ESEKIELI 17 - Biblía Axweesantá Hhohho' ar Mungú 2004

Slaqsoó gwareesi nee xa'anoó sabiíbu

¹ Axweesantá AAKOÓ MUNGÚ ana axaás, i kat,

² «Heewí, siník ooeek, múk Israeli slaqsaywí baweek.

³ Ki beeto, anuú Aakoó MUNGÚ a káh, ‹Gwareesirka wák yaangaariir i deer, slám hhaampe'eeriwós ki ló'wa uren, hhaampe'eeriwós i hayaá yaariir awa kal'aá dimbedimbé koná'. Gwareesirí ina /akút ay tloomár Lebanoni, iri iwít gawaá tsitsinír sahhti.

⁴ Halmír gáwtí dirii' ló'wa alé gay tú/, gari húp baraá yaamaá múk halaanu'uumár tlehhiít, gari qás baraá gixsar'ín ar wák i aleeró.

⁵ Aluuwo xa'anoó naa sangw ti'iit guri taataáhh baraá yaamaá múk Israeli wa aleeró, guri hátl dír xáw'uú koom, dír ma'aá yaariír koom.

⁶ Xa'anoodá' iri uráy, tay xa'anoó sabiíbudá' baraá xaaií tsa/a/ám, haleemaawós nguri i ki/iyé'. Dee/áruuwós yaamuudá' giri dalaá/, xa'anoó sabiíbu haleemi gay tawo slaslaáx nee loo/ór yaariire.›

⁷ «Ala gwareesirka hatlá' yaangaariir i deer, hhaampe'eeriiwós ki uren nee ka hayo yaariir, xa'anooduú sabiíbu dee/áruuwós gway amór gwareesidá' xu'ús, haleemaawós niri amoodá' xuiyé' as ngiwa ma'áy eemis.

⁸ Xa'anoó sabiíbu aange dír kuwa tuú/ a baraá asalmodá' kwi haátl, kuri haátl dír hhapér hhohho' nee ma'aá yaariir, as haleemi ngiwa duuxi nee mamu ngiwa laqwaali, as daqaní tawa xa'anoó ló'wa hhoohhoó' oo sabiíbu.

⁹ «Hám daxta anuú Aakoó MUNGÚ u yaahamiís, Xáy, xa'anoowuú sabiíbu iqo harmá/i? Ahaá xáy, dee/áruuwós kuqo tu/iikáhe, kuqo dee/ár altu/iikáhe nee mamuuwós niri dixiyá', nee haleemaawós kudá' dutlutluu/á' niri /ootsiyá'. Heé /uuruú koóm laqaá slaqwaruuse a sla'aanaaká nguwa dee/áruuwós altu/iya'.

¹⁰ Hamiírihe kwaa mak tawo haátl, xáy ala, i harmá/i? Fur'ár da/aá daahh bira fukuukú' gu kahás, in káh dír koo/idár kilá' niwa ti'iít.»

Alki/ituú niiná daanduuwose

¹¹ Axweesantá AAKOÓ MUNGÚ ana axaás, i kat,

¹² «Gimáy, daxta mukwí aa dee/anuut yaahaseek. Bar slaqsaywí oo axweesani ku tsatsahhán, kibeeto, ‹Waawutmoó múk Babuloni nina hardáh baraá Yerusalemu, waawutmo guri hingeés nee geeraharuuser'ine, giri huúw ay yaamaá Babuloni.

¹³ Naagáy, heé wák guri waawutmoó wa qaás, oo tlahhoó waawutmo, tina axweesani axaasiyé', guri lo'ór /aymiís. Múk pihh'uumár koóm yaamuudae guna hingeés, gway amór saáw i huúw,

¹⁴ as waawuti'iimadá' ngiwa diqay tlaaqi, nee masók inooín tidá' waawutmoó Babuloni i kaahi ngin iiaárií qaminá'.

¹⁵ Ala waawutmoodá' /abén aa qaás waawuti'iimár waawutmoó Babuloni gana sií', muu gway ya/aáw ay Misri as alee/isoó faras nee oo slaqwaruusér yaariir nguwa firór ay. Xáy, waawutmoowí ga aleesláya? Xáy, oo adoorí ga tleéhh nee oo al'axweesantí gaa sii', sakwasleemaro i kotsóti?›

¹⁶ «Anuú Aakoó MUNGÚ a tsáp wa káh, adoodá' nirqo dawa, waawutmoowí i gwaa' baraá yaamaá Babuloni, baraá yaamaá waawutmoodá' inós gwaa qaas baraá waawuti'iima, kudá' lo'oodá' gaa waaqaa' nee al'axweesani ga sii'.

¹⁷ Tí ar ló', waawutmo Farao dinkwa nee slaqwaruuseerós tidá' yaariire /iisaro gu aleeslayká dír waawtmoó Babuloniro, qoomár waawutmoó Babuloni koo/ir'ín birnga harweér as múk yaariír nguwa tsu/i.

¹⁸ Asma lo'oodá' gana waaqaá', nee al'axweesantadá' gana sií', tidá' inósuú kilá' aa oó'. Nee muruú adór kwí sleémeero guri tleéhh, ar ló' waawutmoowí i baloó kotsqotiiká.

¹⁹ «Gawaá adoorihe, anuú Aakoó MUNGÚ a kah, adór nirqo dawa, asma lo'ór aa /aáy ar umuueé' gana waaqaá', nee al'axweesante'eé' gana sií', ar ló' sakwasleemár hhamhhám ga sláy.

²⁰ Aníng tsaaxweeli a qaás ar gu oh, inós tsaaxweelir'eé' guri ót, u huúw ay Babuloni, nguri sakwasleemuút as adoodá' aníng iwa geewaqaát.

²¹ Slaqwaruuseerós tidá' pihh'uumár koom ka tsuu/ ar paánga, nee kudá' naa meetiye' niri diyaa/atiyá' bihhe sleémeero. Daqaní kuungá' a tsahhá' adór anuú AAKOÓ MUNGÚ tí ngina oó'.»

Harahhifór niina

²² Aakoó MUNGÚ i kaahi, «Anuú kilá' dír niina gawaá tsitsinír sahhtiro a taataáhh, eeít halmír dutlutluu/ gawaá haleemaawós kudá' gawto, ngiri haátl gawaá tloomár tleer.

²³ Eeít, aníng a haátl gawaá ságw tloomár tleer ar múk Israeli, as /ayo nee mamu ngiwa laqwal. Inós tay xa'anoó hhoohhoó' oo sahhti, tsir/ór kal'aá yaariir iri mahheetús baraá gamnaangós wa alé, slám mari ngiri tleehhiyá' gawaá haleemaawós.

²⁴ Daqaní xaai baraá yaamu sleémeerowo ngiri tsaahhiyá' adór anuú AAKOÓ MUNGÚ xaa'aá tlet ngir gáwtá wa daraáhh, xaa'aá ququmat ngiri tledemiís. Aníng xaa'aá naa/á' in kahaás, nee awa kaaharen in naa/amií ki/ís ngay ureemiís. Anuú AAKOÓ MUNGÚ tí ngina oó' nee an tleéhh.»