ESEKIELI 18 - Biblía Axweesantá Hhohho' ar Mungú 2004

Mungú umuú heewo gun sakwasleemuut ar hariímár tlehhmi'iiwós

¹ Axweesantá AAKOÓ MUNGÚ ana malé axaás, i kat,

² «Ahaá waáy, gár axweesantá bo/ kas inkaaki/a' baraá yaamaá Israeliwo? Tí kah ‹Xwayliité mamaá /eetlá' awa xa'anoó sabiíbu gina /ák, ala sihhnaá na/ii niri ta/anterumitiyé'.›

³ «Ala anuú Aakoó MUNGÚ a kah, ‹Axweesantá bo/ tí ka malé ar axweesiiká baraá yaamaá Israeliwo.

⁴ Xuaak slafiingw sleémeero a kwe'eé', slafíngw xwayliitamó nee slafíngw na/aywo. Heé tlakweema gaa tleehh an heedaádá' gwaá'.

⁵ «Hee barnaxes i gan'amuú kón, inós bar muruú ganaá' gu tlehhiit nee oo qoóm,

⁶ nee barnaxes i dinku'umisiiká ilahhooa hanmisuuwo dír munguaá hatlá' gawaá tlom'iiwo, slám slaqsi'iidaá mungui taa tleéhh nee múk Israeli gi haralintati'iiká, bar nee harér inslaawmoowós i alhi'iimitiaaká, laqaá naa alqaati'iiká deelór iwa baraá deeloorós i diri',

⁷ barnaxes hee gu /aytinká, nee gár hee birnga kiriík ga ki/imis, bar muruú muu gu malguusiiká, ala muruú /aymaaro múk qwariít gun qaqáy nee kudá' tlabaá kooma'aaká gi tsiitmiis,

⁸ nee gaa birnga heéwí haniís aldaafi ga leelehhitiiká, tam slaasláwár ur ga leelehhitiiká, barnaxes dakós gwa ilaá/ dír gár tlaakwe, sakwasleema aqo gan tsaat ar gan'amu dír heé iinuús nee oo ta iinuusi,

⁹ barnaxes inós kaahir'eé' ga eeharahar nee hara'ayar'eé' gaa kángw kilá' wa iialooeés, heewí i gan'amuú kón, nee inós i tsuwa hoot.› Anuú Aakoó MUNGÚ tí ngina oó'.

¹⁰ «Naxés heewí na/oó xaraásl gu kón laqaá tsu/utusmo.

¹¹ Naxés na/aywí tlakweemaadá' baabuúwós aa tleehhiiká gi tlehhiit, muruudá' taa ilahhooár wa hanmiís gawaá tlom'i wa ale gun /aay, nee ta fuquus nee harér inslaawmoowós,

¹² narkuute ga hara/untsiitsín nee múk litlakwene, i fisiisín, iinár hee ga buiiká, slaqsi'iidaá munguaá hatlá' gi haratlintatii', nee muruú buhhtamís gu tlehhiit,

¹³ hee burngwa gaárií haniís, aldaafi gan iinuus, nee slaasláwár yaariir ga leelehhiit, xáy, na/aywí iqo tsuwa hoóti? Aasla'áy i baloó hootiiká. Asma na/aywí muruú aníng ni ahhiit sleémeero guna tleéhh. Ar ló', inós i gwaa', a inós kilós in gwaa'.

¹⁴ «Ala barnaxes na/aay tlakweemaá baabuúwós aa tleéhh gaa ár, inós tlakweemaadá' gi tlehhitiiká,

¹⁵ ilahhooadár ta hanmaamisi gawaá tlom'ií wa ale ga /a/ayiiká, laqaá slaqsi'iidaá munguaá hatlá' awa múk Israeli gi haratlintatii'iiká, nee aa fuqusiiká nee harér inslaamoowós,

¹⁶ hee gu /aytinká, iinár hee ga konká, daqaari'iimár heé hatlá' ga hayoohinká, ala múk qwariít gu /aymiis, nee múk tlabaá koomaaká gu tsiitmiis,

¹⁷ tlakweema gi tlehhitiiká, hee burngwa kirkitís aldaafi ga iinuusiká, laqaá slaasláwár ur ga leelehhitiiká, hara'ayar'eé' nee kaahir'eene gina eeharahar, na/aywí i gwaaiiká as tlakweemaá baabuúwós. Inós in hoot.

¹⁸ Ala baabuúwós, as muu nguwa /aytín nee muruú hhiyaawós guna fisiisín, slám hhaeewós gaa hhooeemáy tleehhiiká, looeemaawo tlakweemaawós ngu gaasiyá'.

¹⁹ «Ala hám kuungá' a yaahamisá', ‹Ahaá waáy, gár na/aywí kus sakwasleemuutiiká as tlakweemaá baabuúwós?› Na/aay barnaxes tidá' ganaa' nee hariim gaa tleéhh, inós bar i inkihhimuú kón daber'eé' ngiwa eehari sleémeero, inósuuwí aqo in hoot.

²⁰ Heé tlakweema gaa tleehh an heé gwaá'. Na/aay tlakweemaá baabuúwós ngu gaasiaaká, laqaá baabá tlakweemaá na/aywós ngu gaasiaaká. Gan'amuú heé ganaá', heé i gaa wa bui aqo har inósuú kilá'. Heé tlaákw aqo inósuú kilá', inós tlakweemaawós gin gagaar.

²¹ «Barnaxes heé tlaákw, tlakweemaawós kudá' i tlehhaahhiti gaa máy tlehhtuuwo, nee barnaxes hara'ayar'eé' sleémeero gaa óh, inós tlehhma'aá ganaa'á' nee awa qoomá' birnga tleéhh, heé adoorí looeemaawo i hoot, i gwaiiká.

²² Tlakweemaawós kudá' sleémeero aa tleéhh ki inslayká, as gan'amuuwós kwihe in hoot.

²³ Xáy, anuú Aakoó MUNGÚ gwa'arár heé tlaákw aqo saqwalaá/a? Aasla'áy a saqwala/aaká. Aníng gár ni slaa' masók inós luhuuwós kudá' tlakw gin máy, as iwa slafi.

²⁴ «Ala heé ganaá' barnaxes gan'amuuwós gwaa máy, tlehhmi'iidá' aníng i buhhtimiisá', kudá' heé tlaákw i tlehhaahhiti, giri tleéhh, xáy, heewí iqo tsuwa sláfi? Aasla'áy, tlehhmi'iidá' sleémeero awa hho' aa tlehhahhiít geeraawo ki baloó inslayká, inós aqo in gwaa' as dee/anuuwós nee tlakweemaadá' aa tleéhh.

²⁵ «Ala kuungá' a kata', ‹Gár Aakoó Mungú i tlehhiiti i qoondaaká.› Kuungaá múk Israeli, iia qaasaak daxta. Xáy, gár aníng ni tleehhiít iqo tsuwa qoondaakáhe? Gár kuungá' ta tlehhita' an tidá' qoomaaká.

²⁶ Heé ganaá', bar gan'amuuwós guri máy, tlakweema giri tleéhh, aqo in gwaa' as tlakweemaadá' inós aa tleéhh.

²⁷ Ala heé tlaákw bar tlakweemaawós gaa máy tlehhtuuwo, muruú ganaá' nee oo qoóm gway tleéhh, heewí slafiingós gu tuu/.

²⁸ Asma inós gár ganaa' gana aldaákw, nee tlakweemaawós giri máy, kwí aqo in tsuwa hoot, i gwaiiká.

²⁹ Ala kuungá' múk Israeli a kata', ‹Gár Aakoó Mungú i tlehhiiti i qoondaaká.› Xáy, aníng gár ni tlehhiit iqo tsuwa qoondaakáhe? Kuungá' gár ta tlehhita' an tidá' qoomaaká.

³⁰ «Gawaá adoorihe, anuú Aakoó MUNGÚ kuungaá múk Israeli, nun sakwasleemuút. Umuú heewo un sakwasleemuút ar harqoomoó tlehhmi'iiwós. Hhu'uu'umé' nee tlakweema tlehhtuuwo mawaak, tlakweemaahúng munduwa hhaamiisiyé'.

³¹ Tlakweemaahúng kwisíng taa tlehhité' amór saaw ti kwahhe'. Muunuú hhoó' nee qeeruú /abén slawaak. Xáy múk Israeli, ahaá waáy, gár tas hhaanda'?

³² Aníng gwa'ara tam ar heé wák a saqwalala/aaká. Gawaá adoorihe hhu'uu'umé' as tawa hota'. Anuú Aakoó MUNGÚ tí ngina oó'.»