ESEKIELI 16 - Biblía Axweesantá Hhohho' ar Mungú 2004

Gixsár Yerusalemu i inkihhimuú koondaaká

¹ Axweesantá AAKOÓ MUNGÚ ana malé axaás, i kat,

² «Heewí, gixsár Yerusalemu muruudá' aníng buhhtamís ti geehhooes.

³ Gám baweek, Anuú Aakoó MUNGÚ gixsár Yerusalemu a babaw, Iimu/uungo kiíng dír ti laqwaál a baraá yaamaá Kana'ani. Baabuúwók a heé xoorór Amori, nee aayoorók a dasír xoorór Hiti.

⁴ Baalaadá' tiwa laqwaál kaansirók kaa tsatiiká, laqaá sleeme tsikeerók kaa hamatliiká ar ma'aay, nee taa duqiiká ar diwi, laqaá taa tlabaá i dahaasiiká.

⁵ Heé guruuwós aa tlay as kiíng i kaahh oo iga muruuwí tleehh, heé kiíng iga slaa' i kaahh. Ala baldá' tiwa laqwaál tina kwaáhh baraá ufuú xwaansláy, asma kiíng ti ló'wa slasla/aár tiwa laqwaál.

⁶ «Aníng niwa bihhaawók ar waaraáhh, ina ár a kal/aandús baraá tseereerók wa alé, nee iri báw,

⁷ ‹Slaáf nee uráw adór sla/ito'ór baraá qaymór wa ale.› Kiíng tari ureér, tari tleeruúr adór dasi. /Aami iri tsaxát, iseemaawók nari kiki'iné' nee se'eengók niri uraaráy, ala kiíng a /aankwetsuú kilá'.

⁸ «Niwa malé kií/ nari bihhaawók ar waaraáhh iri ár, qoomaadae a dasír /amaatliito'o ar duuxo gaa eer. Iri tsiitiís ar tlawuueé', /aankwetsuuwók nguri luú/. Aníng nee kiíng al'axweesantá duuxo kari qaasaán as kiíng tawa harer'eé'. Anuú Aakoó MUNGÚ tí aga oó'.

⁹ «Naagáy ma'aay ngari leéhh, iri hamaátl ar ma'aay, tseerduuwók niri faakiyé' nee iri sliík di/to.

¹⁰ Iri tsiitiís ar tlawuú taa qaalín nee ya/ataá xurfaaro, iri tsiitiís ar warqamoó taa tleéhh ar neewór kitaánír hhohho' nee inqwaarír qwiirii/ ar hariíri.

¹¹ Iri parootuús ar tlaa/aá tlaxo ur, nee qutúr nguri dahaás baraá dabaawók, nee himta nguri dahaás baraá istók.

¹² Mungaay nguri qaás gawaá dungaawók, wiíro nguri qaás gawaá iiaawók, sagók nguri slamángw hhoohhoó' i dahaás.

¹³ Naagáy tari ló'wa hhoohhoouúr as parootír sahaábu nee peésa. Tlabaawók tari awa neewór kitaánír hhohho' nee hariíri, slám kaa mardaádír i tleéhh. Muruú /aymarók gár kur qamiin a puuruú hhohhó', danú una /ák, nee muruú /aymarók un di/tí qamiín. Tari parootuso'o ló'wa ale adór waawuto'o.

¹⁴ Xirfuuwók iri dalaá/ ay hhapeemo sleémeero nee hhohhoaariroge, asma hhohhoaarirók ina bu'út as xirfuudá' aníng naa kiíng i haniís. Anuú Aakoó MUNGÚ tí aga oó'.

¹⁵ «Ala hhohhoaarirók tisíng ana harahhíf, as tiwa hhoohhoó' tsaatu'uumár eér, nee sli'ima kari tléhh nee umuúqo heé waaraahha.

¹⁶ Tlabaawók bahh'alé ina parootús ar kiteeridaá ilahhooa, tari didá' wa fuqús. Kángw adór kwí ugwa baloó axaasaniiká, nee sleeme inqo sangw baloó ti'iitiiká.

¹⁷ Tlaa/eedá' hhohho' awa sahaábu nee awa peésa kudá' naa dirók i haniís, ina ar tleér kiri slaqsa'aá hhawaate tléhh as tawa fuqusa' nee inooín.

¹⁸ Inqwaruú mardaádi una slaqsi'iidár uuntsús, di/taeé' nee mooyangw'eé' kudá' kuri hanís dír slaqsi'iidá'.

¹⁹ Muruú /aymar'eé' kudá' naa haniís una hanmís dír slaqsi'iidá' as tawa mooyángw tsuú', asma aníng kiíng ina /aymiís ar puuruú hhohhó' nee di/i nee danú. Anuú Aakoó MUNGÚ tí aga oó'.

²⁰ «Slám daaqaywók nee dasuwók kudá' naa aníng i laqwál ina hanís tawa ilahhooár muruú ta tsu/i dír slaqsi'iiwók kudá'. Xáy ka xu', sli'imaarók tí aqo gár waaqa'atíta?

²¹ Xáy, kaangwí na/iieé' kiwa tsu/ as tawa ilahhooár da/a dír slaqsi'iiwók, aqo gár niináwe?

²² Baraá mura' sleémeero dinkwa nee sli'imaarók tidae, aga insleeriiká deelór na/uumaarók tidá' tawa kal/aandus baraá tseereerók wa aleeró, qoomár tawa /aankwets nee tiwa gaa wásl.»

Yerusalemu a adór tsaatuso'o

²³ «Anuú Aakoó MUNGÚ kiíng in babaw, Tsaxwaawók! Tsaxwaawók! Kiíng, asma tlakweemaaká' sleémeero taa tléhh.

²⁴ /Anteenaá firo ina tléhh, nee wa/aamér munguaá hatlá' kiwa sluufmisi ana tléhh umuúqo diiro.

²⁵ Dír umuúqo iimu/úngw loohír ure wa/aamér munguaá hatlá' kiwa ilahhooár wa hanmiisi ana tléhh, hhohhoaarirók kari ar fuqús dír umuú heé waaraahha, tari búhh fuqto.

²⁶ Slám ana fuqús nee múk inslaawaywók oo Misri, kudá' naa hatsiye' ilatleeriro, tari ak naagís sli'imaaro, buhhtaaeé' kiri dúk.

²⁷ «Naagáy dakw'eé' nguri tleés daanduuwók i alé as iwa sakwasleemuut. Afa nasli ngiri haniís iri máw dír wakuuserók tidár da/uuse, múk Filisti kudá' aa muruut tawo ale daanduú tlehhmi'iiwók awa ló'wa slasla/arene.

²⁸ «Ala kiíng aga hhe'esiká, tari sli'imár eér amór múk Ashuru. Tam sli'imaasíng sleeme iga tafki/iská.

²⁹ Kiíng tari kumít tawa sli'imár eer amór múk halanuuse oo yaamaá Kaldayo, tam adoorihe aga furgu/ká.

³⁰ «Anuú Aakoó MUNGÚ aa kah, Kiíng gár i gaamiis a hheehhár fuqi kilós. Asma fuqi ana i xupú' tam murér niiná a ara'aandaaká.

³¹ Dír iimu/úngw umuúqo loohiro nee /aantani ana tléhh, nee wa/aamér munguaá hatlá' kiwa ilahhooárí hanmis baraá umuúqo gixsaro. Ala sli'imarók nar tsaatuusér ta bu'uun ti slay'aaká, asma kiíng peésár muu a ohiindaaká.

³² Kiíng a harér tsaatuso'o, tidá' hhawaataá hatlá' dahamiis baraá do' kitángw hhawaatuuwós wa aleeró.

³³ Alhootariro hhawaata /ameenír tsaatuso'o gan tlaaxw ar peésa, ala kiíng mulqeerók sleémeero ana tlaxuún ar peésa, slamí ina slukukuún bihhe sleémeero as niwa dirógí fuqtá aya'.

³⁴ Baraá tsaatu'uumarók tisinge kiíng a adór /ameenár hatlaeeká. Heé kiíng iga firin i kaahh as tawa fuqsa', ala kiíng inooín ina peésaárí hanmís kitángw kiíng tiwa peésár i haniisi.»

Yerusalemu ka sakwasleemuut nee Mungú

³⁵ «Hám daxta kiíngasír tsaatuso'o, axweesante'eé' iiárií qaaseek, Anuú AAKOÓ MUNGÚ.

³⁶ «Anuú Aakoó MUNGÚ kiíng in babaw, Peésarók aga harnét, aga fuqús nee mulqeerók tlabaawók in waatlés as tawa fuqusa' nee mulqeerók, slaqsi'idaá munguaá hatlá' iga fiririín nee iga tseerér na/iiwók i hanmís.

³⁷ Naagáy aníng mulqeerók tidá' sleémeero nee kiíng aga alqwalala/e' ngi burumbuúr, kudá' sleémeero ta sla' nee kudá' ta sla'akahe, ngi burumbuúr bihhe sleémeero as kiíng iwa i haratlaya', aníng kiíng iri /aankwetsiís dír ilaaín wa ale, /aankwetsuuwók nguri ariyá'.

³⁸ In sakwasleemuút asma kiíng a adór /ameenár al'axweesantá duuxo gaa geeqeer, laqaá adór múk tsu/uutuuse, án kiíng in sakwasleemuút ar sakwasleemár gwa'ara as niwa buúhh nee da/i iwa ót.

³⁹ In gawaá dabaá mulqeerók i qaás, inooín /antenoowók ngiri diyaa/iyá' nee wa/ameedár tay firór i aaeera. Tlabaawók ngiri duuxiyá', nee tlaa/eewók kudaá tlaxo uren ngiri hayoohiyá', kiíng tari mét ar /aankwets ar gaa wasl.

⁴⁰ «Wakuuseerók in slaqwaruusér i ya/áp as tiwa i haratlay, tiri gaas ar tlaa/e, nee tiri tlaaq ar paangaduuín.

⁴¹ Maraywók kin daa/ ar asla, nee /ameenár yaariir sakwasleemarók gari aán. Tari tafkí/ fuqi eeharahaduuwo nee muu kuwa tlaxuun.

⁴² Daqaní muner'eé' aga daanduuwók i faák, da/tadá' daanduuwoge ni koom aga faák, niri xasliít niri malé buhhaaká daanduuwoge.

⁴³ Kiíng aga gunqaarút tidá' anuú Aakoó MUNGÚ naa tleéhh qoomár kiíng tawa /amaatliito'o. Kiíng aníng iga ló'wa buhhtís ar muruudá' sleémeero taa tlehhaahhít. Aníng kiíng i li/áy buú' daanduú umuú gár taa tlehhi. Anuú Aakoó MUNGÚ tí aga oó'. Xáy, slasla/ara ugwa qo dogkáhe daanduú muruuwí sleémeero án ni ahhiita?»

Dasi aqo adór aayoorós

⁴⁴ «Aá Yerusalemu, hee barnaxés axweesantá bo/ ngi kah daanduuwoge, in oin, ‹Adór aayo i diri' aqo adór dasiirós i eehat.›

⁴⁵ Ar tsuwaá ló', kiíng a dasír aayór hhawaatuwós gwaa si' nee na/iiwose, kiíng a adór hhaeewók kudaá hatlá' awa hhawaateín nee na/ii ngaa si'iye'. Aayoorók ar xoorór Hiti nee baabuuwók a heé xoorór Amori.

⁴⁶ «Hho'oorók ar ur a Samaria, tidár bihhaá /iya, dinkwa nee hhaeewók. Hho'oorók ar niina a Sodoma, tidá' bihhaá basa, dinkwa nee dasuwós.

⁴⁷ Kiíng naa dír lohduuín ngaa harki/ká eeharahaduwo, laqaá naa qoomoó slasla/aruín harki/ká. Har afiqoomár niinawe kiíng ana ló'wa hhiturút ta ak inooine baraá tlehhmi'iiwók sleémeero.

⁴⁸ «Ar looeemá kilae, tí an káh ar tsáp, anuú Aakoó MUNGÚ, hho'oorók Sodoma nee dasuuwose tlakweemaá adór kók kwisíng nee awa dasuwók nga tlehhi'iiká.

⁴⁹ Dakuúsár hho'oorók Sodoma a tí. Inós nee dasuuwós muruú /ayma nee balángw yaariír nguwa slayé', daara/ángw yaariír gina áy, tari pora/amuút, kudá' dabe kaaharen alee/iisaro ngina gunqareesiyé'.

⁵⁰ Inooín tana daara/uút, muruú buhhtamís nguri tleehhiyé' dír ilaeé wa ale. Gawaá adoorihe ngiri wa'aá wák ar hhaamiís, adoorí ngiwa ár.

⁵¹ «Ala Samaria tam tlaqtá tlakweemaá adór kók gaa tlehhká. Kiíng muruú yaariír oo buhhtamís ugwa tléhh ta inooine. Barnaxes tlakweemaawós in alqoomeemesa nee awa hhaeewók, tlakweemaaín a gaarooká ta koge.

⁵² Kiíng murér tlakweemaawók an kilók gagát. Tlakweemaawók ki ak ló'wa tlaakw ta awa hhaeewók awa dasuuwo, sleeme an lak ooaan kwaáo hhaeewók awa dasu tlakweemaá ta kon i kahhiyá', nee laqaá tam dakuúsar'ín, bar an kiíng ar qoomeesaán. Gimáy daxta, muruút nee waaqa'amawók ooheek, asma adoorihe gár i laqaqaan a hhaeewók kwisíng in tlakweemaá kon'aaká.»

Sodoma nee Samaria ki /abees tleehharo

⁵³ «Aníng Sodoma nee Samaria dinkwa nee dasuuine i diihhooar'ín tidár aángií ki/ís, tam kiíng sleeme diihhooa aqo sleér dír tla/angw'ine.

⁵⁴ Asma kahhó' mure kawa aan nee alsi'imu kuwa gagat, mureerók kawa gagat nee kawa aan, asma muruudá' sleémeero taa tlehhaahhít, gawaá tí sleémeero hhaeewók awa dasu tiri ariyá' adór inooín tar lak tsiní ta kiinge.

⁵⁵ Hhaeewók awa dasu, Sodoma nee Samaria dinkwa nee dasuuine, ador'ín tidár aáng ngin i ki/iyá', tam kiíng nee dasuuwoge adoodár aáng an i ki/á' sleeme.

⁵⁶ Ar daara/aangoge hho'oorók Sodoma ana waaqá'.

⁵⁷ Xáy, adoorí aga tlehhkáhe qoomár tlakweemaawók kiwa geehhooatisiiká? Hám daxta, kiíng nee Sodoma aga qoondé'. Kiíng daxta a gár waaqa'atiit dír geeraá dasuú Edomu nee inslaawaywós sleémeero, nee dír Filisti nee inslaawaywós kudá' aáng kiíng iga aahhi.

⁵⁸ Sakwasleemár slasla/aruuwók nee tlehhmi'iiwók kudá' aníng i buhhtamiisá' a kilók gagát. Anuú AAKOÓ MUNGÚ tí ngina oó'.»

Alqadór alhhe'eesoó koomaaká

⁵⁹ «Eeít, anuú Aakoó MUNGÚ an káh, Kiír Yerusalemu, adoodá' tawa hariin ngi kiíng i tleéhh. Kiíng lo'oodá' taa /ák aga waaqá', nee al'axweesantadá' aga meér.

⁶⁰ Ala aníng al'axweesantadá' nee kiíng naa qaasaán qoomár kiíng tawa /amaatliito'o a insláw. Aníng nee kiíng al'axweesantá alhhe'eesáy wasl a tleehhaán.

⁶¹ Daqaní kiíng tlehhmi'iiwók i insleér tari murút qoomár hhaeewók awa dasu birnga dabaawók i qaás, hho'oorók ar ur nee ar niinawe, adór dasuuwók wa aleeró, ala adoorí a tleehhaaká as al'axweesantá nee kiíng na qaasaán.

⁶² Aníng al'axweesani a qaás nee kiíng, kiíng kari tsáhh adór aníng tar AAKOÓ MUNGÚ.

⁶³ Aníng kiíng i gurtláw gawaá tidá' sleémeero taa tlehhi. Kiíng tidá' sleémeero taa tléhh bar aga insleér, tari waa/ó/, afkók kuri mutsuutsú' as mure, tay qitlká axweesántí ki/imawo. Anuú Aakoó MUNGÚ tí aga oó'.»