ESEKIELI 21 - Biblía Axweesantá Hhohho' ar Mungú 2004

Paángár AAKOÓ MUNGÚ

¹ Axweesantá AAKOÓ MUNGÚ ana axaás, i kat,

² «Heewí, warqáw amór gixsár Yerusalemu, aariím daanduú didaádá' hhoohhoo' nee daanduú yaamaá Israeli.

³ Múk Israeli kubeeto, anuú AAKOÓ MUNGÚ a kah, ‹Anuú kilá' nee kuungá' ti araán. Aníng paángar'eé' a duúx baraá qawáy wa alé, múk tlákw nee oo hhoe nguri tsuú/.

⁴ Aníng inooín i tsuú/ iimír bihhaá baskú wa ale ay bihhaá /iiko, muu sleémeero oo tlákw nee oo hhoe nguri ló'wa hhaamisa ar paángar'eé' tidá' naa baraá qawáy wa duúx.›

⁵ Muu sleémeero gari tsaahh adór heé paánga gaa duux baraá qawaywós wa alé tar anuú AAKOÓ MUNGÚ, slám ka tawo ki/isiiká baraá qawaywósií alé.

⁶ «Daxta kuúng heewí, kulala'aát adór heé aa mune sii', geeraaín iwa tsuunqumiiseek.

⁷ Kuúng bur yaahamisiyá' bir kaahiya', ‹Ahaá waáy, mas tsuunqumís?› Kuúng ki beer, ‹An tsuunqumiís as kangwko hi'iít. Umuú heewo iri daqiyá tsatiit as kangwdá', dabaaín niri sikmiitiyá', umuú heewo iri /arán, gurunge'eeri'ín niri tsatimitiyá'. Kaangwí oo ló' ni tsuwa hardah, i pa/iiká tleehharutaro.› Anuú Aakoó MUNGÚ tí aga oó'.»

⁸ Axweesantá AAKOÓ MUNGÚ ana male axaás, i kat,

⁹ «Heewí, aariím ta o', Aakoó Mungú i kaahi, ‹Paánga! Paánga kaa duúq nee kari /awaakeés sleeme.

¹⁰ Kaa duúq as iwa tsu/ut, kaa /awaakeés as iwa war'eeliin adór mankari.

¹¹ Kaa duúq nee kaa /awaakeés as kawa qaasi gawaá dabaá tsu/utusmo.

¹² Heewí, /aá/ nee ta tsuunqumís, paángarí kaa tleés gawaá muk'eé', i gawaá múk urén oo Israeli sleémeero. Ki hhaamiis ar paánga dinkwa nee muk'eene. Da/eewawók slahheek as gurhaami.

¹³ Gaarí a iiartá ur ló'wa alé. Anuú AAKOÓ MUNGÚ tí ngina oó'.›

¹⁴ «Heewí, aariím. Tsa/iiwók slahheek. Paánga gadiyeérós ngi tlehh, ki/ima tsár, laqaá tám. Gaarí an paángár tsu/uta, inooín gi harwedít.

¹⁵ Gawaá adoorihe awa yaariir naa diqiya' tsatiitiyé' nari huuhu'uné'. Afkú paánga dír afér maray'ín sleémeero gaa qwiiri/itís adór mankari, kaa qwiiri/itís as tsu/uta.

¹⁶ Aá paánga, bihhaá doó /iyayhe nee awa doó basayhe afkók amooqá' nee tiqae ti xu'us as gila.

¹⁷ Aníng tsa/i i slaáhh, sakwasleemar'eé' a bu'utiís. Anuú AAKOÓ MUNGÚ tí aga oó'.»

Paangár waawutmoó Babuloni

¹⁸ Axweesantá AAKOÓ MUNGÚ ana malé axaás, i kat.

¹⁹ «Heewí, lohdaá tsár gooimeek awa paángár waawutmoó Babuloni ir waarahh, lohduuká' tsaraawo i dír aykuú wák wa iimu/une'. Dír umuú iimu/úngw loohiro slaqsoó amór gixsár laqaqaám qaaseek.

²⁰ Lohduudá' paánga ir waarahh laqameek, ar wák tidá' hardáh dír gixsár Raba tidár múk Amoni, nee ar hatlá' laqameek ar amór gixsadár Yerusalemúr kaw, tidár yaamaá Yuda tidár koo/i gawit.

²¹ Waawutmoó Babuloni i sihhimiit dír iimu/úngw lohuuká' tsár, dír waatsarár lohuuká', as tlaa/e ngiwa didá' wa xui. Tlangaasirós gari diingiis, slaqsi'iidaá munguiiwós kudá' giri kaangwí yaahaas, nee de'ér makiito'ór taa ilahhooár wa haniís gari xuuxuu'.

²² Mahangwdá' aa dakós oo doó /iyáy huu', gár i laqaaqan a kángw Yerusalemu. Xooslár gixsa fee/a gari amohhe'ees, kángw tsu/uta nee tsimaahhír slaqwara guri oo', xooslár afkú gixsa fee/a kaa amohhe'eés, slumaá gixsa ngaa harweeriye' nee /aampu kina tleéhh.

²³ Ala múk Yerusalemu ngiwa xui aaru'uumarí ar lama, asma inooín lo'ór kilá' ngaa qaroó /ayé'. Tam nee tihe aaru'uumarí inooín gi qo inslawtís tlehhmi'ii'ín kudá' tlakwe, nee dukiirír inooín kiwa ohin gari dók.

²⁴ Gawaá adoorihe, anuú Aakoó MUNGÚ a kah, «Muu sleémeero tlakweemahúng ngi ariyá', kari tsaáhh adór kuungá' tar tlakweemaá koondá', umuúqo heewo gari xuu' adór tara dakusé'. Umuúqo tlehhmuú kuungá' ta tlehhta', gár i laqaaqan aqo tlakweemaá kuungá' taa tlehhé'. Kuungá' tunda sakwasleemuút, aníng nun qaás gawaá dabaá wakuuserhúng.

²⁵ «Kuúng waawutmoó Israeli, kuúng a heé aa ló'wa hhitiruut. Baalaarók naa hardát, eeít, baalár muxtaarók ar alhhe'eesáy.

²⁶ Anuú Aakoó MUNGÚ, kuúng un babaw, Warqamoosuú gawaá sagók nee slamaangók duxeek. Asma ado i adoodár geerií kahhká. Mukdaádá' baráy dirií' kungu gáwtí tlees, nee kudá' gáwtí diriiá' kingi baráy /aytiis.

²⁷ Hhituru'uuma! Hhituru'uuma! Tam gár wák ar ni meetiis i káhh baraá gixsarihe. Ala geeraá tihe heedaádá' naa ya/aamár muxtaárí haniís ni hardah, as sakwasleema ngiwa tleehhi, kudá' aníng ni gixsarí haniis.»

Sakwasleemár múk Amoni

²⁸ «Heewí, aariím daanduú múk Amoniwo, nee daanduú axweesantaín tidár waaniqaay dír múk Israeliwo. Inooín ki beer, ‹Paánga! Paánga kaa amohhe'eés muu tsu/taaro, kaa duúq as ngiwa hhaamis, kaa qwiiri/iís i war'eeliín adór mankari.

²⁹ Qoomár kuungá' tawa xaslite' baraá iigu'utuuhúng kuduú al/ayma nee aaru'uumarhúng tidár lama, paánga kaa amohhe'eés isaá múk aa dee/anuumiit tlaquuwo. Baala naa xeér ar tlakweemahúng kiwa sakwasleemuuti.

³⁰ Hám daxta paánga baraá qawaywósií ki/isaak! Aníng nun sakwasleemuút didár kilá' tunduwa tleéhh, baraá yaamuudá' tunduwa laqwalín.

³¹ Aníng nun i buúhh, asltá buhhtaaeé' an gawaahúng ar ufaáhh. Nu qaás gawaá dabaá wakuuserhúng tidá' xaraasl, múk kuungá' nu lo'wa baál tsu/utaaro.

³² Kuungá' tari migír baraá aslto, tseererhúng iri ku'út baraá yaamu. Kuungá' heé nu baloó insláw i kaahh.› Anuú Aakoó MUNGÚ tí aga oó'.»