ESEKIELI 19 - Biblía Axweesantá Hhohho' ar Mungú 2004

Tsuunqusmo

¹ AAKOÓ MUNGÚ aníng ina báy, «Tsuunqumiís as daanduú geeraharuusér Israeli.

² Xáy, aayoorók a dirángw adoomá baraá tla/ángw direeraá hatlae. Ina hót baraá tla/eeraá direeraá batláy wa ale, na/iiwós giri /aymís.

³ Na/aywós oo wák guna amohhe'eemís, na/aywí iri dirángw yaqaamba tleehhiít oo /uuruú koóm. Slakat guri intsatsaáhh dír aayoorós wa alé. Tari dirángw múk uhiím.

⁴ Xooro iri ú' as inós, kuri óh ar baa'a, kuri huúw ar muqslír afa mogoolmo ay yaamaá Misri.

⁵ Aayoorós iwa slahhá' daamaraango, harahhifo iri fák. Na/aywós oo hatlá' guri léhh, guri dirángw batlitmo tléhh.

⁶ Qoomár iwa uráy nee direeraá hatlá' tay alhi'iitanór áy, inós slakat gway intsaáhh. Tari dirángw múk /aáy.

⁷ Inós slumaá muu gina aldáh nee gixsaduuín giri hhitín. Yaamu nay da'ayutiyé' dinkwa nee yaamuloouuseero as afór /orotloorós.

⁸ Xoordu nguna i daqayé' baraá yaamu sleémeero, tsaaxweelay nguri qaasiyé', inós kuri óh ar baa'a.

⁹ Ar loohír muqslír afa mogoolmoowo inós kuna óh, ngway huwiyé' ay yaamaá Babuloni. Amoodaádae ngway dahaasiyé' baraá doó tsegma as /orotloorós makawa malé axaás gawaá tlom'aá Israeliwo.

¹⁰ «Aayoorók a adór xa'anoó sabiíbu oo baraá qaymo, kudá' taa haátl bihhaá duxuú ma'aay, kudá' /ar'i ga slaslaax, asma ma'aay kiwa úr.

¹¹ Haleemoowós i ló'wa /uuruú koná' adór hhartá waawuti'iima. Xa'anoowí oo sabiíbu ina ló'wa uráy ta xaa'aá hatlae. Yaangareemaaká' muu gina ló'wa xirfayeemiís nee haleemiiwós kudá' yaariire.

¹² Ala sabiíbuudá' kuna tuú/ ar buhhta, nee kuri kwaáhh yaamií alé, fur'ár da/aá daahh guri kahás, mamuuwós giri paahhamís. Haleemaawós kudá' /uuruú koomá' niri kahiyé', asla giri /ák.

¹³ Hám daxta kwaa haátl baraá xaanxaay, dír yaamaá kaahaar awa ma'aá kooma'aaká.

¹⁴ Asla ina ti'ít baraá tla/ángw xa'anoodá' wa alé, haleemi nee mamuuwo giri /ák, haleemiiwós i baloó iiay'aaká, laqaá i adór hhartá waawuti'iima tleehhitiaaká.» Gaarí a tsuunqumis, nee i tsuunqusmo tleehhit.