ESEKIELI 23 - Biblía Axweesantá Hhohho' ar Mungú 2004

Múk Samaria a fuquuse

¹ Axweesantá AAKOÓ MUNGÚ ana axaás, i kat,

² «Heewí, dasuuko tsár taa laqwaál nee aayór wák i deer.

³ Qoomár inooín tawa dasuú /amaatliite tawa yaamaá Misrír hooti, inooín tana fquús, asma tana ya/án iseemaaín kiwa kwatmiiti nee daaqaay, nee kiwa harneeti inooín niri sli'imuuse tleehhitiyé'.

⁴ Dasír ur ka bay Ohola, nee ar niina ka bay Oholiba. Naagáy sleémeero nay kwe'eé' tleehhitiyé', na/iieé' awa daaqaay nee awa dasuuwo ngiri laqwaaliyé'. Ohola a gixsár Samaria nee Oholiba a gixár Yerusalemu.

⁵ Ala tam Oholiba a harer'eene, inós ina kumít fuqto, nee sla'aaruuseerós tidár yaamá Ashuru gana ilatleerús.

⁶ Sla'aaruuseerós tí a slaqwaruusér tlabaá sirbo/ ngaa dahas, nee a waawitá nee geeraharuusér slaqwara. Inooín sleémeero a masoombár hhohho' nee a múk farsuú xuú' i tsa/amtooro.

⁷ Ohola tsaatu'uuma gana tléhh nee waawituú Ashuru sleémeero, inós tiri meetagás ar munguaá slaqsi'iidá' sleémeero awa umuú hhawaatuú aa slai.

⁸ Inós ina kumít tsaatu'uuma tlehhtuuwo, tidá' aa iimu/uún iimír qoomár iwa baraá yaamaá Misri, qoomaadá' tawa dasír /amaatliito'o, nee hhawaate nina alqaatiyé', slaqooín ngiri tsaeemisiyé' dirós wa ale.

⁹ Gawaá adoorihe aníng inós ngiri haniís dabaá sla'aaruuseerós tidár Ashuru, tidá' inós aa ló'wa slá'.

¹⁰ Mukwí inós gana tlaba' duúx, gari /aankweetsií geexáy. Na/iiwós kina ohín, nee inósár kilá' kari gaás ar paánga. Sakwasleemár aa sleér tari intsaahhasa dír /ameenár hatlae.

¹¹ «Hho'oorós Oholiba adoorí gana aán, ala inós ina ak harwaaráhh tlehhma'aá fuqto, tlehhmi'iiwós ki ak tlakw ta awa hho'oorós Oholaro.

¹² Inós múk Ashuru guna ló'wa ilatleerús nee ga/awuuseero, nee geeraharuusér slaqwara, nee slaqwaruuseedá' tlabaá slaqwara gaa dahas, nee slaqwaruusér faras i tsa/amtooro gu ló'wa xuu', inooín sleémeero a masoombár hhohho'.

¹³ Ana tsaáhh adór inós tira ló'wa meetagás. Ala looeemaawo inooín tsaraawo ta alqón.

¹⁴ «Ala Oholiba fuqtós gana ló'wa tlahhás, sleeme kari sla'atís nee slaqsa'aá múk Kaldayo, kudá' taa gooín baraá koo/írí alé, kari qaalín ar kal'aá da/aten,

¹⁵ i him'ér koná' afetleero, nee gawaá sager'ine i warqamaá urén koná'. Sleémeero a slaqmís nee waawitá, slaqsa'aá múk Babuloni, yaamuloouusér yaamaá Kaldayo.

¹⁶ Inós slaqsi'iikaá mukwí ngiwa aán, hheehha gari gás, gura' gari óh, ya/abuuse gari ya/áp ay yaamaá Kaldayo.

¹⁷ Naagáy, múk Babuloni iri amoorósií qatuú áy. Ngiri slasla/aresiyé' ar ilatleerir'ín tidá'. Qoomár ngiwa hhe'eesiyé' slasla/areesaro, inós iri amoosií tleér as tiwa aahhiyé'.

¹⁸ Inós iwa kumít fuqto nee /aankwetsuuwós laqaqaango, aníng ana máw adoodár kilá' aáng hho'oorós ngira máw.

¹⁹ Tam adoorihe ina ak búhh fuqto adoodár kilá' tawa /amaatliito'o ira fuqús baraá yaamaá Misrír wa alé.

²⁰ Inós hhawaataá aa ló'wa slá' a kudá' hheehhar'in adór taqár daqwaaye, nee kudaá /uuruuín oo xwayla oo adór kuquú farsuú yaqaambe.»

Sakwasleemár Mungú daanduú Yerusalemuro

²¹ «Oholiba slasla/aruuwók una slá', kudá' kiíng tawa /amaatliito'o qoomár iwa baraá yaamá Misri, qoomaadá' múk Misri nee kiíng tawa alqaté', iseemiwós kudá' ninakw kiri kwatmiít.

²² «Hám daxta kiíng Oholiba, anuú Aakoó MUNGÚ a kah, ‹Aníng sla'aaruuseerók tidá' aáng taa geexeér ar aahhi ngi kiíngí tleés, ngi huúw iwa i haratleer bihhe sleémeerowo.

²³ Aníng múk Babuloni ngu dúk, nee oo Kaldayowo, nee mukduú Pekodi sleémeero, nee oo Shoa nee Koa, dinkwa nee múk Ashuru sleémeero. Aníng masoombár hhohho' ngi dúk sleémeero nee ga/awuuse, nee geeraharuusér slaqwaruuse, nee waawitá nee slaqwaruuse sleémeerowo tidá' aa tsa/aan gawaá faras.

²⁴ Múk /iikú daáhh ni hardah ar gardaá slaqwara nee awa huwa loohisoro. Inooín múk yaariír ngun geerahariyá'. Kiíng in harweeriyá' bihhe sleémeero ar gaambudaá uren nee awa ninakwe nee kifiyadaá muqsla. Aníng aleesleemuú kiíng iwa sakwasleemutiyá' ugwa haniís, inooín kiíng tin sakwasleemuut ar daber'ín.

²⁵ Aníng kiíng in i buúhh, inooín kiíng iri slahh'eemisiyá' ar buhhtaá xaraaslá', kiíng in duunga tsatiyá' nee iaawo, nee mukók kudá' aa meet kuri tsuú/ ar paánga. Na/iiwók awa daaqaay nee awa dasuuwo kin ar tláy, nee mukók kudá' aa meet kuri qororo'oos ar asla.

²⁶ Tlabaawók ngi duuxiyá' nee xosluuwók kudá' hhohho' awa parooti taa tleéhh ar tlaa/aá tlaxo gawden.

²⁷ Tsaatu'uumarók tidá' ta tlehhaahhit iimír baraá yaamaá Misrír wa alé a suqúw. Daanduú slaqsa'aá munguaá hatlá' i baloó insleeraaká malé alé, laqaá yaamaá Misri i malé insleeraaká.›

²⁸ «Anuú Aakoó MUNGÚ a kah, ‹Aníng kiíng i qaás gawaá dabaá wakuuseerók, tidá' kiíng taa áhh, dabaá kudá' nee kiíng taa wake'.

²⁹ As adoodá' kiíng iwa slaiaaká, mamaá gadiyér dabaawók ngin hayoohiyá', tlabaawók kiri hayoh iri /aankwetsisiyá', /aankwetsuú tsaatu'uumarók gár kur lu/ iri qwát. Kaangwí gár kusa sleér a as tsaatu'uumarók nee fuqtók.

³⁰ Kiíng ana fuqús nee xoordaá hatlá', tiri meetagás ar slaqsi'ii'ín kudaá munguaá hatlá'.

³¹ Kiíng loohír hho'oorók ana eehát, gawaá adoorihe aníng xooslmooduú sakwasleema oo hho'oorók ngun kiíngí haniís as kuwa wat.›

³² «Anuú Aakoó MUNGÚ a kah, ‹Naxooro a wát baraá xooslmooduú hho'oorók kudá' tleér yaangariír, muu iri waaqasén iri waaqaa', slám xooslmoowók i haats.

³³ Tari oonít, tari gurhaamút, asma xooslmoduú hho'oorók Samaria a xooslmoó dae tlaáq nee oo hhaamimiís.

³⁴ An baraá xooslmoowí wát, kuri tsaanqás, kuri parhhamaamís ar sihhnaawók, kuri iseemiiwók ar karslamís.› Anuú Aakoó MUNGÚ tí ngina oó'.

³⁵ «Gawaá adoorihe anuú Aakoó MUNGÚ a kah, ‹As aníng iwa gunqaarés nee iwa daanduú xu'ús, daxta a aán as tsaatu'uumarók nee fuqtók.› »

Sakwasleemár Mungú daanduú múk Samaria nee Yerusalemu

³⁶ AAKOÓ MUNGÚ ina báy, «Heewí, kuúng tu amohhoóe Ohola nee Oholiba sakwasleemaro? Gimáy, tlehhmi'ii'ín kudá' ta waki alki/iteek.

³⁷ Inooín nina fuqusiyé' nee naa tsu/uutiyé'. Tsaatu'uuma ngaa tleehhiyé' dír slaqsi'idaá munguaá hatlá', nee na/ii'ín kudá' naa aníng i laqwaaliyé' ngina ilahhooár wa hanisiyé' dír slaqsi'iidá'.

³⁸ Slám a tí kiloseeká, dooeé' nguna waaqaaiyé' nee deelor'eé' tidár Sabaáto ngina meetagaasiyé'.

³⁹ Asma baalaadár kilae na/ii'ín ngiwa ilahhooár wa tsu/iyé' dír slaqsi'iidaá munguaá hatlá', nina hardihiyé' ay dír dooeé' kudá' hhoohhoó', ngway meetagaasiyé'. Adoorí an adoodá' naa tleehhiyé' baraá dooeé' wa ale.

⁴⁰ «Tam ya/abuuse kana ya/abiít amór muk'ín kudá' sawén, nee hhawaate niri hardihiyé'. Kuungá' tari hamtliindé' as inooín, hhamhhamaá ilaahúng kiri slikiinde ar wahaaso tiri parootusé' ar tlaa/aá tlaxo gawden.

⁴¹ Aluuwo tari iwité' gawaá kiteeraá hhohhó' nee meésár ta tlabií hhaáf kari geeraaíní qasé'. Gawaá daanduú meésarihe mooyangw'eé' kudá' tsuú' nee di/taeene kaa qaás.

⁴² Naagáy tsimaahhír múk hhaslitaaká adór múk aa oonimiit kari axaas i baraá xaanxoó dáhh. /Ameenadá' kari mungiaá hhohhó' i dahaás nee slam'aá hhohho' gawaá sager'ine.

⁴³ Aluuwo niri oó', ‹Ta fuquus nee /ameenír fuqi aa slaaqatís.›

⁴⁴ Umuú heewo gana i daqáy adór hhawaataá doó /ameenír sli'imuso'ór kakawá'. Adoorí an adoodá' taa tleéhh dír Ohola nee Oholiba, /ameenadár tsaatuuse.

⁴⁵ Ala har'ohuusér gan'amuú koom gin sakwasleemút, adór múk fuquuse nee oo tsu/utuuse kir sakwasleemamuuti, asma inooín a fuquuse nee a tsu/utuuse.

⁴⁶ «Ala anuú Aakoó MUNGÚ a kah, Daqtá múk yaariír ti húp, ki dae tsati nee daqaari'iimar'ín ka hayoohi.

⁴⁷ Daqtí giri tlaqút ar tlaa/e, nee giri i haratleér ar paangadu, nee na/ii'ín awa daaqaay nee awa dasuuwo kiri tsuú/, nee maray'ín kiri daá/ ar asla.

⁴⁸ Adoorihe tsaatu'uumar'ín tidá' ngiri suqúw baraá yaamuukae, nee gaarí tari gurbua dír /ameena as matawa fuquús adór inooín wa ale.

⁴⁹ Nee inooín kin sakwasleemuut as tsaatu'uumar'ín nee tlakweemaaín kudaá munguaá hatlá' kiwa sluufmiís. Inooín kari tsaahh adór aníng tar Aakoó MUNGÚ.»