ESEKIELI 2 - Biblía Axweesantá Hhohho' ar Mungú 2004

Esekieli kuwa ateét tawa aarusmo

¹ Inós aníng iri báy, «Xáy heewí, sihhtanoro galalaa'aát. Aníng nee kuúng a axweesaán.»

² Qoomár iwa amor'eé' axweesi, qeeruú Mungú iri dáh baraaeé', nee iri galalaa'atís sihhitisaro. Naagáy nguri axaás,

³ iwa báy, «Xáy kuúng heé, u ya/aáw amór múk Israeli, xoorodá' a múk aa dee/anuut, tidá' aníng iga ahh. Inooín aníng iga sadakumamisiyé' ay laarí, adoodá' aáng baabi'ii'ín naa tleehhiyé'.

⁴ Mukwí ku sage gawdén, nee aníng iga ilaiwa/amér i tleehhi'iiká. U ya/aáw amor'ín, kuúng inooín ki beer, ‹Aakoó MUNGÚ gár i kaahi a tí.›

⁵ Barnaxes naa ialooeesiyé' laqaá naa sage gawdesiyé', asma inooín a múk dee/anuuse, dooqa ngi tsahhiyá' adór aarusmo ir tla/angw'ín i dirii'i.

⁶ «Ala kuúng, heé, inooín mi da'ayumitaar, laqaá axweesanti'ín. Tam fuquráy nee laqayá' ugwa harweeri'i, laqaá tam xiiraawe ugwa harweeri'i, axweesanti'ín ma da'ayutaar nee mutuwa naáxw nee gitsee/er'ín, asma inooín an múk aa dee/anuut.

⁷ Kuúng ki axweesante'eé' beér, tam ka axaás, laqaá tam ka axasiiká, asma inooín a múk aa dee/anuut.

⁸ «Ala heewí, tí kuúng u babaw iia ti qas, kuúng ma dee/anutaar adór inooín wa alé. Afkók awaatleek, gaarí aníng ni hanmiis /ayeek.»

⁹ Qoomár niwa qaytsiít, naxés dawa kunga amor'eé' i looloqoós, nee laatí i kitaábuú taa gooín kón.

¹⁰ Naagáy kitaábuudá' gway geeraaeé' wa gweér, inós kwa gooín gura' nee daanduuwo, /ayma'aá tsuunqusmo, nee /aa/e nee lu'umis.