabaaín kudaá ilaiwa/ame taa parootuús ngi duuxiyá'. Inooín daér yaariir giri eér, tari yaamií iwiit, inooín qooma sleémeerowo tari daaraax nee tari ló'wa da'ayuut daanduú tí iga sleeri.

¹⁷ Inooín tiri satsuunqumiis ar afór ur, tari ooi, ‹Kiíng gixsár iia tleer taa hhaamiís, taa amór tlawtá wa kwaáhh! Kiíng nee yaamuloouuseerók /uuru una laqaandé' daanduú tlawto, tidá' taa da'ayumiít nee múk yaamaá kaahaar sleémeero.

¹⁸ Hamí daxta yaamuudá' saawá' afaá tlawto naa daaraxatiyé' asma hu'umaawók. Kudá' sawen naa kwisliitiyé' as kiíng tawa hhaán.›

¹⁹ «Asma anuú Aakoó MUNGÚ a kah, Kiíng Tiro i sluhhi tleéhh adór gixsadaá muu iwa lóh, qoomár ma'aay birnga baraá iltá wa huúw, nee ma'aá yaariir iri tuuntuukiyá'.

²⁰ Aníng kiíng in /aytiís baraá bohoongw as iwa haragaas amór mukdá' baraadá' i dirií', kuduú aáng. Tari baraadá' wa hót ay alhhe'eesáy wasle, múk baraawók i hotaá áw i kaahh, nee pa/aangw u sleeraaká baraá yaamaá múk slafa.

²¹ Aníng kiíng i gár dae tlaaq tleéhh, an sangw baloó deerutká. Tam ti leelehhtuú aya ti baloó slayká. Anuú Aakoó MUNGÚ tí ngina oó'.»