ESEKIELI 22 - Biblía Axweesantá Hhohho' ar Mungú 2004

¹ Axweesantá AAKOÓ MUNGÚ ana axaás, i kat,

² «Heewí, taa amohhe'ési sakwasleemaro, gixsarí múk tsu/a/iim kawa sakwasleemut? Gimáy, muruuwós kudá' sleémeero aníng i buhhtamís ooeek.

³ Ka beer, anuú Aakoó MUNGÚ a kah, kiíng a gixsár mukók oo kilá' tsu/a/iim, nee ti kilók meetagaamís ar slaqsi'iidaá munguaá hatlá'. Gawaá adoorihe qoomaarók ar sakwasleema naa xeér.

⁴ Kiíng a dakuúsár koón, asma tseerdaá muu iga ku'ús. Taa kilók meetagás ar slaqsi'iidaá munguaá hatlá' kudá' taa kilók tlehhít. Deeloorók ar sakwasleema aga kilók tseewés, eeít, deeloorók kaa faár. Gaarí an gár isa haniís tiwa niqimisi nee xoordaá hatlá', nee yaamu sleémeero iwa waaqaqaiya'.

⁵ Yaamu sleémeero awa tsewen nee awa sawene i waaniqiná'. Kiíng umuuwók uga kilók hhitiín, nee gár tawa hats a tlaahhi.

⁶ Geeraharuusér Israeli tidá' baraawók i dirii', umuú heewo in tsu/uut ar adór inós i aleeslay.

⁷ Baraawoge baabá nee aayí kin waaqaqaa'. Heé dahaaymo oo baraasíng hoót aqo kun mura' hayoh. Na/aá panaay nee /ameenár kwaeeliwo kin baramaanuus.

⁸ Kiíng xooslar'eé' tidá' hhohho' aga waaqá', nee deelor'eé' ar Sabaáto aga meetagás.

⁹ Baraawoge múk kuqá' /ayseenií tlaáq i deer, kahhó' kuwa tsu/i. Yaamuloouuseerók muruú /aymaadá' taa hanmiís dír munguaá hatlá' gun al'em'aa'eén gawaá tlom'ií wa ale. Tsaatu'uuma kan tlehhiit.

¹⁰ Baraahunge múk nee tlaawoó baabi'ii'ín fuquusá' i deer. Mukwí in fuquus sleeme nee /ameenár baraá deelor'ínií dirii'.

¹¹ Muu bahh'alé muruú buhhtamís gun tlehhiit, asma nee /ameenár inslaaway'ín tan fuquus. Kookaariya' tan fuquus nee tlaawoó daaqay'ín, nee kuqá' nee hhaeeín awa dasu.

¹² Mukko baraahunge muu gun peésaárí hanmiis as múk hatlá' kuwa tsu/i. Aldaafi ana ót, nee muruuwók una peésár hara/untsár weermís as tawa daqaari'iimár gaanslár sla', aníng iri ló'wa gunqaarés.› Anuú Aakoó MUNGÚ tí ngina oó'.

¹³ «Aníng kuunday'eé' ugwa amohhe'eés as iwa tuu' asma slaasláwasíng taa sleér ar loohír gana'aaká, nee asma múk yaariír oo taa ayaawók waa tsuú/.

¹⁴ Xáy, pihh'uuma aqo koónda bál aníng nee kiíng birta awaán? Anuú AAKOÓ MUNGÚ tí aga oó', nee an boo/eés.

¹⁵ Aníng kiíng i tlatlahhaás baraá xoordu sleémeero, nee iri kwakwaáhh baraá yaamaá xoordaá hatlá' i aleeró. Slasla/aruudá' baraawók i dirií' un qwaareés.

¹⁶ Tina kilók slasla/arés dír geeraá xoordaá hatlae, ala kari tsáhh adór aníng tar AAKOÓ MUNGÚ.»

Xooslmoó Mungú oo hhoohhoeemiís

¹⁷ Axweesantá AAKOÓ MUNGÚ ana malé axaás, i kat.

¹⁸ «Heewí, múk Israeli dir'eene a adór ufuú xwaansláy. Inooín an adór baa/ír naa alií met qoomár muqslár peésa, laqaá muqslár sirda/aten, laqaá baáti, laqaá muqsla, laqaá harsaási barka dahhás baraá asla.

¹⁹ Gawaá adoorihe, anuú Aakoó MUNGÚ a kah, daxta kuungá' sleémeerowo tawa adór baa/idá' aa met alaá tlaa/aá gawit birka tleéhh, aníng kuungá' nu dinkwaárií burumbuúr baraá gixsár Yerusalemu.

²⁰ Adoodá' muu muqslár peésa, nee muqslaadá' sirda/aten nee harsaási, nee muqsla, nee muqslár baáti ngir burumburaarin kari dahhas baraá asla, as kawa hamaatli kari hhoohhoees ar asla, an adoodá' sleeme aníng kuungá' nur burumbuur ar buhhtaeé' nee xarasleemaaeé', as nuwa baraá ásltí qaas, nee nuwa weeqatis.

²¹ Kuungá' nun burumbuúr nuri asltií oohiís as xarasleemaeé'. Daqaní tunduri weeqatis baraá gixsasír kilá' wa alé.

²² Adoodá' tlaa/eedaá peésa kar tlehhiit kir weeqatamamisi baraá asla, an adór kuungá' tundur weeqatisi baraá gixsár wa alé. Kuungá' daqaní kari tsahhá' adór anuú AAKOÓ MUNGÚ xarasleemaeé' ngira gawaahúng i ku'uús.»

Tlakweemaá geeraharuusér Israeli

²³ Axweesantá AAKOÓ MUNGÚ ana axaás, i kat,

²⁴ «Heewí, múk Israeli kubeeto, yaamuuhúng baré a adór yaamaá tluwaay aa baloó i tluwiiká. Baré yaamu naa kahiyé', asma buhhtaaeé', tari adór yaamaá ma'ay wasl.

²⁵ Geeraharuuserhúng in /orótl adór dirángw makiito'ór aa óh ga /aáy. Muu ngun tsu/iyá' daqaari'iimár muu ngin hayoohiná' nee muruudá' tlaxo gawdene'. Faarór /ameenár kwaeeli ngin dogiitiyá'.

²⁶ Kaahamuuser'ín daber'eé' ngina si'iyé', xooslar'eé' tidá' hhohho' ngina meetagasiyé'. Inooín muruú hhohhó' nee kudá' hhohhoeekahe paraatlaro ngwa harslaaqatiyé', slám muu ngu intsaahhatimisiaaká daanduú muruudá' slasla/arén nee oo hhohhoe. Inooín slám deelor'eé' ar Sabaáto ngi boo/eemisiaaká, inooín aníng tiri ilaiwawa/i'iiká.

²⁷ Geeraharuuser'ín baraá gixsaro a adór taweruú makiito'ór /aáy, ta tsu/uut as tiwa kilooín daqaari'itimisiya' ar loohír qoomaaká.

²⁸ Aaruuser'ín i tlakweemaá lu/u/uún adór heé bohóngw baraá koo/i gu tipiím ar da/ara. Iigu'utuú lama ngun ara'ariyá', nee gár ta aariirin a al/aymár tawo, tawa kaahi, ‹Aakoó MUNGÚ i kaahi,› ala aníng gár ngaa báw iqo káhh.

²⁹ Umuú dii baraá yaamuwo a /ayta ina háts nee muruú iimi hayohiingw. Múk narkuute nee oo litlakwén ngun /aytiná', nee dahaaye sleeme kan baramaanuús, tam hhaslór niiná i káhh.

³⁰ Heé koo/i ga tleéhh nee oo sihhiít didaádaá fee/it dir'eene, as yaamu ngiwa harmagaahhi as miwa hhitiím, una leeleéhh baraaine, ala uga slawiiká tam oo wák.

³¹ Gawaá adoorihe iga buhhtaaeéní ku'uús, nee ar asltá xarasleemaeé' iga hhaamiís ar harqoomoó tlehhmi'ii'ín i diri'iya'. An adoodá' ni kah, anuú Aakoó MUNGÚ.»