ESEKIELI 15 - Biblía Axweesantá Hhohho' ar Mungú 2004

Slaqsoó sabiíbu

¹ Axweesantá AAKOÓ MUNGÚ ana axaás, i kat,

² «Heewí, xáy xa'anoó sabiíbu kun ak hhoóe ta xaa'aá baraá sla/ato?

³ Xáy, xa'anoowós gár tleehharo iwa ya/an i deéro? Xáy muu kiki'i gaqo tleéhhi ar xa'anoó sabiíbu, nee gaa kari gawaadá' i tareree'?

⁴ Inós gár iwa harin aqo har asla oohisa'. Asla saga nee alaá sabiíbu birnga /ák, xáy tla/ángw xa'ano gár tleehharo iwa ya/an a milá?

⁵ Qoomár kuwa da/iiká bar gár i ya/an in káhh, xáy daxta kuwa /aáy nee asla, kuri xaawo tleéhh, gár iwa ya/an! Gár iwa baloó ya/an i káhh tam adoomá.

⁶ «Anuú Aakoó MUNGÚ a kah, ‹Adoodá' xa'anoó sabiíbu ngura duúx baraá tla/ángw xaa'aá sla/ato, nguri hhaamiís ar asla, adoorí an adoodáa' yaamuloouusér Yerusalemu ngir duux.

⁷ In ló'wa harmagaáhh ar xarasleema. Tam handá' asla kaa waaguwi, asltí aqo gin hhaamís. Qoomár bira harmagaahha hhe'eés ar xarasleema, an qoomár aníng iwa tsaahhiya' tawa AAKOÓ MUNGÚ.

⁸ Inooín dir'eene inkihhimu nguwa dakuusiyé', daxta yaamuuín in deewaameérií huúw. Anuú Aakoó MUNGÚ tí aga oó'.› »