ESEKIELI 24 - Biblía Axweesantá Hhohho' ar Mungú 2004

Hutloó baytuú koóm

¹ Bál slahhángw mibaangw tawa mibaangw oo kurkú gwaleél iimír atén tiwa loohatís, axweesantá AAKOÓ MUNGÚ ana axaás, i kat,

² «Heewí, baalaarír laarí gooiimeek, asma laarír kilae waawutmoó Babuloni gixsár Yerusalemu harweeramooro ga iimu/ún.

³ Muk'eé' kwí aa dee/anuut slaqsaywí tay laqaan, nee ki beer, Aníng Aakoó MUNGÚ a kah, ‹Hutlaay qaaseek gawaá akweeso, ku ma'áy qasá'.

⁴ Fu'unaay baraá hutlaay ti qas, fu'unaá hhohho', nee weegamoó ya'a' nee kwahhu nee fadaá hhohho' qaaseek sleeme.

⁵ Fu'unaá hhohho' awa bee/ír slaqwa hhoo' tleehheek, gufteeri qaaseek baraá asla, fu'unaay nee fadu dinkwárí humiimeek, sleémeero humro hhe'eeseek.›

⁶ Gawaá adoorihe anuú Aakoó MUNGÚ a kah, ‹Tsaxwaawós gixsadá' tsu/umamiit, gixsarí an adór muqslír kuútuú koom, kuútuú baloó tu/uutaká, weegamoó fu'unaay baraawose kun wakeetín duxuungo, slám ku tsawditiiká.

⁷ Baraá gixsarihe taa tsu/uút, tseere kaa baraá hhapér i ku'uusiiká as kawa tipi, ala tseere kana ku'uús gawaá daanduú tlaa/a.

⁸ Aníng tseereedá' aga máw gawaá daanduú tlaa/árí alé, as makawa tiíp as buhhtaaeé' ngiwa gwarangwariin nee li/aay nguwa buu'.›

⁹ «Gawaá adoorihe, anuú Aakoó MUNGÚ a kah, ‹Tsaxwaawós gixsár tsu/umamiit. Aníng ufuú yaariír oo migír un burumbuúr.

¹⁰ Gufteeri ngi huúw nee asla ngiri oohiís, fu'unaay ngiri ló'wa humiím. In humiím ma'aá fu'unaay niri /oná' nee fadu asla giri /ák.

¹¹ Hutlaay un kaahareema qaás gawaá asla as asla ngiwa ló'wa /ak, muqslidá' kura tleéhh ngiwa eemu hhe'es, as slasla/aruuwós iwa wanana'aati nee kuútuwós asla nguwa /ak.

¹² Ala aníng aqo gadiyér tawo an tleéhh, kuútuuwós ku ló'wa úr tam asla gu aleesleeraaká.

¹³ Kuútuudá' an slasla/aruú fuqtók, ala tam aníng kiíng iga iiari hheehhe'eesaro, kiíng ana kilók met baraá slasla/aruuwók, kiíng aqo sangw baloó hhoohhouuraaká malé alé ay dír buhhtaaeé' ngay boo/ees daanduuwoge.

¹⁴ Anuú Aakoó MUNGÚ tí ngina oó'. Gaarí i bó/, aníng a tleéhh. Gár adór tihe aníng a lakiitaaká, laqaá gurueé' i tlayká nee a warqawaaká. I sakwasleemuút ar har qoomoó adoodá' tar hotaatiin nee tlehhmi'iiwók.› Anuú Aakoó MUNGÚ tí ngina oó'.»

Gwa'arár harér aarusmo

¹⁵ Axweesantá AAKOÓ MUNGÚ ana malé axaás, i kat,

¹⁶ «Heewí, ga/aaweek, slahhtá wake sla'aaruso'oorók a hingeés, ala ma tsuunqusaar, laqaá ma /aa/aar, tam hhirhheeriwók mindiwa ti'itiyé'.

¹⁷ Ala tawo quruú/, ma tseeaar. Heewí aa gwaa' mu sa tsuunqusaar. Ya/ataawók dahaaseek, nee warqamoowók oo saga tseegeek, afkók mu lu/aar, laqaá muruú /aymár tsuunqumis mu /ayaar.»

¹⁸ Naagáy matlaatleero ana axweesaán nee muu, tsiindoowo harer'eé' iri gwá'. Matlaatlér taa kawaani tidá' taa báy ana tleéhh.

¹⁹ Muu iri yaahaás, «Ahaá, gaarí ta atén i tlehhit a milá?»

²⁰ Ngiri mu/aywaáts, giri báw, «AAKOÓ MUNGÚ ina ádbáy,

²¹ aníng kuungá' nuwa baw, Aakoó MUNGÚ dír hotaawós ga meetagaas, do'duú xirfuuhúng, nee handá' kuungá' nu qwal/atmís bur ga/eerá'. Tam na/iihúng awa daaqaay nee awa dasuuwo kudá' taa alií geexeeré' ki tsuu/ ar paánga.

²² Kuungá' adoodá' aníng naa tleéhh an tlehhá'. Aferhúng a lu/aa'aaká, laqaá muruú /aymár tsuunqumis u /ag'aaká.

²³ Warqamaá sagerhúng in tsegá' nee ya/atahúng in dahasá'. Kuungá' a tsuunqusa'aaká, laqaá a /a/a'aaká. Slám kuungá' tari hhimaamiá' as tlakweemaahúng, tiri kiloohúng i qununu/á'.

²⁴ Anuú Esekieli an slaqsaay dirhunge, umuú gár naa tleehhi kuungá' an tlehhá'. Qoomár muruuwí sleémeero bira boó/, daqaní kuungá' a tsahhá' adór inós tar Aakoó MUNGÚ.»

²⁵ AAKOÓ MUNGÚ ina báy, «Heewí, bál gadaádá' inooín i harahhifiya' bara hingeés, tidár qwal/uuín nee xirfuuín, didií ló'wa slaiya' xuxu'uungo, na/ii'ín awa daaqaay nee awa dasuuwo in hingeés,

²⁶ baalaadae heé naa kotsoqoot ni hardah, kaangwí ngu ooár áy.

²⁷ Baalaarír kilae afkók iri gweeriit, kuúng nee panmoodá' tari axweesá'. Gawaá adoorihe kuúng tari laya dir'ine, nee inooín ngiri tsaahhiyá' adór aníng tar AAKOÓ MUNGÚ.»