ESEKIELI 25 - Biblía Axweesantá Hhohho' ar Mungú 2004

Aaru'uuma daanduú múk Amoni

¹ Axweesantá AAKOÓ MUNGÚ ana axaás, i kat,

² «Heewí, amór múk Amoni i warqaweek, aariím daanduuine.

³ Múk Amoni ku beer, Axweesantá Aakoó MUNGÚ iiaárií qaasaak, Aakoó MUNGÚ i kaahi, Kuungá' qoomár dír hotaaeé' kawa meetagaás, alaá múk Israeli kuwa hhaamiís, nee múk Yuda kuwa loohatmisi, ana niqár oé', ‹Ahaá ala›.

⁴ Gawaá adoorihe aníng kuungá' nu qaás gawaá dabaá múk da/aáw as tunduwa aali. Inooín xafay'ín ngun tleehhiyá' baraá tla/angwhúng, nee heemaduuín ngin kiki'iyá' baraá yaamuuhúng. Inooín mamaá ayaahúng ngiri /ayiyá', nee ilwaahúng ngiri wahná'.

⁵ Gixsár Raba a qawtaantá angaamía tleéhh, nee yaamaá Amoni i slumtá bee/aangw tleéhh. Daqaní kuungá' kari tsahhá' adór aníng tar AAKOÓ MUNGÚ.

⁶ «Anuú Aakoó MUNGÚ a kah, As kuungá' tsa/i kiwa slahhé', tari ni/iindé', nee tari bar/é' as yaamaá Israeli,

⁷ gawaá adoorihe aníng dakw'eé' ugwa gawaahúng i tleés. Naa haniís tunduwa ar tlay nee xoordaá hatlá'. Aníng kuungá' nu hhaamiís baraá xoorduuwo, nuri suqúw baraá yaamuwo. Daqaní kuungá' kari tsahhá' adór aníng tar AAKOÓ MUNGÚ.»

Aaru'uuma daanduú múk Moabu

⁸ Aakoó MUNGÚ i kaahi, «As múk Moabu tawa oó', ‹Múk Yuda a slaqás nee xoordaá hatlá'›,

⁹ gawaá adoorihe aníng gixsaduudaá digeemaá yaamaá Moabu xuumá' in máw kiwa i haratlay, tam gixsaduudá' ló'wa afhhamit awa Bet-yeshimoti, nee Ba'al-meoni nee Kiriataimu.

¹⁰ Yaamaá múk Moabu nee awa múk Amoni i haniís dír dabaá múk da/aáw as tawa kooín. Múk Moabu i malé xooro tleehhitiiká.

¹¹ Aníng yaamaá múk Moabu i sakwasleemuút, inooín ngiri tsaahhiyá' adór aníng tar AAKOÓ MUNGÚ.»

Aaru'uuma daanduú múk Edomu

¹² Aakoó MUNGÚ i kaahi, «Asma múk Edomu li/aay guna buú' dír múk Yuda, li/oó ló'wa tlaákw kuna buú'.

¹³ Gawaá adoorihe, anuú Aakoó MUNGÚ a kah, Aníng dakw'eé' u tleés gawaá múk Edomu, nee muu sleémeero nee makaywo ngiri tsuú/. Yaamuuín i deewa'atís iimír gixsár Temani ay gixsár Dedani, muu ku hhaamiis ar paánga.

¹⁴ Muk'eé' oo Israeli un aleesleemuú i haniís oo li/ay nguwa buiya' dír múk Edomu, inooín adoodá' buhhtaaeé' i dirii'iya' ngi tleehhiyá' dir'ín i alé. Múk Edomu ilooeemaá li/aydá' aníng ni buu' giri tsaahhh. Anuú Aakoó MUNGÚ tí ngina oó'.»

Aaru'uuma daanduú múk Filisti

¹⁵ Aakoó MUNGÚ i kaahi, «Asma múk Filisti magoót ngina tseegiyé', li/aay nguri buiyé' dír wakuuser'ín ar buhhtaá tlakw, nee tari dáh baraá wakaarír baloó faakaaká,

¹⁶ gawaá adoorihe anuú Aakoó MUNGÚ dakw'eé' un tleés gawaá múk Filisti, aníng múk Kereti nee kuduú afaá tlawto un hhaamiís.

¹⁷ Aníng li/aay un buú' ar xarasleema nee mune. Diirí an didá' aníng iwa tsaahhiya' adór tar AAKOÓ MUNGÚ, qoomár bar li/ay'eé' ugwa gawaaíní buú'.»